Yeni lisenziya verilən kanallar: qeyri-peyk yayımı nədir? - AÇIQLAMA
Xəbər verdiyimiz kimi, bu günlərdə Audiovizual Şura “Baku TV”, “Beat TV”, “APA TV”, “Səhiyyə TV”, “Agro TV”, “Vivace” və “ATV+Cinema”ya peyk yayımı həyata keçirməyən platforma yayımçısı lisenziyaları verib.
Bəs peyk yayımı həyata keçirməyən platforma yayımçısı lisenziyası nə deməkdir?
Məsələ ilə bağlı Ölkə.Az-a danışan televiziya üzrə texniki mütəxəssis İsgəndər Qənbərov yayım üçün verilən lisenziyalardan danışıb. O bildirib ki, “Media haqqında” Azərbaycan Respublikası Qanunu qüvvəyə minməzdən əvvəl televiziyalara iki cür - yerüstü yayım üçün və peyk yayımı lisenziyaları verilirdi:
“Amma indi vəziyyət fərqlidir. Yeni qanunun qüvvəyə minməsindən sonra artıq müxtəlif platformalar üzərindən yayım aparanlara da lisenziyalar verilir. Bunlar internet televiziyaları, kabel televiziyaları və OTT dediyimiz IP telelviziyalarıdır. Hansı ki, onlar da artıq yayım üçün lisenziya almalıdırlar.
Kabel televiziyası deyildikdə “Ailə TV”, “KaTV”, “Connect” və s. nəzərdə tutulur. Yəni bu, ödənişli üsulla televiziyaya baxmaq deməkdir. Peyk yayımının lisenziyası başqadır və bu, sadalanan kanallar arasında yalnız aylar əvvəl Səhiyyə TV-yə verilib. Peyk televiziyası dedikdə, yayıma peyk antenası, başqa sözlə, "krosna" antena ilə baxa bildiyimiz kanallar nəzərdə tutulur. Yerüstü yayım isə bu yayım növləri arasında ən üst səviyyədir. Bu zaman lisenziya alan kanal Bakı teleqülləsindən, eləcə də rayonlardakı ötürücü antenalardan yayımlanır. Yerüstü yayım zamanı insanlar televiziyaları quraşdırdıqları ənənəvi antenalar vasitəsilə izləyə bilirlər. Yerüstü yayım üçün lisenziya fərqlidir.
Yeni qərardan sonra adıçəkilən televiziyalar rəsmi şəkildə lisenziya alaraq, həm internet, həm də kabel televiziyaları üzərindən sərbəst şəkildə yayım apara bilərlər. Siyahıdakı televiziyalara verilən lisenziyalar qeyri-peyk yayımı platformasıdır, yəni onlar peykə çıxa bilməzlər”,- deyə o bildirib.
Billurə Yunus
