Deputat: “Siyasi partiyanı siyasi dərnəyə çevirmək təşəbbüsləri çoxdur”

“Siyasi partiyalar haqqında” qanun layihəsində elə bir ciddi problem yoxdur. Bir çox iradlar sayla bağlıdır. Mənə qalsa, sayın elə 10 min qalması daha məqbuldur”.

“Ölkə.Az” xəbər verir ki, bunu deputat Sabir Rüstəmxanlı parlamentdə “Siyasi partiyalar haqqında” qanun layihəsinin ikinci oxunuşunun müzakirəsi zamanı deyib.

O deyib ki, bu gün Azərbaycanda siyasi partiyanı siyasi dərnəyə çevirmək təşəbbüsləri çoxdur: “Azərbaycanda partiyanın adı var, üzvü yoxdur, partiya var, sədri yoxdur. Ona görə də bu qanunun qəbuluna çox müsbət yanaşmaq lazımdır”.

Deputat əlavə edib ki, qanun layihəsində partiyaların fəaliyyətini məhdudiyyət qoyma məsələsi olmasa da, bəzi problemlər yaradan amillər var və onlar aradan qaldırılmalıdır. 

“Bu da partiya üzvləri haqqında məlumat toplusu, maliyyə məsələləri və icra hakimiyyətlərinin partiyaların fəaliyyətinə nəzarətlə bağlıdır. Bunlar aradan qaldırılsa, daha yaxşı olar”, - deputat  vurğulayıb.

Mürtəza
Ölkə.Az