Bayramda Şaxta baba və Qar qız çağırmaq istəyənlərin nəzərinə: Bahalaşma var - QİYMƏTLƏR

 

Artıq Yeni ilə - xristian Qərb xalqlarının dili ilə desək, Milad bayramına çox az qalır. Hər kəsə məlum olduğu kimi, bəzədilmiş şam ağacı, Şaxta Baba/Santa Klaus və Qar qız bu bayramın əsas simvollarından hesab olunur.

Ölkə.Az-ın apardığı kiçik bir araşdırma zamanı bəlli oldu ki, Qərb ölkələrində Şaxta Baba (Santa Klaus) olmaq üçün bəzi şərtlər var. Belə ki, hər il Milad ərəfəsində şirkətlər bunun üçün vakansiyası elan edir. Lakin heç də hər kəsə bu fəaliyyətlə məşğul olmaq üçün icazə verilmir.

Sözügedən personajı canlandıran şəxslərin məhkumluğu olmamalıdır. Əgər onların əllərində, boynunda və s. tatu varsa, bu, mütləq gizlədilməlidir. Həmçinin Santa Klauslara xüsusi formada “ho”, “ho”, “ho” demək də öyrədilir. Onların iş prinsiplərindən biri də azyaşlılara təbəssüm etməsi və sehrli görünməsidir. Çünki əgər Santa Klausa uyğun gəlməyən ən kiçik detal varsa, bu, sehri poza bilər.

Qərbdəkindən fərqli olaraq bizdə, yəni ölkəmizdə Santa Klaus olmaq üçün xüsusi tələblər yoxdur. Ayrı-ayrı şəxslər fərdi şəkildə bu cür xidmətlər təklif edir.

Bununla belə qiymətlər kifayət qədər yüksəkdir.

Ölkəmizdə də sevilərək qeyd olunan bu bayramı səbirsizliklər gözləyənlər sözsüz ki, uşaqlardır. Bu bayramda övladlarını əyləndirmək istəyən valideynlər də öz növbəsində Şaxta babanı “sevindirməli”dirlər.

Qiymətlər əsasən personajların sayına, tədbirin müddətinə və şoulara görə dəyişir.

Belə ki, elan saytalarında tək şaxta babanın evə yarım saatlıq gəlişi üçün 70 manat tələb olunur. Əgər valideyn qar qızın da gəlməsini istəyirsə, bu zaman ümumilikdə 100 manat ödəməlidir.

Şaxta baba xidməti göstərən Emil adlı şəxs deyir ki, qiymətlərin belə olmasının səbəbi “Santa Klaus”un yanında səsgücləndirici aparat və mikrofon gətirməsi, həmçinin aktyorluq fakültəsini bitirməsidir:

“Siz əsl Şaxta baba ilə danışırsınız. Aktyorluğu bitirmişəm deyə, biz uşaqlarla tədbiri daha maraqlı edə bilirik. Sifariş verən şəxs ya taksi göndərməli, ya da gəlib özü bizi aparmalıdır. Yəni yol xərci qiymətə daxil deyil”.

Əlaqə saxladığımız digər şaxta baba isə 40-45 dəqiqə üçün 60 manat tələb edir:

Şaxta baba ilə yanında qar qız olarsa, qiymət 70 manat, bunlarla yanaşı kloun və şar şou da olacaqsa qiymət 85 manat edəcək”.

Digər bir elanda isə Şaxta baba və Qar qız 1 saatlıq proqram üçün 90 manat qiymət təyin edilib. Şaxta baba xidməti göstərən şəxslər uşaqlara şeir deməsinə, mahnı oxumasına müvəffəq olur.

Əgər proqrama köpük, şar və kağız şou əlavə olunarsa, qiymət 150 manata qədər yüksəlir. Bu zaman isə şou proqram 1.5 saatı əhatə edir.

Yalnız Azərbaycan dilində və Bakı şəhəri daxilində, standart geyimdə Şaxta baba xidmətini 49 manata təklif edən də var. Əgər bu siyahıya Qar qız əlavə olunsa, əlavə 39 manat, kloun da gələcəksə 29 manat ödəmək lazım gələcək.

Digər cizgi film personajlarının qiyməti isə 29-39 manat aralığında təşkil edir.

35 ədəd olan şar şou üçün isə 29 manat, Şaxta baba “maral”la gələcəksə, əlavə 35 manat ödəməli olacaqsınız.

15 uşaq üçün “face art” 45 manat, sehrbaz 49 manat, köpük, panda şousu hər biri ayrı-ayrılıqda 59 manat, dovşan şousu 65, transformer obrazı isə 89 manatdır.

Qiymətlər adətən bir-birinə yaxın olsa da, şouların və personajların sayı artıqca rəqəmlər daha da arta bilər. Belə ki, elan saytlarınsa Şaxta baba, köpük, şar və alov şousu 109 manata təklif olunur. Şaxta baba, panda və şar şousu 115 manat, Santa Klaus, Qar qız, kloun və şar şou 125 manat, Şaxta baba, Qar qız, panda şou 135 manat, Santa klaus, panda şou və sehrbaz çağırmağın xərci isə 145 manat təşil edir.

O qədər də tələbat olmadığından və əsas “yük” Şaxta babanın üzərinə düşdüyündən Qar qızın qiyməti elə də çox deyil.

Qiymətlərə təsir edən amillərdən biri də ayın tarixidir. Belə ki, Şaxta baba və Qar qız əgər dekabrın 29-u dəvət olunursa, qiymət daha aşağı olacaq. Amma valideynlər bu personajları 30-31 dekabrda dəvət etmək istəyirlərsə, bu zaman qiymətlərdə 30-40 manata qədər fərq olacaq.

Ölkəmizdə yeni il personajları xidmətində ötən illə müqayisədə 10 manatdan 30 manatda qədər bahalaşma müşahidə olunur. Belə ki, ötən il ən bahalı şou 125 manat təşkil edirdisə, bu il qiymətlər 135-145 manat aralığında dəyişir.

Billurə Yunus