Müdafiə Nazirliyindən isti hava şəraiti ilə bağlı

Hərbi hissələr xüsusi rejimdə fəaliyyət göstərirlər

Azərbaycanın Müdafiə Nazirliyi son günlər ölkədə müşahidə olunan isti hava şəraiti ilə əlaqədar hərbi hissələrin fəaliyyəti ilə bağlı açıqlama verib.

Nazirliyin mətbuat xidmətinin rəhbəri Vaqif Dərgahlının bildirdiyinə görə, havaların temperaturunun yüksəlməsi ilə əlaqədar Silahlı Qüvvələrin şəxsi heyəti arasında istilik və günvurma hallarının qarşısının alınması məqsədilə artıq 2014-cü ilin may ayından etibarən müdafiə naziri general-polkovnik Zakir Həsənovun əmrinə əsasən hərbi hissə və birləşmələrdə xüsusi rejimin tətbiq olunmasına başlanılıb və həmin əmr hələ də qüvvədədir.

“Əmrə əsasən havanın hərarətinin yüksək olduğu günlərdə şəxsi heyətin isti və günvurmadan qorumaq üçün döyüş hazırlığı məşğələləri saat 11:00-dək və 17:00-dan sonra keçirilməli, hərbi qulluqçulara günorta saatlarında istirahət verilməlidir”, - deyə, V.Dərgahlı bildirib.

Onun sözlərinə görə, əmrə əsasən, döyüş hazırlığı və gündəlik fəaliyyət tədbirləri planlaşdırılarkən hərbi qulluqçular günəş şüalarının birbaşa düşdüyü ərazidə olmamalı, əsasən kölgəlikdə, kazarma şəraitində yerləşdirilməli, açıq səma altında görülən xidməti işlərə cəlb olunmamalı, hərbi hissələrdə sərin su duşları və əlavə su təchizatı məntəqələri yaradılmalı, şəxsi heyət içməli su və fərdi su qabları ilə təmin edilməlidir./Oxu.az/

Ölkə.Az