İlahiyyatçı: \"İŞİD əleyhinə QMİ sədri özü birinci xütbə verməlidir\"

İlahiyyatçı alim İŞİD-ə görə QMİ rəhbərliyini sərt tənqid etdi

Türkiyə Diyanət İşləri Başkanlığı yeni İŞİD raportu hazırlayıb. Hesabatı şərh edən Türkiyə diyanət işləri başqanı Mehmet Görməz "Əgər bəziləri öz quldurluqlarını Quranın adına bağlayırlarsa, onda İslam aləmi, alimlər buna səssiz qalmamalı, bütün müsəlman ziyalılar dünyanın hər yerində dinin tədrisinin mütləq olduğunu cəmiyyətə və dövlətlərə başa salmalıdırlar. Biz bu raportda yer alan müddəaların bütün Türkiyə miqyasında məscidlərdəki xütbələrdə, müftülüklərin fətvalarında istifadə edilməsini qərara aldıq", deyə bildirib.

Bəs bu sahədə Azərebaycanda hansı işlər görülür? İŞİD terror təşkilatının iç üzünün açılması üçün Qafqaz Müsəlmanları İdarəsi əhali arasında hansı maariflənmə işləri aparır? Bu suallara cavab tapmaq üçün Ölkə.az ilahiyyatçı alim Elşad Mirinin fikirlərini öyrənib.

Elşad Miri: "Deyərdim ki, hətta Türkiyənin özündə belə bu çox gecikmiş bir addımdır. Bu məsələ ortaya çıxan kimi dərhal reaksiya verilməli idi. Əgər bu məsələnin üstünə vaxtında düşsəydilər terror təşkilatının tərkibinə qatılanların sayı bu qədər olmazdı. Gec də olsa bu məsələnin gündəmə gətirilməsi, maarifləndirici xarakterlə insanlara çatdırılması əlbəttə ki yaxşı bir haldır. Azərbaycanda da belə şeylərin olmasını, ölkəmizdə də bu məsələ ilə bağlı düzgün marifləndirmə işinin aparılmasını, İŞİD terror təşkilatının nə olduğunu, hansı əsaslara dayandığını, bu gün onların etdiyinin həqiqətən də İslama uyğun olub-olmadığını insanlara ağılla çatdırmaq lazımdır. Peyğımbərimizin dövründə olan hadisələri, Qurana uyğun olub-olmayan məsələləri gündəmə gətirib, İŞİD-in əslində İslam adı altında terror təşkilatı olması konkret olaraq bəyan edilməlidir. Bildirilməlidir ki, bu gün azərbaycanlılar necə aldadılıb İŞİD terror təşkilatına qoşulmaq üçün Suriyaya aparılır. Ölkənin Qafqaz müsəlmanları idarəsi sədrləri haqda kitab yazdırmaqdansa, bu məsələlərlə bağlı kitab yazdırılmalı, bu məsələ gündəmə gətirilməli və bu sahəni əhatə edən düzgün, geniş şərhli materialların insanlara daha çox çatdırılmasına çalışmalıdır. İŞİD terror təşkilatına qoşulub təkrar ölkəyə qayıdan insanı danışdırdığınız zaman adamın qarşısına Quran ayələrini qoyur. Quran ayələrini ona düzgün şərh edəndə ki ay yoldaş, ay vətəndaş əslində bu sən başa düşdüyün kimi deyil, həmin adam çaşıb qalır ki, axı mənə bu cürə başa salmayıblar. Onlarla terror təşkilatının tərkibinə aldadılaraq qoşulan insanlar var. İnsanların aldadılmasının qarşısını almaq üçün qısa və dolğun məzmunlu kitabçalar dərc olunmalıdır, maarifləndirici işlər aparılmalıdır və onlara aşılanmış fikirlər ətraflı izahla aydınlaşmalı və bu insanların çaşdırıldığını onların özlərinə sübut etmək lazımdır. Belə olan halda İŞİD və bənzəri təşkilatlara qoşulmaq istəyənlərin bu arzu və istəkləri tamamilə aradan qalxacaq. Bununla bağlı Qafqaz Müsəlmanları İdarəsinin sədri özü gərək birinci xütbə versin. Əfsuslar olsun ki, kadr məsələsi, kadr problemi, bu insanların məsələdən xəbərsiz olmaları, o cürə insanların qarşısında aciz olmaları nəticədə neçə-neçə vətəndaşımızın bu terror təşkilatlarına qoşulmasına gətirib çıxarır".

- Bu məsələ ilə bağlı Qafqaz Müsəlmanları idarəsinə müraciət edilibmi ki, marifləndirici işlərə başlanılsın?

- Onlar kiminsə müraciətinə baxmırlar. İndiyədək hansı müraciətə baxıblar ki? Gəlin Ramazan bayramını eyni vaxtda keçirək, Qurban bayramını eyni vaxta keçirək, həccin qiymətini azaldaq, belə şeylər təklif edəndə belə gülünclə qarşılayarlar. Faktiki olaraq onların şəxsi biznesi həmin sahənin üzərində qurulub. İnanmırıq ki, onlar hansısa bir təklifə müsbət reaksiya versinlər. Həmçinin bu məsələyə də heç bir əhəmiyyət verən yoxdur. Bu günə qədər təklif etmişəm ki, qurumun arxivində olan mollaların, axundarın siyahısını yayımlasınlar, ancaq bunu etmirlər. Onu yayımlamalıdırlar ki, insanlar bilsin kim işləyir. Bir hadisə olan kimi açıqlama yayırlar ki, o bizdə işləmir, işdən çıxardılıb. Şəfaf olmurlar, şəffaf olsalar insanların onlara inamı da artar.

- Biz marifləndirmə məsələsində gecikmişikmi?

- Bu günə qədər gecikmişik. Bununla bağlı qanunlar çıxarıldı ki, ora gedənlər həbs olunacaq. Bunlar gözəl bir qərarlardır. Hər nə qədər zərərin yarısından qayıtmaq da olsa, müsbət addımdır. Faktiki olaraq gecikilən hər bir məsələ əleyhimizə işləyən bir məsələdir. Dövlət qanunlarla bunu həyata keçirir, bunun kimi də Qafqaz Müsəlmanları İdarəsi addımlar atmalı idi, araşdırmalar aparıb, terrorçuların insanları vuruşmağa aparmasının, onların təbliğatların qarşısını almalı idi. Təəssüf ki, biz QMİ-nin fəaliyyətində bunu görmürük".

Səxavət Məmməd
Ölkə.az