Nizami rayonu: qanunsuzluq və özbaşınalıq zonasından
Tüstü, toz, zəhərli qazlar və Bakının üzərinə çökən ekoloji fəlakət...
Bölgələrdəki işsizlik insanları paytaxta axın etməyə məcbur edir. Bakı böyüyür. Yeni binalar, ticarət mərkəzləri, ofislər tikilir.
Şəhərimiz sözün əsl mənasında xaotik urbanizasiyanın caynağında çırpınır. İldən ilə yaşllıqlar azalır, şəhər isə sürətlə betonlaşmaqda davam edir. Nəqliyyat vasitələrindən atmosferə atılan zəhərli qazlar şəhəri insan həyatı üçün təhlükə yuvasına çevirir.
Ölkə.az bu gün oxucularına bir zamanlar şəhərimizin ən sakit, yaşıllıqlar içərisində itən rayonu Nizami haqqında məlumat verəcək.
Yeni tikilən binaların ətrafındakı hasarların üzərində "Müvəqqəti narahatçılığa görə üzr istəyirik" yazısını oxuya-oxuya rayonun əsas arteriyası olan Qara Qarayev prospekti ilə irəliləyirik. Hasarlar üzərində tikinti aparan şirkətlər haqqında heç bir məlumat yoxdur. Tikinti divarı ilə piyadaların hərəkət etdiyi səki, maşınların şütüdüyü küçə arasında bir-neçə metr məsafə var. Heç bir təhlükəsizlik tədbiri görülməyib. Tikintidən qalxan qum və sement tozu ətrafdakı evlərin şüşələrini qaraldıb. Yaxınlıqda dayanan taksilərin üstü belə əl qalınlığında toz təbəqəsi ilə örtülüdür.
Əvvəllər "Xalqlar Dostluğu" ilə "28 may" metrostansiyalarını birləşdirən metro xəttinin üstü, Qara Qarayev prospekti boyu, hündür və sıx şam ağacları zolağı ilə örtülü idi. İndi isə həmin zolaqboyu hərəkət edirik. Neftçilər metrostansiyasından başlayaraq 8-ci km bazarına qədər Qara Qarayev prospekti boyu hərəkət edirik. Gözümüzün önündə açılan mənzərə bizi dəhşətə salır. 30-40 illik şam və zeytun ağacları hamının gözü qarşısında vəhşicəsinə doğranır.
Nefçilər metrosunun yaxınlığındakı açıq çayxananın yerində inşaat işi gedir. 6 aya yaxındır ki, burda nə isə tikirlər. Tikintidə işləyənlər obyektivlərimizdən qaçırlar, çəkməməyimizi xahiş edib uzaqlaşırlar bizdən. Burada nə tikildiyini sakinlədən soruşuruq. "Nə tikdiklərini biz də bilmirik, "Kinder surpriz"dir. Tikilib qurtaranda biləcəyik", deyə ətrafdan keçən rayon sakinləri gülərək cavab verirlər.
Tikinti gedən yerə baxırıq. Ağacı kəsib, sonra da iri kötüyünü basdırıblar. Yerdə doğranmış, canı hələ sulu, şəhərimizin havasını təmzləyən şam ağacı sanki inildəyir...
Neftçilər metrosundan üzü 8-ci klometr bazarına doğru gedirik. Yaxınlıqdan keçən Pərviz adlı rayon sakini bizə deyir ki, bu yolun hər iki tərəfi əvvəllər yaşıllıq idi, ancaq indi sağ tərəfdə o yaşıllıqdan əsər-əlamət qalmayıb. Ağaclar kəsilib, yerində nəsə tikilir. Sol tərəfi də artıq ölçüb-biçirlər. Belə getsə rayon ərazisində bir dənə də olsun ağac qalmayacaq.
Yenə eyni sistemlə kəsilənböyük ağacların kökləri basdırılıb, nəhəng gövdələr isə qəddarcasına doğranmaqdadır. Ərazidəki binalarla tikilən obyektin arası cəmi on addımdır. Yaşıllıq zolağının üzərində tikilən ticarət obyektləri isə birbaşa metro xəttinin üstüdə inşa olunur.
Bütün bu həngamə isə Nizami Rayon İcra Hakimiyyətinin lap burnunun ucunda baş verir. Gördüklərimizə ancaq bir ad vermək olar: CİNAYƏT!
İndi isə oxucularımızı qazanmaq ehtirasının gözlərini kor etdiyi məmur və biznesmenlərin hər bir Bakı sakininə qarşı işlədikləri cinayətin baş verdiyi yerə, Nizami rayonuna səyahətə aparırıq:
Ölkə.az, Monitorinq şöbəsi
