Azərbaycan üçün təhlükə var?

Ebola virusundan ölənlərin sayı 2000-ə yaxınlaşır.

Qərbi Afrikada tüğyan edən Ebola virusu ehtimal olunduğundan daha ciddi təhlükə mənbəyidir. İndiyə qədər 1069 nəfərin bu xəstəlikdən öldüyü deyilsə də, bəzi mənbələr ölü sayının 2000-ə yaxın olduğunu göstərir.

Ümumdünya Səhiyyə Təşkilatının mətbuat katibi Qriqori Hartl qeyd edib ki, epidemiyanın qarşısını almaq üçün rəsmilər fövqəladə tədbirlər görməlidirlər. Əks halda isə, virus daha çox insanın ölümünə səbəb olacaq.

Ümumdünya Səhiyyə Təşkilatı tənqidlərlə üzləşib. Virusun fevral ayında aşkarlanmasına baxmayaraq, təşkilat təhlükə barədə avqustun 8-də xəbərdarlıq edib. Bu isə əksər ölkələrdə insanların qəzəbinə tuş gəlib.

Virus ilk dəfə fevral ayında Qvineyada baş qaldırıb. Təhlükəli virus əsasən Qvineya, Liberiya, Siera Leone və Nigeriyada geniş yayılıb. Bu ölkələrlə qonşu dövlətlər epidemiyanın qarşısını almaq üçün sərhədlərini bağlayıb. Fransanın “Sərhədsiz Həkimlər” beynəlxalq təşkilatı virusun qarşısını almaq üçün azı 6 ay vaxt lazım olduğunu bildirib. Yoluxmanın sürətini azaltmaq üçün isə, əsasən Liberiyada mübarizə tədbirlərini gücləndirmək lazımdır.

Azərbaycanın Səhiyyə Nazirliyi bəyan edir ki, Ebola virusuna yoluxması halı Azərbaycan üçün aktual və təhlükə yaradan məsələ deyil. (ANS TV)

Ölkə.Az