Mətn ölçüsü:
  • 100%

"Sevil massivi" qalmaqalının altından da Kəmaləddin Heydərov çıxdı

"Sevil massivi"nə görə sözün əsl mənasında zibilə düşənlər bu gün etiraz aksiyası keçirmək üçün şirkətin ofisinin qarşısına yığışmışdılar.

Əraziyə çatanda ilk gözümüzə dəyən şey polis maşınları və çoxlu polis əməkdaşları oldu. Polisin sayı həmişə olduğu kimi yenə etirazçıların sayından bir-neçə dəfə çox idi.

Polis nə zamandan pul verən olub?

Etirazçılara yaxınlaşırıq. Üç mülkü geyimli şəxs, (mülkü geyimlərini ona görə qeyd edirəm ki, bu mülkü geyimlilər polis əməkdaşları idi) etirazçılara deyirdilər ki, "Narahat olmayın, hər şey həll olacaq. Etiraza gərək yoxdur. Pulunuzu da, çəkdiyini xərci də qaytaracağağıq". Deyəcəksiz indi bu mülkü geyimlilərin polis olduğun hardan bildin? Əlbətdə əvvəlki aksiyalarda dəfələrlə qarşılaşmışdıq bu cənablarla. Kameranı görən kimi elə həmin mülkü geyimlilər yaxınlaşdı ki, çəkmə, olmaz!. Niyəsini soruşmağa imkan belə vermədilər. Əraziyə dərhal bir neçə avtobus gəldi. Etirazçıları və biz jurnalistləri avtobuslara mindirib göndərdilər Baş Prokurorluğun Korrupsiya ilə Mübarizə İdarəsinə. Nəzarət üçün isə avtobusa Abşeron Rayon Polis İdarəsinin rəis müavini özü əyləşdi. Xatırladırıq ki, biz hadisə yerinə gələndən qısa bir müddət sonra polislər bir qadını və ərini vəhşicəsinə döydülər. Kişini maşına "basıb" naməlum istiqamətə apardılar, qadına isə 1 manat xırda pul verib göndərdilər bizimlə Korrupsiya idarəsinə.

"Bəy tərifi" kanalları

Etirazçılarla danışırıq. Şakir adlı zərərçəkən bildirir ki, ""Sevil massivi" haqda TV-lərimizdən xəbər tutdum. Getdim torpaq sahəsi aldım, ev tikdirdim ancaq indi qalmışam əli boşda. Nə ev var nə də torpaq. "Massiv"in reklamını bəh-bəhlə edən TV-lərə indi zəng edirik ki, gəlin çəkin, bu biabırçılığı işıqlandırın, heç telefonda bizi sona qədər dinləmədən dstəyi asırlar. Bir Turan adlı TV-də verliş aparan var idi, canı çıxsın təriflədiyi kimi indi də bizim dərdimizdn danışsın. TV-lərimiz hamısı "bəy tərifi" kanallarıdır. Hansına zəng edirik deyir, rəhbərlik icazə vermir. Sonrada çıxıb dəqiqlikdən, ədalətdən danışırlar".

Etirazçılarla söhbət edəndə məlum olur ki, ən az 7 min və ən çox100 min manata alınıb buradakı torpaq sahələri. 3 - 4 mərtəbə ev tikən kim, bugün - sabah toy edib ora köçmək istəyən kim. Hamının dərdi birdir. Zərərçəkınlərdən Hikmət adlı biri deyir, "qardaş, kirələrdə çürüyürəm. Artıq evimi tikib hazır etmişdim, köçmək istəyirdim ki, dedilər burda vulkan püsgürəcək. Əgər bura vulkanik ərazi idisə bəs onda bu boyda tikintiyə niyə icazə verirdilər?"

Vulkanik ərazidə külək enerjisi stansiyası tikirlər?

Ərazidə bir neçə dəfə olduğumuz üçün bilirik ki, "Sevil massivi"nin yuxarı hissəsində bir neçə külək enerjisi stansiyası tikilib və fəaliyyət göstərir. Əgər ərazi vulkanikdirsə, bəs onda bura bu qədər sərmayə niyə yatırılır? Bilə-bilə ki, vulkan püskürsə hər şey məhv olacaq, onda bu stansiyaları niyə tikirdilər bu ərazidə? Adi daşı daşın üstünə qoymaq istəyəndə neçə yerdən sənəd toplamaq lazım olur. 3 mindən çox vətəndaşa satılan və ərazisi bir neçə hektar olan yer hakimiyyət orqanlarında gizlin tikilə bilər? Təbii ki, yox...

"Sevil massivi" qalamqalında Kəmaləddin Heydərov izi...

Etirazçılardan əldə etdiyimiz məlumata görə, 2014-cü ilin aprel ayında onlara zəng gəlib ki, FHN massivdə tikintini dayandırıb. İnsanlar təşvişə düşüblər. Ancaq bir müddət sonra yenə alıcılara xəbər gəlib ki, FHN tikintiyə icazə verib. Məsələni araşdırdıq, etirazçılar və "Sevil massivi"ndə işləyən bir neçə nəfər bildirdi ki, FHN-nin məsələsi "şapka" məsələsi idi. "Şapka"nı aldılar icazəni verdilər. Bu qalmaqalı həm də massivi kimin işlədəcəyi üstündə gedən çəkişmə ilə əlaqələndirirlər. Etirazçılardan əldə etdiyimiz məlumata görə, massivin ərzisində işıq, qaz, su və konalizasiya xətləri çəkilib. Ərazidə fərdi evlərdən başqa 4 mərtəbəli yaşayış binaları da tikilir. Torpaq alanlar yenə heç olmasa öz torpağın tanıyır, ancaq elə zərəçəkənlər var ki, 4 mərtəbəli binadan ev alıb ancaq heç binanın təməli belə atılmayıb.

"Traxtorun suçu nə?"

Ramil adlı bir şəxs yaxınlaşır və deyir ki, "Qardaş, əsas zibilə düşənlərdən biri də mənəm. Kreditə ekskovator aldım. Gəldim "Sevil massivi"ndə işləməyə. İki aydı iş dayanıb. İmkan vermirlər ekskovatorumu götürüm. Hara gedirəm deyirlər, istintaq gedir, istintaq bitsin gəlib texnikanı apararsan. "Qardaş, ekskovator nə vaxtdan canlı şahid olub, o ekskovatorun bu şirkətə heç bir aidiyyatı yoxdur axı. Bank çöküb boğazıma ki, krediti ver. O, ekskovator işləməsə mən hardan qazanıb verim o krediti?"

"Sevil massivi" ətrafında böyüyən qalmaqalı diqqətdə saxlayırıq və hadisələrin inkişafı haqqında yeni materialları yaxın vaxtlarda saytımızdan oxuya bilərsiniz.

Ölkə.az, Monitorinq şöbəsi