Bu kənddə nə xəstəxana var, nə də aptek

Tovuz Azərbaycanın dilbər və səfalı güşələrindən biridir. Gözəl təbiəti, səfalı havası, sərin bulaq suyu və s. insanı valeh edir. Amma bununla paralel, qarşılaşdığımız bəzi xoşagəlməz hadisələr də var. Elə Çatax kəndində gördüyümüz mənzərə kimi. Burada tikilən xəstəxana hazırda Mədəniyyət evi kimi fəaliyyət göstərir.

Tovuz rayonunun Çatax kənd sakinləri aptekin və xəstəxananın olmadığından şikayətlənirlər. Düzdür, vaxtilə burada xəstəxana tikilib istifadəyə verilib, lakin indi bu tibb ocağı Mədəniyyət evi və kitabxana kimi fəaliyyət göstərir. Onlar səhhətlərində hər hansı bir problemlə üzləşdikdə, ən yaxın hesab etdikləri qonşu kəndə - Böyük Qışlaq kənd xəstəxanasına üz tuturlar. Bunun üçün isə onlar 10-15 manatlarından keçməli və 3 km-lik yolu qət etməli olurlar.

Sakinlərin üz tutduqları həmin xəstəxanaya baş çəkdik. Xəstəxananın baş həkimi Həsən Yusifov deyir ki, tibb ocağı 12 min nəfərə xidmət edir. Bura Çatax, Çeşməli və Böyük Qışlaq kəndinin sakinləri müraciət edir. Kadr çatışmazlığından şikayət edən Həsən Yusifov onu da əlavə etdi ki, vakant yerlərin olmasına baxmayaraq, gənc tibbi işçiləri burada işləməyə meyl göstərmir.

Məsələ ilə bağlı Çatax Kənd İcra Nümayəndəliyinin münasibətini öyrənməyə çalışdıq. Lakin burada da eyni mənzərə ilə qarşılaşdıq. Bağlı qapı... Çatax kənd sakinləri isə bu vəziyyətə hələ bir az da öyrəşməli olacaqlar... (TTV)

Ölkə.Az