Bakı aeroportunda sıxlıq, uçuşlar gecikdi - FOTOLAR

Bu gün səhər saatlarından etibarən Heydər Əliyev Beynəlxalq Hava Limanında sıxlığın yaşanması ilə bağlı görüntülər yayılıb. 

“Ölkə.Az” Baku.ws-ə istinadən xəbər verir ki, sıxlığın yaranmasına səbəb Dövlət Sərhəd Xidmətinin pasport nəzarət sistemində problem yaranmasıdır. Bu səbəbdən vətəndaşların dövlət sərhədindən buraxılmasında ləngimələr olub: “Saat 06:10-dan Dövlət Sərhəd Xidmətinin sistemi donub. Yüzlərlə insan çarəsiz qalıb. Heç kim neytral əraziyə buraxılmır. Sistemin donması uzun növbələrə və narazılığa səbəb olub”, - deyə şikayətçi bildirib.

Qeyd olunub ki, saatlarla sistemin donmasının davam etməsinə baxmayaraq, sərnişinlərə heç bir məlumat verilmir. Həmçinin təyyarə reyslərində də gecikmələrin olduğu deyilir.

Mart ayının 18-də İAMAS sistemində yaranmış texniki nasazlıq səbəbindən dövlət sərhədindən buraxılış məntəqələrində vətəndaşların və nəqliyyat vasitələrinin hərəkətində qısamüddətli ləngimələr yaranıb.

Bu barədə Ölkə.az-a Dövlət Sərhəd Xidmətinin Mətbuat Mərkəzindən bildirilib.

"Operativ olaraq həyata keçirilmiş tədbirlər nəticəsində nasazlıq aradan qaldırılmış, vətəndaşların və nəqliyyat vasitələrinin buraxılışı təmin edilib", - məlumatda deyilir.