Güllələr haradan və kimə atılır? – Deputata olan sui-qəsd planı

Tanınmış ictimai-siyasi xadim, millət vəkili və partiya sədri Fazil Mustafaya qarşı törədilmiş sui-qəsd çirkin bir terror aktı, Azərbaycan dövlətinə qarşı planlaşdırılan və icra olunan ağır cinayət əməlidir. 

“Ölkə.Az” xəbər verir ki, bunu Milli Məclisin Əmək və sosial siyasət komitəsinin sədri Musa Quliyev deyib.

“Heç şübhəsiz ki, bu terror Fazil bəyin ictimai-siyasi fəaliyyəti ilə bağlıdır və ölkədə ictimai asayişi, sabitliyi pozmaq, xof yaratmaq, haqqı deyənləri, milli maraqları müdafiə və təbliğ edənləri qorxutmaq və susdurmaq niyyəti güdür. Fazil Mustafa tanınmış, təcrübəli, parlaq ictimai-siyasi xadim  olmaqla, bütün fəaliyyəti şəffafdır, şəxsi planda özünün və ailəsinin düşməni yoxdur, biznes fəaliyyəti ilə məşğul deyil, kriminal aləmlə əlaqəsi yoxdur. Deməli, ona atılan güllələr onun siyasi mövqeyindən və fəallığından narahat və narazı olan qrupun, qüvvənin, təşkilatın, dövlətin cinayət əməlidir”- o qeyd edib.

Komitə sədri əlavə edib ki, cinayətin vaxtının və yerinin seçilməsi, atəşin " Kalaşnikov" avtomat silahından atılması terrorun qətl məqsədi ilə düşünüldüyündən və həyata keçirildiyindən xəbər verir: 

“Hər bir cinayət hadisəsinin araşdırılmasında onun motivinin düzgün müəyyənləşdirilməsi əsas rol oynayır. Fikrimcə, bu cinayətdə əsas məqsəd Fazil bəyin fiziki olaraq aradan götürülməsi ilə yanaşı, bəlkə də, daha çox ölkədəki ictimai sabitliyə təhdiddir. 

Azərbaycanın son illər, xüsusi ilə, 44 günlük Vətən müharibəsi və ondan sonrakı dövrdə əldə etdiyi uğurlar, müstəqil və yalnız milli maraqlara söykənən siyasət aparması, bölgədə güc və söz sahibinə çevrilməsi bəzi dövlətləri, siyasi- hərbi gücləri çox pərişan edib. 

İndi Azərbaycan öz tarixinin ən məsuliyyətli, şərəfli, eyni zamanda riskli taleyüklü zamanını yaşayır. Bu dövrü yalnız müstəqilliyimizin ilk illəri ilə müqayisə etmək olar. O dövrdə də Azərbaycan müxtəlif dövlətlərin və güclərin iqtisadi, siyasi və hərbi maraqlarının toqquşduğu bir geo- politika meydanı idi. Məhz o illərdə ölkəmiz çoxsaylı terror hücumuna və qəsdinə məruz qalıb. Məhz o illərdə bir neçə dəfə dövlət çevirilişinə cəhd edilib,  Prezident Heydər  Əliyevə qarşı 3 dəfə sui-qəsd cəhdi olub, Azərbaycanda millət vəkilləri Eldar Bağırov, Afiyəddin Cəlilov, Əli Ansuxski və Ziya Bünyadov bir-birinin ardınca qətlə yetirilib.

Ümummilli lider Heydər Əliyevin siyasi iradəsi, təcrübəsi, müdrikliyi və şəxsi cəsarəti və xalqın ona inamı sayəsində bütün terror və sui-qəsd cəhdlərinin qarşısını almaq, ictimai sabitliyi və asayişi bərpa etmək, dövləti qurmaq və möhkəmləndirmək mümkün olub.

Millət vəkilinə qarşı 28 mart tarixində gecə saat 21.51 dəqiqədə törədilən terror aktından bir az qabaqkı hadisələri geriyə sayım qaydasında xronoloji ardıcıllıqla   göz önündən keçirək: 

- Dövlət Təhlükəsizliyi Xidməti əməkdaşlarının peşə bayramı günü;
- Bizə dost ölkə olan İsraildə səfirliyimizin açılması;
- Bu il Ramazan ayının başlanması fətvasının fərqli qaydada verilməsi;
- "Bravo" marketdə avtomat silahla törədilən terror cinayəti;
- Tehranda səfirliyimizə terror hücumu nəticəsində bir əməkdaşımızın öldürülməsi, ikisini yaralanması;
- İranın "Zəngəzur dəhlizi"nin açılmasına qətiyyətlə qarşı çıxması, bunu öz maraqlarının "qırmızı xətti"adlandırması (qırmızı qan rəngidir);
- İranın Qafanda heç bir zərurət olmadan konsulluq açaraq qonşuluq münasibətlərini sıfıra endirməsi;
- Azərbaycan eko-fəallarının Qarabağda üç aydan artıq davam edən dinc, dirənişli və effektli mübarizəsi.  Qarabağ ermənilərinə İrəvandan silah-sursat və terrorçu dəstəyinin qarşısını kəsilməsi;
- Rusiyanın avanturist layihəsi olan "Ruben Vardanyan oyunu" nun pozulması;
- Fransanın ermənipərəst siyasətinin Azərbaycan uctimaiyyəti tərəfindən pislənməsi və cənab prezident İlham Əliyevin müxtəlif beynəlxalq səviyyələrdə dönməz və cəsarətli siyasi iradə nümayiş etdirməsi;
- Postmüharibə dövründə Ermənistanın mina terroru və digər hərbi cinayətlərinin qarşısının alınması məqsədi ilə Azərbaycan Ordusunun qətiyyətli manevrləri sayəsində bir çox strateji yüksəkliklərin nəzarətə götürülməsi və s.

Yuxarıda qeyd olunan xüsusatların hər biri  millət vəkilinə xain terror hücumuna səbəb ehtimalı kimi araşdırılmalıdır və yəqin ki, araşdırılacaqdır. 

Yəqin ki, cinayət motivləri araşdırılarkən Fazil Mustafanın sosial şəbəkələrdə 5-ci kolona, antimilli şuraya, dini xurafata, irançı təfəkkürə xidmət edən şiə fundamentalizminə, cəhalətə qarşı davamlı, sistemli və haqlı mübarizəsini də göz ardı etmək doğru olmazdı. 

İstənilən halda, Fazil bəyə atılan güllələr Azərbaycan dövlətinə, milli müstəqilliyimizə və birliyimizə açılmış xain atəşidir.

Bu güllələr sivil müzakirələrdən qorxan nadanların mədəniyyətə, ağıla, biliyə, tərəqqiyə, elmə, təhsilə qarşı cinayətidir. 

Fazil bəyə atılan güllələr haqqa, ədələtə, imana, islamın dəyərlərinə qarşı terrordur. Əminəm ki, bu mənhus cinayəti törədənlər, təşkil edınlər və sifariş verənlər qısa müddətdə tapılacaq və layiqli cəzasını alacaqdır.

Azərbaycan düclü dövlətdir, ölkədə olduqca möhkəm və etibarlı Prezident- Xalq birliyi mövcuddur və heç bir qüvvə bizim iradəmizi sarsıda bilməz”.

Mürtəza
Ölkə.Az