Saatlıda məmur özbaşınalığı davam edir

Saatlı rayonunun Azadkənd kəndinin sakinlərinin qrunt su problemləri hələ də öz həllini tapmayıb.

Ölkə.az xəbər verir ki, Azadkənd kənd kəndinin sakinlərinin şikayətindən sonra Saatlı Rayon İcra Hakimiyyəti başçısının birinci müavini İlham Quliyev kənd sakinlərinə problemlərinin həll olacağını bildirib.

Bundan sonra Ölkə.az-a kəndin icra nümayəndəsi Anaxanım xanım danışaraq bildirib ki, kəndlilərin şikayəti öz həllini tapıb, ancaq bu gün kənd sakinləri icra nümayəndəsinin dediklərini təkzib etdilər.

Kənd sakinlərinin Ölkə.az-a verdiyi məlumata görə, icra başçısının birinci müavini və kəndin icra nümayəndəsi problemin həll olacağını desə də, ancaq heç bir nəticə yoxdur.

Anaxanım balıq vətəgəsinin sahibi Bəhramla danışdıqlarını və kənd sakinlərinin istəyinin yerinə yetirildiyini desə də, Azadkənd sakinləri Qurbanov Savadxan, Cabbarov Elşad, Cəfərov Cəfər, Səfərov Vahid və Babək Hacıyev bunun yalan olduğunu bildirib.

Babək Hacıyev: "Kəndin icra nümayəndəsi Anaxanım şikayət edənlərdən bir neçəsini çağırıb yanına bildirib ki, problemi həll edəcəyik. Sonra bir neçə nəfəri Saatlı Rayon İcra Hakimiyyətinin birinci müavini İlham Quliyev icra hakimiyyətinə çağırıb deyib ki, şikayətə baxılır, o göl yarılacaq. Ancaq, o göl hələ də yarılmayıb, elə də qalıb. Kəndin qrunt sularının axıdıldığı gölün qarşısının açılmasını istəyirik. O göl, kəndin qrunt sularını çəkirdi. O göl necə satılıbsa, eləcə də geri qaytarılsın. Kəndin qrunt və çıxar suları gölə axır, oradan da Mil Muğan kollektoruna çıxırdı. Gölün qarşısı kəsildikdən sonra gölə axan qrunt və çıxar sular əkin sahələrini məhv edir. Oranı balıq vətəgəsi kimi satan, düşünmür ki, bizim sular hara axacaq?

2014-cü ildə bir hektardan 4 ton taxıl götürmüşük, bu il isə 2 ton. Hamısı gölün qarşısının kəsilməsi ilə bağlıdır. Prezident göstəriş verib ki, əkinə yararlı torpaqların hamısı əkilsin. Bu göl torpaqlarımızı eroziyaya uğradır axı".

Kənd sakinlərinin istəyi gölün qarşısının açılması və oranın əvvəlki vəziyyətə qaytarılmasıdır.

Xatırladırıq ki, Azadkənd sakinlərinin başına bəla olan göl əvvəllər ovçu qobusu olub. Göl İmişli, Saatlı ərazisinin qrunt və çıxar sularını çəkib dənizə aparırdı. Mil-Muğan kollektoru qazılandan sonra göl ləğv olunub. Ondan sonra gölü hissə-hissə bölüb balıq vətəgəsi ediblər. Balıq biznesi ilə məşğul olan Bəhram adlı şəxsin bu ərazidə iki balıq vətəgəsi olsa da o, üstəlik Azadkəndin qrunt və çıxar sularının axdığı gölü də alıb və balıq vətəgəsinə çevirib. Kənd sakinləri öz hesablarına yeni kollektor qazdırıblar ki, su çəkilsin, ancaq Bəhram həmin kollektoru da doldurub.

Mövzuya qayıdacağıq...

Səxavət Məmməd
Ölkə.az