Nəqliyyatın "Smert Tofiqləri"

Şəhərin əhalisinin artması ilə birlikdə artan nəqliyyat vasitələrinin sayı, tıxaclar, mənzilbaşına tez çatmaq istəyi paytaxtın küçələrini maşınların xaotik hərəkət meydanına çevirir.

Nəqliyyat burulğanının tüğyan etdiyi Bakı küçələrində ən çox qayda pozan və qəza törədənlər şəhərdaxii nəqliyyat vasitələridir.

Şəhərin bir yerindən başqa yerinə getmək üçün küçələrə sığmayacaq dərəcədə böyük olan marşurut avtobuslarında az qala günün böyük bir hissəsi sərf edilir. Nəticə etibarı ilə gediləcək məsafənin bir neçə kilometr olmasına baxmayaraq sərnişin saatlarla vaxt sərf edir. Həm də günün istisində, kondisionesiz, baxımsız, çirkli avtobusun salonunda tər tökə-tökə və nəfəsi kəsilə-kəsilə...

Çəkilən əziyyətə bir də sükan arxasında əyləşmiş, üzünün murdar tükünü yenicə tökmüş, "şofer"mi "pulyığan"mı olduğu bəlli olmayan, şalvarının balağını dizlərinə qədər çirmələmiş, bir əli sükanda, bir əli tərdən islanmış mobil telefonunu qulağına sıxaraq, onlarla insanı daşıyan avtobusu əsl şəhər "avtoşu" kimi sürməsi, kəskin əyləc sıxaraq, kəskin qaz verməsi əlavə edilsə, xalqın nələr çəkdiyini təsəvvür etmək bir o qədər də çətin olmaz. 

Şəhərin küçələrinə güclə yerləşən ağır avtobusları "07" kimi idarə edən "Smert Tofiqlər" sərnişinləri həm əsəbi həm də taleyi ilə oynayırlar. Apardığımız xırda bir araşdırma nəticəsində məlum oldu ki, şəhərdaxili nəqliyyat vasitələrini idarə edənlərin 40%-ə yaxınının heç sürücülük vəsiqəsi yoxdur. Əksəriyyəti sürücüərin "pulyığan" köməkçiləridir və günorta sərnişinin az olduğu vaxtlar öz dincəlməyə və ya nahara gedən "şeflərini" əvəz edirlər. Nəqliyyatın intellektual idarə edilməsindən danışan əlaqədar nazirlik və təşkilatların rəhbərlərinin görəsən bu biabırçı vəziyyətdən məlumatları var? Axı hər şeydə ilk sırada insan faktorudur. Birinci növbədə idarə edən şəxsin özünün intellekt səviyyəsidir. Nəqliyyatdan və sürücülükdən, yol hərəkəti qaydalarından və hərəkətin təhlükəsizliyinin təmin olunmasından xəbəri olmayan sürücüyə və ya dispetçerə bahalı, Avropa standartlarına uyğun, elektron tablolu avtobus və dayanacaq nəyə lazımdır? 

Ümumiyyətlə Azərbaycanda nəqliyyat problemini həll etmək üçün ilk növbədə nəqliyyat sistemini idarə edən irili-xırdalı kadrların təhsil və peşəkərlik səviyyəsinə diqqət yetirilməlidir. Əks təqdirdə bu sahədə hər-hansı bir nailiyyət əldə etmək qeyri-mümkünür.

Ölkə.az, Monitorinq şöbəsi