Sabir Rüstəmxanlı: \"İraq və Suriyanın quzeyi türkmənlərin torpağıdır\"

VHP və DAK təşkilatçılığı ilə "Suriya türkmənlərinin son durumu" adlı mətbuat konfransı keçirilib

Konfransda VHP sədri Sabir Rüstəmxanlı, Suriya Türkmən Cəbhəsi İdarə Heyəti üzvləri Nurəddin Türkman və Cüneyd Karaman iştirak edib.

Mətbuat konfransını VHP sədri Sabir Rüstəmxanlı açıb. Sabir Rüstəmxanlı ümumiyyətlə türklərin problemlərindən danışıb. VHP sədri Azərbaycan türklərinin keçdiyi acınacaqlı yoldan, türklərə qarşı haqsızlıqdan danışıb.

Mətbuat konfransından sonra Sabir Rüstəmxanlı Ölkə.Az-a Suriya türkmənlərinin vəziyyəti ilə bağlı açıqlama verib.

Sabir Rüstəmxanlı: "İraqın və Suriyanın quzeyində əslində bir xalq yaşayır. Türkmənlar çox qədimdən o bölgədə, Şam, Hələbdə yerləşiblər, orada yaşayırlar. Dövlətləri, böyük mədəniyyətləri olub. Bu gün Suriyada gedən prosesləri bütün dünya izləyir. Suriyada milyon türkmən var. Onların hüquqları haqqında dünyada danışan yoxdur. Bir neçə yüz min kürd İraqda yaşayır, onların problemi bütün dünya mediasında işıqlandırılır, ancaq milyonlarla türkmənin heç adı çəkilmir. Azərbaycan mətbuatı da bu barədə susur. Kərkükdəki türkmənlərin başına gələnlər hər kəsə bəllidir. İndi Suriyadakı türkmənlar da eyni faciə ilə üz-üzədir. Suriya türkmənlərinin təmsilçisi Azərbaycanda səfərdədir. Onlarla birgə mətbuat konfransı keçirməkdə məqsədimiz odur ki, ictimaiyyətin Suriyada gedən prosesləri o hadisələrin canlı şahidi olan, iştirakçısı olanların dilindən eşitmək imkanı olsun. Belə bir qərara gəlmişik ki, Suriya türkmənlərı ilə Azərbaycanın əlaqələrini genişləndirək".

Səxavət Məmməd
Ölkə.Az