Həftənin icmalı

Soyad sonluqlarınızı dəyişməyə başlayın

24.08.2015

“Azərbaycanda soyad sonluqlarının dəyişdirilməsi ilə bağlı Nazirlər Kabinetinə təqdim olunan sənəd müzakirə olunur".

Ölkə.Az xəbər verir ki, bunu Trend-ə Milli Məclisin Mədəniyyət Komitəsinin sədri Nizami Cəfərov deyib.

N.Cəfərov bildirib ki, sənəd müzakirədə olsa da və bu məsələ ilə əlaqədar hələlik yekun qərar və ya sərəncam olmasa da, hər halda müzakirələrin gedişi cəmiyyətə təsir edib: “Bu baxжmdan hazırda bir sərbəstlik var. Kim istəsə soyadını dəyişdirə, milliləşdirə bilər. Bunun üçün elə bir maneə yoxdur. Amma yeni qərar və ya sərəncam olarsa, bu proses daha da kütləviləşər. Yəni, qərar və ya sərəncam olandan sonra insanlar “ov”, “yev” soyadını dəyişməlidir.

 

Azərbaycanda beş uşaqlı analar nə qədər müavinət alır?

24.08.2015

2014-cü ilin əvvəlindən beşdən çox uşağı olan qadınların 18 yaşına çatmamış hər bir uşağına görə 30 manat məbləğində aylıq sosial müavinət təyin olunaraq ödənilir.

Bu barədə Ölkə.Az-a Əmək və Əhalinin Sosial Müdafiəsi (ƏƏSMN) nazirliyindən bildirilib.

Hazırda nazirlik tərəfindən ölkəmizdə beşdən çox uşağı olan 3 077 nəfər qadının 18 yaşına çatmamış 8 810 nəfər uşağına həmin aylıq sosial müavinət ödənilir.

Bununla yanaşı, 3 və daha çox uşaq doğub 8 yaşınadək, yaxud sağlamlıq imkanları məhdud övladını 8 yaşınadək tərbiyə etmiş qadınlar 57 yaşına çatdıqda onlara aylıq sosial müavinət təyin olunur. Ölkəmizdə 7 612 nəfər qadın bu növ sosial müavinətlə təmin edilir.

 

Təhsil Nazirliyi: 2 mindən çox müəllim işə qəbul edildi

24.08.2015

2015-2016-cı tədris ilində ümumi təhsil müəssisələrinə və peşə liseylərinə müəllimlərin işə qəbulu üzrə müsabiqə başa çatıb.

Təhsil Nazirliyindən verilən məlumata görə, müsabiqədə iştirak etmək üçün 3462 vakant yerə 24437 nəfər ərizə verib.

Onlardan 21795 nəfərin ərizəsi təsdiqlənərək müsabiqənin birinci mərhələsinə - test imtahanlarına buraxılıb.

Müsabiqənin birinci yerləşdirilməsi nəticələrinə görə, 1877 nəfər işə qəbul olunmaq hüququ qazanıb.

 

TQDK: Qeydiyyat müddəti uzadıldı

24.08.2015

Ali təhsil müəssisələrinə I mərhələdə qəbul olan şəxslərin qəbul olduqları təhsil müəssisələrində qeydiyyatının müddəti uzadılıb.

TQDK-nın mətbuat xidmətindən Ölkə.Az-a verilən məlumatına görə, ali təhsil müəssisələrinin bakalavriat səviyyəsinə müsabiqənin I mərhələsində qəbul olan şəxslərin qəbul olduqları ali təhsil müəssisələrində qeydiyyatı 27 avqust saat 17:00-dək uzadılıb.

 

Azərbaycanda əhali üçün su normaları təsdiqləndi

24.08.2015

Azərbaycanda əhalinin təsərrüfat-içməli ehtiyaclarının ödənilməsinə il ərzində xüsusi orta sutkalıq su tələbatı normaları müəyyənləşib.

Dövlət Şəhərsalma və Arxitektura Komitəsinin Kollegiyasının “Su təchizatı. Xarici şəbəkə və qurğular” barədə qərarına əsasən daxili su təchizatı və kanalizasiya sistemləri, yerli su qızdırıcıları və vannası olan binalarda bir nəfər sakin üçün sutkada 160-230 litr (l/sut), daxili su təchizatı və kanalizasiya sistemləri, mərkəzləşdirilmiş isti su təchizatı olan binalarda bir nəfər sakin üçün 239-250 l/sut su nəzərdə tutulmalıdır.

 

"Daily Times": Mehriban Əliyevanın dünya mədəniyyətinin inkişafına verdiyi töhfələr əvəzolunmazdır

25.08.2015

Pakistanın milyonlarla oxucusu olan nüfuzlu "Daily Times" qəzetinin 25.08.2015-ci il tarixli buraxılışında, qəzetin İslamabad baş ofisinin rəhbəri, tanınmış jurnalist Dure Nəcəf Zaidinin "Hilal-e-Pakistan ordeninə layiq görülmüş Mehriban Əliyeva insanlığın xidmətində" adlı məqaləsi dərc edilib.

Bu barədə Ölkə.Az-a Heydər Əliyev Fondunun mətbuat xidmətindən bildirilib.

Qeyd olunub ki, "11.02.2015-ci il tarixində Azərbaycanın birinci xanımı, Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban Əliyeva Pakistanın "Hila-e-Pakistan" ali ordeni ilə təltif edilib. İlk dəfədir ki, xarici ölkənin birinci xanımı bu ali ordenə layiq görülmüşdir" sözləri ilə başlayan məqalədə Mehriban Əliyevanın tanınmış ziyalı ailəsində böyüdüyü, valideynlərindən insan dəyərlərinə hörmətlə yanaşmağı, poeziya, mədəniyyət və musiqini sevməyi öyrəndiyi vurğulanıb.

 

Hüquq müdafiəçiləri Azərbaycanda saxlanılan erməni hərbçi ilə görüşüblər

25.08.2015

İşgəncələrə Qarşı Azərbaycan Komitəsinin sədri, hüquq müdafiəçisi Elçin Behbudov və müavini Elçin Şirinov Azərbaycana könüllü təslim olmuş erməni hərbçi Andranik Araratoviç Qriqoryanla görüşüblər.

Ölkə.Az xəbər verir ki,bu barədə APA-ya məlumat verən E. Behbudov deyib ki, A. Qriqoryanın saxlanma şəraitindən və ona qarşı münasibətdən şikayəti yoxdur: “Onunla görüşüb söhbət etdik. Saxlanma şəraitindən, ona qarşı münasibətdən hər hansı narazılığı olub-olmamasını soruşdum. Heç bir şikayəti yoxdur, razılığını bildirdi” .

 

Nazir sektor müdirini işdən çıxartdı

25.08.2015

Təhsil Nazirliyinin diplomların tanınması (nostrifikasiyası) sektorunun müdiri Nəzakət Hacıyeva işdən çıxarılıb.

Ölkə.Az modern.az-a istinadən xəbər verir ki, N.Hacıyevanın vəzifəsindən kənarlaşdırılmasına səbəb qeyri-qanuni əməllərini davam etdirməsi, diploma layiq olmayan şəxslərin diplomlarının “tanınması”na şərait yaratması olub.

Nazirlikdə onun işində aşkarlanan pozuntularla bağlı hüquq-mühafizə orqanlarına müraciət edilməsi məsələsi də müzakirə olunub. Lakin onun zərif cinsin nümayəndəsi olduğunu nəzərə alan nazir xanım Hacıyevanı yalnız işdən çıxarmaqla kifayətlənib.

 

ATƏT-in monitorinq qrupu Qazaxda sakinlərin iradları ilə üzləşiblər

25.08.2015

ATƏT-in nümayəndələri Qazaxda kənd sakinlərinin iradlarını dinləməli olub.

Müdafiə Nazirliyinin mətbuat xidmətindən Ölkə.Az-a bildiriblər ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq avqustun 25-də Azərbaycan Respublikasının Qazax rayonunun Məzəm kəndi yaxınlığındakı qoşunların təmas xəttində keçirilən monitorinq insidentsiz başa çatıb.

Monitorinqi Azərbaycan tərəfdən ATƏT-in fəaliyyətdə olan sədrinin şəxsi nümayəndəsinin səhra köməkçiləri Jiri Aberle və Piter Svedberq keçiriblər. Təmas xəttinin qarşı tərəfində isə monitorinqə ATƏT-in fəaliyyətdə olan sədrinin şəxsi nümayəndəsinin səhra köməkçiləri Saymon Tiller və Yevgeni Şarov nəzarət ediblər.

 

TQDK dərsliklərdə növbəti monitorinq aparır

25.08.2015

Oktyabr ayında Tələbə Qəbulu üzrə Dövlət Komissiyası (TQDK) dərsliklərin növbəti monitorinqini keçirəcək.

Ölkə.Az xəbər verir ki, bunu Trend-ə açıqlamasında qurumun mətbuat katibi Elnur Nağıyev deyib.

Onun sözlərinə görə, dərsliklərin monitorinqinin bir hissəsi artıq başa çatdırılıb. Monitorinqlərin nəticələrini Təhsil Nazirliyinə göndərdiklərini deyən TQDK rəsmisi qeyd edib ki, hazırda bu məsələyə nazirlikdə baxılır: “Dərsliklər hər il təkrar çap olunmur. Ona görə də hər hansı irad, təklif və rəylər olanda biz onu Təhsil Nazirliyinə təqdim edirik. Bu məsələlər də növbəti mərhələdə Təhsil Nazirliyi tərəfindən baxılır. Bizdə dərsliklərin növbəti monitorinqi oktyabr ayının əvvəllərində başlayacaq. TQDK-nın nəzdində dərs vəsaitlərinin monitorinq və qiymətləndirmə xüsusi şöbəsi və ekspert şurası fəaliyyət göstərir. Monitorinqlər həmin strukturlar tərəfindən aparılır”.

 

Yol-patrul xidməti inspektoru olmaq istəyənlər üçün fürsət

25.08.2015

Daxili İşlər Nazirliyi vakant yol-patrul xidməti inspektoru vəzifələrinə xidmətə qəbul elan edib.

Daxili İşlər Nazirliyinin (DİN) mətbuat xidmətindən Ölkə.Az-a verilən məlumata görə, daxili işlər naziri, general-polkovnik Ramil Usubov tərəfindən Baş Dövlət Yol Polisi İdarəsinin Yol Patrul Xidməti Alayının və Bakı şəhər Baş Polis İdarəsinin Dövlət Yol Polisi İdarəsinin yol-patrul xidməti inspektoru vəzifələrində xidmətə qəbulla bağlı keçiriləcək sıra baxışında iştirak etmək istəyən şəxslər 2015-ci il sentyabr ayının 1-də saat 9.00-da şəxsiyyət vəsiqələri ilə birlikdə Bakı şəhəri Nobel prospekti 69 ünvanında yerləşən Çevik Polis Alayına gələ bilərlər. Sıra baxışında yalnız Bakı şəhərində yaşayış yeri üzrə daimi qeydiyyatda olan və yaşayan, aşağıdakı şərtlərə cavab verən şəxslər iştirak edə bilərlər:

 

Prezidentin ailəsində özəl gün

26.08.2015

Bu gün Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban Əliyevanın ad günüdür.

Mehriban Əliyeva 1964-cü ildə, Bakıda tanınmış ailədə anadan olub. Atası Azərbaycan Milli Elmlər Akademiyasının akademiki, professor, Milli Aviasiya Akademiyasının rektoru Arif Mir Cəlal oğlu Paşayev, anası şərqşünas alim Aida Nəsir qızı İmanquliyevadır.

Mehriban Əliyeva 1982-ci ildə Bakıda 23 saylı orta məktəbi qızıl medalla bitirib və Nəriman Nərimanov adına Azərbaycan Dövlət Tibb İnstitutunun müalicə-profilaktika fakültəsinə daxil olub. 1988-ci ildə İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib. 1988-1992-ci illərdə akademik Krasnovun rəhbərliyi altında Moskva Göz Xəstəlikləri Elmi-Tədqiqat İnstitutunda işləyib.

Mehriban Əliyeva Heydər Əliyev Fonduna onun yaradıldığı gündən - 10 may 2004-cü ildən rəhbərlik edir. O, 2005-ci və 2010-cu illərdə Azərbaycan parlamentinin deputatı seçilib. Mehriban Əliyeva hakim Yeni Azərbaycan Partiyasının 2013-cü il iyunun 7-də keçirilən V qurultayında partiyanın sədr müavini seçilib.

 

Parisdə keçiriləcək "Azərbaycan kəndi" tədbiri erməniləri təşvişə saldı

26.08.2015

Fransanın erməni təşkilatları ölkə rəhbərliyinə müraciət ediblər.

Ölkə.az xəbər verir ki, 3 sentyabr tarixində Paris meriyasının 1-ci dairəsində "Pale-Royalın ürəyində Azərbaycan kəndi" tədbirinin keçiriləcəyi erməniləri bərk təşvişə salıb.

Azərbaycanla Fransanın arasında getdikcə möhkəmlənən ikitərəfli əlaqələri gözü götürməyən ermənilər mütəmadi olaraq bu əlaqələri pozmaq cəhdləri edirlər. Bu dəfə ermənilərin şivəninə səbəb isə "Pale-Royalın ürəyində Azərbaycan kəndi" tədbiri olub. Tədbirdə Azərbaycan mədəniyyətinin, mətbəxinin, musiqisinin tanıdılacağı, Azərbaycan haqqında fransız dilində kitablar paylanacağı, xalçaçılıqdan tutmuş nəqqaşlığa qədər Azərbaycan incəsənətinin sərgilənəcəyi bildirilir. Tədbirə Fransanın bir çox siyasətçiləri, ictimai xadimləri, ziyalıları, iş adamlarının qatılacağı gözlənilir. Həmçinin tədbirdə Fransadakı diplomatik korpusun nümayəndələri də iştirak edəcək.

 

“Azərişıq”dan əhaliyə xəbərdarlıq etdi

26.08.2015

“Azərişıq” ASC-nin fəaliyyəti dövründə debütor borcu yaranmış abonentlərin elektrik enerjisi təchizatı 28 avqust 2015-ci il tarixində, saat 12:00-dan etibarən müvafiq qanunvericiliyə uyğun qeyd-şərtsiz və fərdi qaydada dayandırılacaq.

Bu barədə Ölkə.Az-a “Azərişıq”dan bildiriblər.

Məlumata görə, elektrik enerjisindən istifadə ilə bağlı yaranmış borca görə enerji təchizatı dayandırılmış abonentlərin “Borc Ödənilmədən Şəbəkəyə Özbaşına Qoşulma”sı elektrik enerjisinin talanması və elektrik enerjisindən qanunsuz istifadə sayıldığından, belə hallara yol vermiş şəxslərin Azərbaycan Respublikası Qanunvericiliyinə uyğun “Azərişıq” ASC tərəfindən ciddi tədbirlər görüləcək.

 

Deputatın anasına vəzifə verildi

26.08.2015

Millət vəkili Ceyhun Osmanlının anasına vəzifə verilib.

Təhsil naziri Mikayıl Cabbarovun əmri ilə Xuraman Osmanova Nərimanov rayonunda yerləşən Pişəvəri adına Humanitar Fənlər Gimnaziyasına direktor təyin olunub.

Qeyd edək ki, X. Osmanova bundan əvvəl Təhsil Nazirliyinin nəzdində fəaliyyət göstərən Təhsildə İnnovasiyalar Mərkəzinin direktor müavini vəzifəsində işləyib.

 

“National Geographic Azərbaycan” jurnalı beynəlxalq sərgidə iştirak edəcək

26.08.2015

2015-ci il, 16-18 sentyabrda IV Bakı Beynəlxalq Kitab Sərgi-Yarmarkası keçiriləcəkdir.

Ölkə.Az xəbər verir ki, Bakı İdman Sarayında (Əl Oyunları İdman Sarayı) keçiriləcək tədbirin təşkilatçısı Azərbaycan Respublikası Mədəniyyət və Turizm Nazirliyidir.

Sərgi-yarmarkada xarici dövlətlərin nəşriyyat və müəllifləri iştirak edəcək, müxtəlif nəşrlərin nümayişi və satışı həyata keçiriləcəkdir.

“National Geographic Azərbaycan” jurnalının da sərgi-yarmarkada iştirakı planlaşdırılır. Ziyarətçilər bir ildir ki, Azərbaycanda fəaliyyət göstərən jurnal barədə geniş məlumat əldə edəcək, o cümlədən dərginin əhatə etdiyi mövzular, fotoşəkillər və yerli rubrikalarla yaxından tanış olacaqlar.

 

33 mindən çox adam nikah üçün tibbi müayinədən keçib

26.08.2015

“Nikaha daxil olmaq istəyən şəxslərin tibbi müayinədən keçmə Qaydası” na uyğun olaraq 1 iyun 2015-ci il tarixindən bu günə kimi nikaha daxil olmaq istəyən 33412 nəfər tibbi müayinədən keçib.

Səhiyyə Nazirliyinin Mətbuat xidmətindən Ölkə.Az-a verilən məlumata əsasən, ümumilikdə müayinədən keçən və nikaha daxil olmaq istəyən şəxslərin əksəriyyətinin sağlamlıq durumunun qənaətbəxş olduğu aşkar olunub.

Qeyd edək ki, “Ailə Məcəlləsində dəyişikliklərin edilməsi haqqında” Qanunun tətbiqi ilə bağlı bəzi normativ hüquqi aktları təsdiq ilə əlaqədar, 1 iyun 2015-ci il tarixindən etibarən nigaha daxil olmaq istəyən vətəndaşlar mütləq tibbi müayinədən keçməlidirlər.

 

Əcnəbilərin nəqliyyat vasitələrinin qeydiyyata alınması qaydaları dəyişdi

27.08.2015

Azərbaycanda diplomatik nümayəndəliklərin, beynəlxalq təşkilatların nəqliyyat vasitələrinin qeydiyyata alınması ilə bağlı dəyişikliklər edilib.

Ölkə.Az xəbər verir ki, Nazirlər Kabinetinin qərarı ilə “Mexaniki nəqliyyat vasitələrinin və onların qoşqularının müəyyən edilmiş qaydada dövlət qeydiyyatından keçirilməsi və dövlət qeydiyyatı üzrə uçota alınması haqqında Əsasnamə”də dəyişikliklər edilib.

Əsasnaməyə edilən əlavəyə görə, Azərbaycan Respublikasının ərazisində müvəqqəti və daimi yaşayan əcnəbilərin və vətəndaşlığı olmayan şəxslərin, habelə xarici hüquqi şəxslərin nümayəndəlik və filiallarının nəqliyyat vasitələri ümumi əsaslarla qeydiyyata alınır.

 

"Baş nazirin səhhəti haqqında gəzən söz-söhbətlər əsassızdır" — Mətbuat xidməti

27.08.2015

Şübhəsiz, baş nazir bu proseslərin üstündədir. Prezidentin tapşırığı ilə bütün məsələləri nəzarətdə saxlayır, səhərdən-axşamadək iş başındadır. Başqa nə iş ola bilər ki, əlbəttə, bu işlə məşğuldur.

Ölkə.Az xəbər verir ki, bunu “Yeni Müsavat”a müsahibəsində Nazirlər Kabinetinin mətbuat xidmətinin rəhbəri Akif Əli neftin qiymətinin düşməsi fonunda baş verən iqtisadi proseslərlə bağlı sualı cavablandırarkən deyib.

Akif Əli bildirib ki, Artur Rasizadənin işə çıxmaması haqda deyilənlər yalandır:

“Mən o zaman da deyirdim, indi də deyirəm: o jurnalistlər ki, yazırdılar Artur Rəsizadə işə çıxmır, səhhəti filandır, mən onlara deyirdim ki, səhər saat 9-a 15 dəqiqə qalmış Nazirlər Kabinetinin qarşısına gəlin və baş nazirin kartejinin içəri girdiyini özünüz görün. Axşam da saat 7-də işdən getdiyi vaxtdır. Lakin gəlmədilər, baxmadılar. “Xəstədir”, “işə gəlmir”, “yoxdur” deyilir ki, bunların hamısı boş söhbətdərdir.

 

Azərbaycan WhatsApp və Facebookla danışıqlar aparır

27.08.2015

Azərbaycan Rabitə və Yüksək Texnologiyalar Nazirliyi internet messencerlər (Viber, WhatsApp, Skype və başqaları) və sosial şəbəkələrin fəaliyyətini serifikatlaşdıracaq.

Ölkə.Az Trend-ə istinadən xəbər verir, bu barədə jurnalistlərə rabitə və yüksək texnologiyalar naziri Əli Abbasov deyib.

O bildirib ki, artıq şirkətlərlə danışıqlar başlayıb və onların əksəriyyəti bu addımı müsbət qarşılayıb.

 

Azərbaycanda psixi xəstələrin sayı azalır

27.08.2015

Azərbaycanda 2014-cü ildə ilk dəfə qoyulan diaqnozla qeydə alınan psixi xəstələrin sayı 4 276 nəfərdir.

Ölkə.Az xəbər verir ki, bu barədə Dövlət Statistika Komitəsinin “Azərbaycanda səhiyyə, sosial təminat və mənzil şəraiti” adlı rəsmi statistik məcmuəsində məlumat verilib.

Statistik rəqəmlər ötən il Azərbaycanda psixi xəstələrin sayında azalma müşahidə olunduğunu göstərir.

Belə ki, ilk dəfə qoyulan diaqnozla qeydə alınan psixi xəstələrin sayı 2000-ci ildə 6 907 nəfər, 2005-ci ildə 5 621 nəfər, 2010-cu ildə 4 984 nəfər, 2012-ci ildə 4 948 nəfər, 2013-cü ildə isə 4 904 nəfər olub.

 

 

Səhiyyə Nazirliyi: Dərman bazarında qıtlıq yoxdur

28.08.2015

“Son günlər bəzi kütləvi informasiya vasitələrində "Akineton", "Fenazepam" və "Alflutop" adlı dərmanların apteklərdə tapılmaması barədə məlumatlar yayılmaqdadır. Bununla əlaqədar bildiririk ki, bu dərmanlar Tarif Şurası tərəfindən qiymətləri tənzimlənmiş, habelə növbəti etapda qiymətlərinin tənzimlənməsi nəzərdə tutulmuş təsiredici maddəyə malik dərmanların siyahısına daxil deyildir”.

Ölkə.Az-ın məlumatına görə, bu müraciətlə Səhiyyə Nazirliyi çıxış edib. Müraciətdə bildirilir ki, "Akineton" adlı dərman vasitəsi Azərbaycanda istehsalçı şirkət tərəfindən dövlət qeydiyyatından keçməyib və ona görə də bu dərman vasitəsini istehlakçılara almamaq tövsiyə olunur: “Amma müalicə həkiminin məsləhəti ilə bu preparatın alternativi kimi dövlət qeydiyyatına alınmış və Parkinson xəstəliyinin müalicəsində effektivliyi və təhlükəsizliyi təsdiqlənmiş Trihexyphenidyl, Carbidopa və Levadopa tərkibli dərman vasitələrindən istifadə etmək olar. Fenazepam preparatı psixotrop dərman vasitəsi olduğuna görə onun aptekdən satışı yalnız müalicə həkiminin təyinatı əsasında reseptlə aparılır.

 

Dövlət qulluğunda işləmək istəyənlər üçün növbəti imkan

28.08.2015

Azərbaycanda vakant dövlət qulluğu vəzifələrinin tutulması üçün müsabiqə elan edilib.

Azərbaycan Respublikasının Prezidenti yanında Dövlət Qulluğu Məsələləri üzrə Komissiyadan Ölkə.Az-a verilən məlumata görə, Komissiya 28 avqust 2015-ci il tarixdən 30 dövlət orqanında inzibati vəzifələrin beşinci - yeddinci təsnifatlarına uyğun olan 130 vakant vəzifənin tutulması üçün müsabiqə elan edib.

Müsabiqəyə çıxarılan vakant dövlət qulluğu vəzifələrinin 65-i mərkəzi icra hakimiyyəti orqanlarının mərkəzi aparatları və yerli təşkilatlarında, 65-i isə apellyasiya və birinci instansiya məhkəmə orqanlarının aparatlarındadır.

 

25 ölkənin pöaytaxtının polis rəisləri Bakıda toplandılar

28.08.2015

Avqustun 28-də Daxili İşlər Nazirliyinin “Xəzri” İstirahət və Sağlamlıq Mərkəzində Avropa Paytaxt Polis Rəislərinin növbəti 37-ci konfransı öz işinə başlayıb.

DİN-dən Ölkə.Az-a verilən məlumata görə, iyirmi beş ölkədən 70-ə yaxın nümayəndənin qatıldığı konfransda Azərbaycan Respublikasının daxili işlər naziri, general-polkovnik Ramil Usubov və Bakı Şəhər İcra Hakimiyyətinin başçısı Hacıbala Abutalıbov iştirak ediblər.

Tədbiri giriş sözü ilə açan daxili işlər naziri qonaqları salamlayıb, paytaxt şəhərlərində təhlükəsizliyin təmin olunmasına, cinayətkarlığa qarşı mübarizənin effektivliyinin artırılmasına həsr olunmuş bu mötəbər tədbirin gələcək əməkdaşlığın inkişafına yeni imkanlar açması baxımından böyük əhəmiyyət kəsb etdiyini bildirib.

 

Azərbaycanın artilleriya qoşunları təlim keçirdi

28.08.2015

Raket və Artilleriya Qoşunlarının döyüş atışlı təlimləri keçirilib.

Müdafiə Nazirliyinin mətbuat xidmətindən Ölkə.Az-a bildiriblər ki, Müdafiə naziri general-polkovnik Zakir Həsənovun təsdiq etdiyi döyüş hazırlığı planına əsasən Raket və Artilleriya Qoşunlarının hərbi hissə və birləşmələri praktiki döyüş atışlı təlimlər keçirib.

Təlim mərkəzində 203 millimetrlik “Pion” özüyeriyən artilleriya qurğularının tətbiqi ilə divizion taktiki təlimi, eləcə də artilleriya birləşmələri ilə raket zərbələrinin və atəşin idarə edilməsi icra olunub.

Taktiki təlimlərə Hərbi Hava Qüvvələrinin pilotsuz uçan aparatları (PUA) da cəlb edilib.

 

Ziya Məmmədov vətəndaşları qəbul etdi

28.08.2015

Azərbaycan Prezidenti İlham Əliyevin göstəriş və tövsiyələrinə müvafiq olaraq, nəqliyyat naziri Ziya Məmmədov avqustun 28-də Qəbələdə növbəti qəbul keçirib.

Ölkə.Az xəbər verir ki, nəqliyyat naziri Z. Məmmədov Qəbələ, İsmayıllı və Ağsu rayonlarından olan vətəndaşları qəbul edərək onların müraciətlərini, şikayət və təkliflərini dinləyib.

Qeyd edək ki, vətəndaşların müraciətləri əsasən avtomobil yollarının təmiri və yenidən qurulması, yeni avtobus marşrutlarının açılması, dağ çayları üzərində körpülərin salınması, işə qəbul və digər məsələlərlə bağlı olub.

 

Hüquq müdafiəçiləri MTN-nin istintaq təcridxanasında monitorinq keçiriblər

28.08.2015

İşgəncələrə Qarşı Azərbaycan Komitəsinin sədri, hüquq müdafiəçisi Elçin Behbudov və müavini Elçin Şirinov Milli Təhlükəsizlik Nazirliyinin (MTN) istintaq təcridxanasında monitorinq keçiriblər.

Ölkə.Az xəbər verir ki, bu barədə APA-ya məlumat verən E. Behbudov bildirib ki, monitorinq zamanı saxlanılan şəxslərə görüşüblər: “Orada saxlanılan Elmir İsmayılovla görüşdük. Gürcüstandan Azərbaycana dövlət nömrə nişanlarını qanunsuz olaraq dəyişib avtomobil gətirməkdə təqsirləndirilir. Özünü günahkar bilir. Daha sonra orada saxlanılan Natəvan Məmmədzadə ilə görüşdük. O, İrandan Azərbaycan psixotrop dərman vasitələri keçirmək istədiyi üçün saxlanılıb. Görüşdüyümüz şəxslərin saxlanma şəraitindən və onlara qarşı münasibətdən şikayətləri yoxdur”.

 

Öldürülən Aytacın anası və bacısı məhkəmədə ifadə verdi

28.08.2015

Bu gün Bakı Ağır Cinayətlər Məhkəməsində sevgilisi Aytac Babayevanı öldürməkdə təqsirləndirilən 1995-ci il təvəllüdlü İzzət Hüseynovun cinayət işi üzrə növbəti məhkəmə iclası keçirilib

Ölkə.Az xəbər verir ki, qafqazinfo-nun prosesdə iştirak edən əməkdaşının verdiyi məlumata görə, hakim Tamella Nəsrullayevanın sədrliyi ilə keçirilən iclasda şahid ifadələri dinlənilib.

Aytacın bacısı, 1993-cü il təvəllüdlü Ayşən Babayeva ifadəsində bildirib ki, bacısı doqquzuncu sinifdə oxuyanda İzzətlə sevgili olub

 

Parisdə “Azərbaycan şəhərciyi”

28.08.2015

Heydər Əliyev Fondu tərəfindən avqustun 29-dan Parisin Pale Royal meydanında “Azərbaycan şəhərciyi” təşkil olunacaq

Fonddan Ölkə.Az-a bildiriblər ki, “Azərbaycan Parisin ürəyində” adlanan şəhərcik sentyabrın 9-dək fəaliyyət göstərəcək.

Parisdə artıq ikinci dəfə təşkil olunan “Azərbaycan şəhərciyi”ndə ölkənin tarixi, mədəniyyəti, xalq sənətkarlığı, adət-ənənələri, milli mətbəxi təqdim olunacaq.

Milyonlarla ziyarətçisi olan Luvr muzeyinin qarşısındakı məşhur Pale Royal meydanında yaradılan “Azərbaycan şəhərciyi”ndəki bölmələrin hər biri ölkəmizi hərtərəfli tanımağa, xalqların bir-birinə daha da yaxınlaşmasına geniş imkanlar yaradacaq.

Şəhərcikdə Azərbaycanın xalçaçılıq, dulusçuluq və digər sənətkarlıq məmulatlarının, milli geyim və musiqi alətlərimizin yer aldığı sərgi təşkil ediləcək. Qonaqlar bu sənət nümunələrinin yaradılma prosesini isə “Emalatxana” bölməsində yaxından izləyə biləcəklər. Ölkəmizi təmsil edən ustalar mis qab, şəbəkə, xalça və digər sənət nümunələri hazırlayaraq Azərbaycanın qədim və zəngin sənətkarlıq ənənələrini, onların incəliklərini qonaqlara təqdim edəcəklər.

 

Allahşükür Paşazadə: “Azərbaycan dünyada multikulturalizm mərkəzi kimi tanınır"

28.08.2015

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə Bakıda səfərdə olan Əl-Cəzirə Araşdırmalar Mərkəzinin baş tədqiqatçısı və İran məsələləri üzrə Əl-Cəzirə Televiziyasının müşaviri Fatima Alsmadini qəbul edib.

QMİ-nin mətbuat xidmətindən Ölkə.Az-a verilən məlumata görə, Şeyxülislam Azərbaycanda İslam dininin yayılması, xalqımızın islam mədəniyyəti xəzinəsinə verdiyi töhfələr barədə, sovetlər dönəmində ateizm rejimi dövründə mənəvi sahədə yaşanmış çətinliklər, habelə müstəqil Azərbaycanda dini-mənəvi irsimizin dirçəldilməsi yönündə görülən işlər barədə geniş məlumat verib.
Şeyxülislam Azərbaycanda dövlət-din münasibətlərinin yüksək səviyyədə olmasını vurğulayıb: “Ali mənəviyyat mənbəyimiz olan dinimizə ulu öndər Heydər Əliyevin diqqət və qayğısı yüksək olub. Məhz ümummilli liderimiz Heydər Əliyev müstəqilliyinə qovuşmuş Azərbaycanda dini mədəniyyətin, tolerantlıq və dinlərarası dialoqun proqram əsaslarının təməlini qoydu. Məscid, kilsə və sinaqoqların böyuk qayğı ilə tikilib bərpa olunduğu, bütün ənənəvi dini icmaların maddi-mənəvi cəhətdən dəstəkləndiyi Azərbaycanda multikultural həyat tərzi, dinlər və məzhəblər arası müstəvidə ehtiramlı münasibət hökm sürür”.

 

Azərbaycanı quraqlıq təhlükəsi gözləyir

28.08.2015

Beynəlxalq Təbii Resurslar İnstitutu (WRI) təşkilatı 2040-cı ildə quraqlıqla üzləşəcək ölkələrin siyahısını tərtib edib.

33 ölkədən ibarət siyahıda Azərbaycan 4,69 balla 18-ci yerdədir.

Təşkilatın ekspertlərinin fikrinə görə, 2040-cı ilə qədər dünya ölkələrinin 1/5-də az sululuq problemi yaranacaq. Belə ki, iqlim dəyişikliyi yağıntıların dövrülüyünü pozur, əhalinin artması isə suya tələbatı artırır.

Azərbaycanın qonşuları İran (4,91 balla 13-cü yer) və Ermənistan da (4,60 balla 22-ci yer) adıçəkilən siyahıda yer alıb.

Siyahıda maksimal 5 balı Qatar, Bəhreyn, San-Marino, Fələstin, BƏƏ, Sinqapur və Küveyt alıb. Bu ölkələrdə vəziyyət daha da təhlükəli hesab olunur.

 

Telefon borcunu onlayn öyrənmək olar

28.08.2015

Artıq rabitə xidmətlərinə görə borcun olub-olmaması haqqında arayışı əldə etmək üçün Telefon qovşaqlarına müraciət etməyə ehtiyac yoxdur.

Ölkə.Az Rabitə və Yüksək Texnologiyalar Nazirliyinə istinadən xəbər verir ki, “Elektron hökumət” portalının (//www.e-gov.az) təqdim etdiyi “Rabitə xidmətlərinə görə borcun olmaması barədə arayış” elektron xidmətindən istifadə edərək rabitə xidmətlərinə görə borc barədə arayışınızı onlayn formalaşdıra bilərsiniz.

Nazirlik bildirib ki, Bunun üçün “Elektron hökumət” portalına girişinizin (kod/parol) olması kifayətdir.

 

Dünyanın ən emosional ölkəsi bəlli oldu

28.08.2015

Amerika İctimai Rəy İnstitutu “Gallup” dünyanın ən emosional ölkəsinin Boliviya olduğunu bildirib.

Müvafiq reytinq təşkilatın saytında dərc olunub. Ən ekspressiv dövlətlərin üçlüyündə Latın Amerikasının nümayəndələri yer alıb. Postsovet məkanın ölkələri isə, əksinə, siyahının sonunda qərarlaşıb.

“Gallup”un ekspertləri dünyanın 148 ölkəsinin əhalisi arasında sorğu keçirib. İştirakçılar hiddət, kədər, həyəcan, sevinc kimi emosiyaların yaranma tezliyi barədə sualları cavablandırıb.

Boliviyadan başqa ilk onluğa El-Salvador, Ekvador, Flippin, Nikaraqua, Qvatemala, İraq, Kamboca, Kolumbiya və Kosta-Rika düşüb.

 

 

Çingiz Mustafayev — 55

29.08.2015

Bu gün Azərbaycanın Milli Qəhrəmanı, mərhum telereportyor Çingiz Mustafayevin 55 yaşı tamam olur. 1960-cı il bu günündə Rusiyanın Həştərxan vilayətinin Vladimir rayonunun Kapustin-Yar qəsəbəsində Fuad Mustafayevin və Naxış Mustafayevanın ailəsində anadan olan Çingiz dörd yaşında ailəsi ilə Bakı şəhərinə köçür.

Atası Çingizi hərbçi görmək istədiyindən onu Cəmşid Naxçıvanski adına hərbi liseyə yollamışdı. Üçüncü sinifdən onuncu sinfə kimi burada təhsil alan Mustafayev 1970-ci illərdə SSRİ-də və Azərbaycanda ilk disko-klubun yaradıcısı olub. O, Azərbaycanın ilk DJ-i kimi tanınır. 1981-ci ilin sentyabr ayında, Mustafayevin başçılığı altında, 12 nəfərdən "light DJ" və "texnik"lərdən ibarət olan “3M” adlı qrup yaratmışdır.

1977-83-cü illərdə Azərbaycan Tibb İnstitutunda təhsil alan qəhrəman 1990-cı illərdə Azərbaycan televiziyasında "İmpromptu", "Cümə axşamı" verlişlərinin, "Gənclik" estrada tamaşasının və "Ozan" rok qrupunun yaradıcısı olub.

1990-cı il 20 Yanvar hadisələri zamanı, Mustafayev klinikanı terapevt mərkəzi kimi istifadə edirdi. 1991-ci ilin noyabr ayından jurnalist və Azərbaycan Dövlət Televiziyasında reportyor kimi fəaliyyət göstərmişdir. Ancaq Azərbaycan miqyasında fəaliyyət göstərməklə kifayətlənmədi. Onun reportajları informasiya blokadasında olan Azərbaycan haqqında gerçəkliklərin Amerika və Avropanın aparıcı teleagentlikləri və televiziyalarına yol tapdı. Dövlət televiziyasında mövcud olan senzura və ciddi yasaqlar Mustafayevi geniş fəaliyyət imkanlarından məhrum edirdi. Ona görə də Çingiz əlahiddə olaraq 215 kl studiyası kimi muxtar qurumun yaradılmasının təşəbbüskarı və yaradıcısı oldu. Onun reportajları bir qayda olaraq cəbhədən olduğundan, bir çox tamaşaçılar 215 kl studiyasını məhz müharibədən məlumat verən telequrum kimi qəbul edirdilər.

Ölkənin döyüş gedən bütün bölgələrindən operativ xəbərlər, ayrı-ayrı əsgərlər haqqında xüsusi reportajlar və bütün bunlarla yanaşı Azərbaycanda gedən siyasi proseslər barədə ətraflı informasiyalar onun müəllif yaradıcılığı idi.

1992-ci ilin iyun ayının 15-də Xocalı rayonunun Naxçıvanlı kəndində çəkiliş zamanı aldığı mərmi qəlpəsindən həyatını itirmişdir. Vahid Mustafayevin sözlərinə görə Çingiz “ABC News” üçün material hazırlayırdı və yaranan çətin vəziyyətə baxmayaraq həmin hücumu çəkdi. Minaatandan atəş zamanı Çingiz qəlpələrdən ağır yaralandı, onun sağ ayağının bud sümüyündən arterial damarı zədələndi və o, sürətli qan axmasından döyüş meydanında dünyasını dəyişdi. Lakin Çingiz Mustafayevin kamerası çəkməkdə davam edirdi.

 

AvtoFM-lə yeni mövsümə!

29.08.2015

İki ilə yaxındır ki, fəaliyyət göstərən AvtoFM 107.7 radiosu dinləyicilərə müxtəlif səpkili proqramlar təqdim edir. Yeni mövsümdən isə radio efir daha maraqlı və rəngarəng layihələrlə onların görüşünə gələcək. Bildirək ki, radionun yaradılmasında əsas məqsəd vətəndaşları yollardakı vəziyyətlə bağlı operativ məlumatlandırmaq, Nəqliyyatın İntellektual İdarəetmə Mərkəzindən təqdim edilən informasiyanı, ictimaiyyətə çatdırmaqdan ibarətdir.

Nəqliyyatın İntellektual İdarəetmə Mərkəzinin nəzdində fəaliyyət göstərən radionun baş koordinatoru Rövşən Həsənov yeni mövsümdə baş verəcək yeniliklər barədə danışdı. O bildirdi ki, yeni mövsümdən Fərid Rzayev, Cavid Nemətzadə və Ülviyyə Ağayevanın təqdimatında fərqli formatda həftə içi beş gün səhər saat 08:00-dan 11:00-a kimi efirə gedəcək əyləncə və informasiya xarakterli “Şirin Çay” verilişində müxtəlif rubrikalar, dinləyicilərə ötən gün ərzində dünyada baş verən maraqlı hadisələr, faktlar, musiqi və mədəniyyət aləmindən olan yeniliklər təqdim olunacaq. Məzmun və fərqlilik baxımından dinləyicinin maraqlarına cavab verən rubrikalar əsasən informasiya yüklüdür. Rubrikalarla yanaşı veriliş boyunca dünya çartları pillələrində yer alan musiqilər də səsləndiriləcək.

 

Telekanalların monitorinqinə başlanılır

29.08.2015

Azərbaycanın teleradio kanallarında reklam pozuntuları azalıb.

Ölkə.Az xəbər verir ki, bunu Trend-ə açıqlamasında Milli Televiziya və Radio Şurasının Monitorinq şöbəsinin müdiri Təvəkkül Dadaşov deyib.

Onun sözlərinə görə, hazırda "Reklam haqqında qanun"un 21-ci maddəsinin tələblərinə uyğun olaraq qaçan sətirlə verilən reklamların xüsusi təqdim olunma qaydası hazırlanır.

Reklam pozuntuları ilə yanaşı efirdəki digər problemlərin də azaldığını qeyd edən T.Dadaşov vurğuladı ki, buna baxmayaraq təmsil etdiyi qurum mütəmadi monitorinqlər aparır

 

 

İctimai Televiziya on yaşını qeyd edir

29.08.2015

İctimai Televiziyanın (İTV) fəaliyyətə başlamasının 10 ili tamam olur.

Bu münasibətlə avqustun 28-də Müslüm Maqomayev adına Azərbaycan Dövlət Filarmoniyasında təntənəli yubiley gecəsi keçirilib.

AZƏRTAC xəbər verir ki, tədbirdə dövlət və hökumət rəsmiləri, Milli Məclisin deputatları, tanınmış incəsənət və mədəniyyət xadimləri, ictimaiyyət nümayəndələri iştirak ediblər.

Telekanalın 10 illik fəaliyyətini əks etdirən videosüjet nümayiş olunub.

İctimai Televiziya və Radio Yayımlar Şirkətinin baş direktoru, Əməkdar İncəsənət Xadimi, professor Cəmil Quliyev tədbiri açaraq vurğulayıb ki, 10 il ərzində İTV çox böyük inkişaf yolu keçib, bir-birindən maraqlı layihələrə imza atıb və geniş tamaşaçı auditoriyasının sevgisini qazanıb.

Ölkə.az