Apellyasiya Rəsul Cəfərovu həbsdə saxladı

Bu gün Bakı Apellyasiya Məhkəməsində hüquq müdafiəçisi Rəsul Cəfərov barəsində Nəsimi məhkəməsinin qərarı ilə seçilmiş həbs qətimkan tədbirinin dəyişdirilməsi ilə bağlı məhkəmə prosesi keçirilib.

Vəkil Fariz Namazlı təqsirləndirilən şəxs barəsində əsassız olaraq həbs qətimkan tədbiri seçilməsi barədə arqumentlər gətirsə də, məhkəmə apellyasiya şikayətini təmin etməyib: “Heç bir arqument gətirilmədən, onu həbsdə saxlanmasına qərar verilib. Müdafiə tərəfi olaraq mənimlə yanaşı R.Cəfərov özü də bildirdi ki, onun həbsi tamamilə qanunsuzdur. Çünki o dəfələrlə istintaqın çağırışlarına gedib, hətta istintaqın gedişatında müəyyən sənədləri təqdim etməklə onlara köməklik də göstərib. Bundan başqa onun ölkədən çıxmaq hüquqları da məhdudlaşdırıldığından, onun xaricə qaçmaq ehtimalı da yoxdur. Ümumiyyətlə onun həbs olunması üçün heç bir əsas yoxdur və cinayət işi üzrə hansısa şəxslərə təsir göstərmək kimi bir imkanı da yoxdur. Bütün bu arqumentləri məhkəmənin diqqətinə çatdırsaqda, təəssüf ki, məhkəmə bunları nəzərə almadı və Nəsimi məhkəməsinin qərarını qüvvədə saxladı”.

Vəkilin sözlərinə görə, istintaq gedişində R.Cəfərovun həbs qətimkan tədbirinin ev dustaqlığı qətimkan tədbiri ilə əvəzlənməsi ilə bağlı vəsatət veriləcək.

Xatırladaq ki, Rəsul Cəfərov iyulun 31-də Baş Prokurorluğun Ağır Cinayətlərə dair İşlər üzrə İstintaq İdarəsində 6 saat dindirilib. Rəsul Cəfərov avqustun 2-də saxlanılıb və Cinayət Məcəlləsinin 192.2.2, 213.1 və 308.2-ci maddələrində (qanunsuz sahibkarlıq, vergidən yayınma və vəzifə səlahiyyətlərini aşmaq) nəzərdə tutulan əməlləri törətməsində əsaslı şübhələr olduğundan təqsirləndirilən şəxs qismində cəlb edilərək barəsində Nəsimi Rayon Məhkəməsinin qərarı ilə 3 aylıq həbs qətiimkan tədbiri seçilib.s Beynəlxalq təşkilatlar onun siyasi səbəblərlə həbs edildiyini bəyan ediblər./Bizimyol/

Ölkə.Az