Ekspert: \"Rusiya rəsmilərinin Azərbaycana səfəri zamanı cəbhədə bilərəkdən gərginlik yaradılır\"

Ötən gün Ermənistan silahlı qüvvələrinin işğal edilmiş Azərbaycan ərazilərindəki mövqelərindən Azərbaycan Respublikasının Tərtər rayonunun Qapanlı kəndi ərazisində mülki insanların kütləvi şəkildə cəmləşdiyi toy mərasimini atəşə tutub.

Azərbaycanın Xarici İşlər Nazirliyi bu hərəkəti, Ermənistan silahlı qüvvələrinin qəsdən törətdiyi bu əməli müharibə cinayəti adlandırıb.

Ümumiyyətlə erməni tərəfinin bu tip əməlləri daha çox Rusiya rəhbər dairələrinin Azərbaycana səfəri vaxtına daha çox təsadüf edir.

Baş verən hadisəni hərbi ekspert Üzeyir Cəfərov Ölkə.Az-a şərh edib.

Üzeyir Cəfərov: "Bir vacib məqama diqqət yetirmək lazımdır ki, Rusiya xarici işlər naziri Sergey Lavrov Azərbaycana gələn kimi Ermənistan fəallığa başladı. Bu fəallıq da təxribatlar şəklində özünü göstərdi. Düşmən hər vəchlə cəbhə bölgəsində gərginlik yaratmağa çalışır. Ermənilər təkcə hərbçilərə deyil, mülki şəxslərə də problemlər yaratmağa çalışırlar. Bütün bunlara rəğmən Azərbaycan silahlı qüvvələri düşmənə layiq olduğu zərbəni vurur və cavabını verir. Bu hadisə niyə məhz bir həftə bundan əvvəl yox, on gün bundan qabaq yox, məhz bu ərəfədə baş verdi? Bu bir daha onu göstərir ki, bizim bildiyimiz və bilmədiyimiz şeylər var. Bildiyimiz ondan ibarətdir ki, Ermənistan idarə olunan dövlətdir və Rusiya rəsmilərinin Azərbaycana səfəri zamanı cəbhədə bilərəkdən bu gərginlik yaradılır. Hər iki tərəfdən də itkilər olur. İtkilərin də fonunda tərəfləri guya bir stol arxasına gətirmək, onları müəyyən məsələlərdə ortaq məxrəcə gətirmək üçün atılan addımlardır. Çox təəssüflər olsun ki, erməni generallarının ağılsızlığı, erməni generallarının məsuliyyətsizliyi daha çox erməni övladlarının ölümü ilə nəticələnir. Bunun da məsuliyyəti Ermənistan rəhbərliyinin üzərindədir. Günahı ermənilər özlərində axtarsınlar. Tərtərdə baş verən və son günlər baş verənlər onu göstərir ki, görünməyən bəzi qüvvələrin elədikləridir.

Müdafiə nazirliyinin rəhbərliyi və ölkəmizin siyasi rəhbərliyi bildirib ki, düşmənin hər bir hərəkəti izlənilir və cavablandırılacaq. Tərtərdə toy çadırına açılan atəş və yaralananlara görə cavab tədbirləri görülüb. Bunun nəticəsində düşmən ciddi itkilər verib. Düşmənin itkisi təkcə canlı qüvvə yox, maddi və mənəvidir".

Qeyd edək ki, erməni silahlılarının Tərtər rayonun Qapanlı kəndi ərazisində toy mərasimini qəsdən atəşə tutması nəticəsində aralarında azyaşlı uşağın da olduğu üç nəfər şəxs yaralanmışdı.

Səxavət Məmməd
Ölkə.Az