Parlamentdəki çıxış vaxtını həmkarlarına peşkəş edən deputat

Atalar deyir, danışmaq gümüşdürsə, susmaq da qızıldır. Hazırcavablar da deyir ki, baxır hansı zərgərin yanında danışırsan.

Hacı Madər zəif zərgərin qarşısında da danışmırsa, demək ya danışa bilmir, ya da danışmağa bir sözü yoxdur.

Ölkə.Az Millət vəkillərinin 5 il ərzində gördükləri işləri araşdırmaqda davam edir.

Milli Məclis hələ Ali Sovet olan vaxtdan, 1990-cı ildən hər kəsin Hacı Madər kimi tanıdığı Madər Musayev deputatdır. Azərbaycanda 4-5 deputat var ki, bütün çağırışlarda millət vəkili seçiliblər, onlardan biri də Hacı Madərdir.

Hacı Madər həm də Milli Məclisdə "ağzına su alıb" oturan deputatların başında gəlir. Bu günə kimi Hacı Madərin hansısa təklif irəli sürdüyünü kimsə nə görüb, nə də eşidib. Bu qədər passiv bir deputatın Milli Məclisdə nə işi var anlamaq olmur.

Hacı Madər hətta o qədər az danışandır ki, bir dəfə öz danışmaq hüququnu Zahid Oruca verib.

Bu haqda Milli Məclisdə keçən qısa bir dialoqu sizə təqdim edirik:

Oqtay Əsədov: "Siz nə vaxtdan Hacı olmusunuz? Sizə kim vaxtını verib?".

Zahid Oruc: "Deputat həmkarım Hacı Madər dedi ki, inşallah növbəti seçkilərdə ikimiz də yenidən deputat seçilsək, həmin beş il müddətində də öz çıxış hüququmu sənə verəcəm".

Oqtay Əsədov: "Elə buna görə də, əlavə vaxt vermirəm".

Şərh etməyi sizin öhdənizə buraxırıq...

Dünya praktikasında da belə bir şey var. Kimlərsə öz biznesini, kommersiya fəaliyyətini qorumaq üçün ya diplomatik pasportdan ya da toxunulmazlıq verən deputat mandatından istifadə edir. Bunu yazmaqla əsla Hacı Madərin hansısa pis əməllə məşğul olduğunu demək istəmirik. Ancaq demək olmaz ki, Hacı Madərin durmadan böyüyən biznes-imperiyası görünməyəcək dərəcədə kiçikdir.

Hacı Madər kənd Binəqədidə doğulub, orada yaşayır və 25 ildir ki, Binəqədi rayonundan deputatdır.

Hacı demək olar ki, Binəqədinin öz dairəsindəki deputatlıq kreslosunu inhisara alıb. 2010-cu il parlament seçkilərində Hacı Madərin hansı yolla seçildiyini çoxları unudub bəlkə. Qısa xatırlatma: 10 saylı 3-cü Binəqədi seçki dairəsindən namizəd olan digər şəxslər Hacı Madərin adamları tərəfindən təqib, şantaj edilərək qorxudulublar. Seçilməməkdən qorxan Hacı bəzi iradəcə zəif və tamahkar namizədləri pulla alaraq onları neytrallaşdırıb.

Bura Azərbaycandır, hər şeydən pul çıxarmaq olar...

Hacı Madərin seçilməmək qorxusu bəzilərini iştaha gətirib. Məlumata görə, 10 saylı 3-cü Binəqədi seçki dairəsindən namizədliyini verənlərin sayı bütün dairələrdən çox olacaq, çünki istənilən namizəd gözəl bilir ki, namizədliyini geri götürmək müqabilində Hacıdan beşdən-ondan qopardacaq. Bu hal 10 saylı 3-cü Binəqədi seçki dairəsində keçiriləcək seçkilərin çox maraqlı olacağından xəbər verir.

Hacı Madərin boynundan atdığı market şəbəkəsi

Binəqədi rayon, 9-cu mikrorayonda indiki "Favorit-Market"in olduğu yerdə hündürmərtəbəli binalar tikilməzdən və market açılmazdan əvvəl o ərazidə Universam fəaliyyət göstərirdi. Universamın Hacı Madərə aid olduğu heç kimə sirr deyildi. Bir müddət sonra Universam söküldü, yerində bir neçə hündür mərtəbəli bina tikildi, binaların birinin birinci mərtəbəsi isə "Favorit-Market" oldu. "Favorit-Market" artıq şəhərin bir neçə yerində fəaliyyət göstərir və ölkənin ən böyük market şəbəkələrindən birinə çevrilib. Düzdür Hacı Madər bu şəbəkənin özünə aid olmadığını desə də, Binəqədidə "Favorit" şəbəkəsinə uşaqdan böyüyə hər kəs "Hacı Madər - market" deyir.

Ölkə.Az kənd Binəqədinin sakinləri ilə qısa bir sorğu da keçirib. Sorğu zamanı "Hacı Madəri tanıyırsızmı?" sualına hər kəs "Bəli, tanıyırıq" cavabı verib. Ancaq sakinlər Hacı Madəri deputat kimi yox, daha çox biznesmen kimi tanıyırlar.

Biznesi hər adam bacarmır. Hacı Madər bəlkə də ölkənin ən varlı biznesmenlərindən biridir, ancaq həm də ən passiv və fəaliyyətsiz deputatlarından biri. Hətta həmkarları və jurnalistlər öz aralarında Hacıya "lal-kar deputat" da deyirlər. Milli Məclis qanunvericilik orqanıdır, ora seçilən ölkənin inkişafını sürətləndirəcək yeni, ədalətli qanunların qəbuluna öz töhfəsini verməlidir. Deputat kreslosuna düymə basmaq üçün əyləşmək isə ilk növbədə həmin şəxsin özünü qiymətdən salır. Düzdür, biznesmenin deputat olması üçün qanunla heç bir qadağa yoxdur, ancaq biznesmen dediyimiz millət vəkili də qanunvericiliyin təkmilləşməsi, cəmiyyətin problemlərinin həlli üçün bir şey etməlidir ya yox?

Ona görə də, iddia edildiyi kimi Hacı Madərin deputat olmaqda məqsədi toxunulmazlıq qazanaraq biznesini qorumaq, daha da genişləndirməkdir.

Ölkə.Az