Deputatlar söyülən həmkarlarını müdafiə etdi

Milli Məclisin deputatları Fazil Mustafa, Azay Quliyev və Vahid Əhmədov facebookda “Deputat 2015” səhifəsinin keçirdiyi “Son 5 ilin ən yaxşı deputatı kimdir?” sorğusuna etiraz ediblər.

Ölkə.Az xəbər verir ki, bu barədə öz “Facebook” səhifəsində deputat Fazil Mustafa yazıb.

Fazil Mustafa adları çəkilən deputatlardan başqa digər həmkarlarının həmin səhifədə keçirilən sorğular zamanı təhqir edildiyini, söyüldüyünü əsas gətirərək, adlarının oradan çıxarılmasını tələb edib.

“Əməkdaşlarımız sizin səhifənizdə “Son 5 ilin ən yaxşı deputatı kimdir?” adlı sorğu keçirildiyini bildirdilər. Məlumat verildi ki, həmin “Facebook” səhifəsində səsvermənin hətta ikinci mərhələsi başlayıb və orada bizlər - Azay Quliyev, Fazil Mustafa və Vahid Əhmədovla yanaşı, daha iki həmkarımız yer alıb.

Əlbəttə, biz sosial şəbəkələrdə belə bir rəy sorğusunun keçirilməsinə marağı başa düşürük. Biz həmçinin bizə dəstək olan və fəaliyyətimizi qiymətləndirən hər kəsə, xüsusilə də, seçicilərimizə öz minnətdarlığımızı bildiririk.

Lakin səhifədə digər millət vəkillərinin ünvanlarına etikadan kənar, həqiqətləri əks etdirməyən ifadələr, təhqirlər söylənilir və belə hesab edirik ki, bu cür yanaşma onlara qarşı haqsızlıqdır. Bununla yanaşı, millət vəkillərinin qarşı-qarşıya qoyulmasını və tərəfdarların arasında lüzumsuz mübahisələri doğru hesab etmirik. Ümumiyyətlə, bu cür subyektiv sorğuları elmi-metodologiyaya əsaslanmadığı üçün aktual hesab etmirik.

Bütün bunları nəzərə alaraq, bizim (Azay Quliyev, Fazil Mustafa və Vahid Əhmədov) adlarımızın sorğudan çıxarılmasını xahiş edirik.

Hörmətlə,
Millət vəkilləri
Azay Quliyev,
Fazil Mustafa,
Vahid Əhmədov”, - deyə müraciətdə bildirilib.

Qeyd edək ki, sözügedən “Facebook” səhifəsində deputatların şəkilləri paylaşılır və sosial şəbəkə istifadəçələrindən həmin deputatların fəaliyyəti haqda fikirlər öyrənilirdi. Deputatlar haqda fikir bildirənlər bəzən etikadan kənar ifadələr işlədərək, deputatları təhqir edirdilər.

Rəşid

Ölkə.Az