Gecəyarı Bakıda fişəng atan həbs edildi - FOTO/VİDEO

Nərimanov rayonunda gecə saatlarında güclü səs effekti yaradan pirotexniki vasitələrdən istifadə edən və ətrafda yaşayan sakinlərin ciddi narazılığına səbəb olan şəxs həbs edilib.

Daxili İşlər Nazirliyindən Ölkə.az-a verilən məlumata görə, ötən gecə naməlum şəxs saat 3 radələrində Nərimanov rayonunda binalardan birinin həyətində güclü səs effekti yaradan pirotexniki vasitələrdən istifadə edərək ətrafda yaşayan sakinlərin haqlı narazılığına və çoxsaylı şikayətlərinə səbəb olub. Həmin şəxsin etdiyi əməl inzibati ərazidə quraşdırılan videomüşahidə kameraları vasitəsi ilə də qeydə alınıb. Nərimanov rayon Polis İdarəsinin 16-cı Polis Bölməsinin əməkdaşlarının keçirdikləri tədbirlər nəticəsində gecə saatlarında pirotexniki vasitələrdən istifadə edən paytaxt sakini Həsən Hüseynli saxlanılıb.

Onun barəsində  İnzibati Xətalar Məcəlləsinin müvafiq maddəsi ilə protokol tərtib edilib və toplanmış material baxılması üçün Nərimanov rayon Məhkəməsinə göndərilib. Məhkəmənin qərarına əsasən o,  5  gün müddətinə inzibati qaydada həbs edilib.