İran "Bakı Respublikası" deyirsə, biz də "Qacar dövləti" yazaq - FOTO

"İran Azərbaycanda səfirlik açdığı ilk illərdə binanın üzərinə "İran İslam Respublikasının Bakıdakı səfirliyi" sözü yazılmışdı. İlk zamanlarda biz neçə dəfə cəhd etsək də, bunu dəyişmədilər".

Ölkə.Az xəbər verir ki, bu sözləri siyasi elmlər üzrə fəlsəfə doktoru, araşdırmaçı, dosent Zaur Əliyev deyib. O, müraciətlərin nəticəsiz qaldığını söyləyib:

"Məktub və müraciətlərimizə cavab verməyən İran səfirliyi əl altından "biz Bakı Respublikasındayıq, Azərbaycan tanımırıq, bura bizim Şimali İrandır" üçün deyə xəbər göndərirdilər. Onların adamları vasitəsilə xəbər göndərdik ki, biz Tehranda elə aksiya həyata keçirə bilərik ki, İran öz adını təmizə gec çıxarda bilər. Sağ olsun, yüksək səviyyədə işə qarışıldı və İran səfirliyi geri çəkildi".

Alim son aylarda cənubda yaşayan soydaşlarımıza da "Bakı Respublikası" yazdırdıqlarını bildirib:

"Son 10 ildə isə İran mediası arabir "Bakı Respublikası" sözündən istifadə edirdi. Artıq bir ildir bütün sosial şəbəkələrdə və platformalarda, KİV-də bu ifadə geniş yayılıb. Son iki aydır ki, artıq təhsil sistemlərində azərbaycanlı şagirdlərə zorla "Azərbaycan" sözünü silib "Bakı Respublikası" yazmağı öyrədirlər. Bu da İranda olan dərsliklərdən birinin surətidir.

Bakı Respublikası sözünü kütləvi şəkildə təhsil, elm və media dilinə gətirirlər. Siyasilər hələ cəhd etmirlər, amma siyasi partiyalara tapşırıq verilib ki, yavaş yavaş sənədlərdə "Azərbaycan Respublikası" adını "Bakı Respublikası" ilə əvəz etsinlər. İran bunu etməklə 30 milyonluq soydaşlarımızın beynini yumağa cəhd edir. 

Bu, çox cılız addımlardır. Biz siyasi əxlaq göstərib "İran İslam Respublikası" yazırıq, "Qacar dövləti" yazmırıq. Amma, deyəsən, səhv edirik. Daha əxlaq siyasəti kənara qoyulmalıdır.

Olsun, Tehranda biz öz salamızı çatdırarıq", - deyə o əlavə edib.

Billurə Yunus