Bakıda ev almaq mümkün olmayacaq: Qiymətlər yenə qalxır

“Hazırda qeyri-yaşayış sahələrində 7-8 faizlik, torpaq bazarında isə 10 faizlik artım müşahidə olunur. Qiymət artımı faiz etibarilə ikirəqəmli göstəricini keçib və 13 faizdən bir qədər artıqdır. Belə davam edərsə, ilin sonuna qədər bu faizlər yüksələcək və evlərin qiyməti daha da bahalaşacaq”.

Bunu Bakupost.az -a əmlak məsələləri üzrə ekspert Elnur Fərzəliyev deyib.

O bildirib ki, Azərbaycanda daşınmaz əmlakın qiyməti gəlirlərlə üst-üstə düşmür. Buna görə də insanlar daha çox kreditlə ev almağa maraq göstərir. Hazırda əsas tələbat bina evlərinədir. Çünki həyət evlərindən fərqli olaraq, bu evlər daha çox kreditlə satılır. Fərdi yaşayış evini hər insan ala bilmir.

Ekspert bildirib ki, həyət evləri Bakıətrafı ilə müqayisədə şəhərdə bahadır:

"Şəhərdə fərdi yaşayış evlərinin qiyməti milyon manatla ölçülür. Şəhərdən kənar qəsəbələrdə isə fərdi yaşayış evlərinin qiyməti 40-45 min manatdan başlayır. Əvvəl vətəndaşlar torpaq alıb ev tikirdilər. Amma indi Bakıətrafı qəsəbələrdə, yaşayış massivlərində torpaq resursları tükənib. Bu isə torpaqların qiymətinin artmasına səbəb olub. Bunan əlavə tikinti materiallarının da qiyməti bahalaşıb. Bütün bunlar onsuz da fərdi yaşayış evlərinin qiymətinin bahalaşmasına səbəb olmuşdu. Digər tərəfdən də şəhərin mərkəzi hissələrində həyət evlərinin söküntüsü davam edir. Bu da fərdi evlərə təlabatı artırır”.

Ekspert deyir ki, insanlar təhlükəsizlik məqsədi ilə fərdi yaşayış evi almağa maraq göstərsələr də, əksər hallarda ev tikintisi ilə məşğul olan şəxslərin inşa etdirib satışa çıxardığı evlər elə də keyfiyyətli olmur:

"Fərdi yaşayış evi alan şəxslər daha yaxşı olar ki, içərisində yaşanmış ev alsın. Belə halda yaşadıqca evdə olan qüsurlar üzə çıxır".

Əmlak məsələləri üzrə ekspert Ramil Osmanlı qeyd edib ki, Rusiya-Ukrayna müharibəsi ilə əlaqədar orada yaşayan azərbaycanlıların çoxu müharibəyə getmək istəmədikləri üçün ölkəyə geri qayıdır və daşınmaz əmlak bazara investisiyalar yatırmağa başlayırlar.

Bu da təbii ki, daşınmaz əmlak bazarında qiymət artımına təsir edir.