Ali təhsilini yarımçıq qoyub cəbhəyə gedən şəhid haqqında povest yazıldı

"1992-ci ilin cırhacırlı yay günləri idi. Semestr imtahanları yeni başlamışdı. Əlövsətə universitetdən xəbər göndərmişdilər ki, təcili gəlsin. Tabor komandiri Əliyar Əliyev məsələdən xəbər tutan kimi Əlövsətlə bərabər rayona gəldi. Teleqram vurdu ki, əgər Əlövsət Vəliyevdən imtahan götürmək istəyirsinizsə, Yazı düzündəki ikinci posta gəlin. Sonra da Əlövsətin həqiqətən də döyüşdə olduğunu təsdiqləmək üçün rektorun adına bir arayış yazıb möhürlədi…"

Şəhid Əlövsət Cəfərxan oğlu Vəliyevin xatirəsinə həsr olunmuş kitabdan təsadüfən açıb oxuduğum kiçik bir parçada nəyə daha çox kədərləndiyimi özüm də bilmədim – parlaq gələcək vəd edən universitet təhsilini yarımçıq qoyub cəbhəyə yollanmış gəncin seçiminəmi? Onun gəncliyinəmi (tələbədirsə, maksimum 24-25 yaşı var)? Ağır itkilərini 20 ildən artıq yaşadığımız müharibənin hamı (məsələn, elə Əlövsətin müəllimi, qrup yoldaşları, rektoru) üçün olmamasınamı?

Bu gün baş tutan kitabın təqdimatına Qubadlı rayon ictimaiyyətinin, şəhidin ailə üzvləri və döyüş yoldaşlarının, media nümayəndələrinin yığışdığı Ötərxan Eltacın “Əfsanəvi 195” sənədli povestini bütün Qubadlı şəhidlərinin xatirəsinin anımı hesab etmək olar. 706 nömrəli hərbi hissənin 3-cü taborunun tağım komandiri, leytenant Əlövsət Vəliyevin müharibə həyatından bəhs edən kitabda 1992-93-cü illərdə Qubadlı və sakinlərinin də yaşadıqları əks edilib. 239 Qubadlı şəhidinin ad-soyadı, şəhid Əlövsət Vəliyevin cəbhə yoldaşlarının adları kitabda yer alıb.

Hərbi xidmətini başa vurmasına baxmayaraq, ali təhsilini yarımçıq qoyub vətəninin müdafiəsinə könüllü qoşulan Əlövsət Vəliyev Qubadlı, Laçın, Cəbrayıl, Zəngilan rayonlarında gedən döyüşlərdə iştirak edib. Arxasında rus ordusu dayanan, dişinə qədər silahlı erməni işğalçılarına qarşı əliyalın və köhnə silahlarla mübarizə aparan rayon camaatı üçün Əlövsət Vəliyevin peşəkar idarə etdiyi tankı ümid yeri idi. Sonuncu dəfə Qubadlının işğalı günü görünən cəsur tankçı mərmisi bitdikdən sonra idarə etdiyi tankı düşmən tankının üzərinə sürüb dinc əhalinin çıxarılması üçün yolu saxlamağa çalışıb. Şəhidin cəsədi belə tapılmayıb.

Cəsur tankçının döyüş yolu və xidmətləri barədə 17 aprel 1996-cı ildə 706 nömrəli hərbi hissənin kəşfiyyat rəisi mayor Məhyəddinovun yazdıqları: