Həftənin icmalı
Kəngərli rayonuna yeni icra başçısı təyin edildi
31.08.2015
Azərbaycan Prezidenti İlham Əliyev Kamal Elbrus oğlu Ələkbərovun Naxçıvan Muxtar Respublikası Kəngərli Rayon İcra Hakimiyyətinin başçısı təyin edilməsi haqqında sərəncam imzalayıb.
Dövlət başçısının digər sərəncamı ilə Ramiz Əli oğlu Cəfərov Naxçıvan Muxtar Respublikası Kəngərli Rayon İcra Hakimiyyətinin başçısı vəzifəsindən azad edilib.
Suriyada döyüşən azərbaycanlılara 40 il iş kəsildi
31.08.2015
Bakı Ağır Cinayətlər MəhkəməsindəSuriyada döyüşlərdə iştirak etməkdə təqsirləndirilən Azərbaycan vətəndaşları Elşən Qurbanlı, Bəhruz Rəsulov, Nadir Əlixanov, Kamran Əzizov, Tural Məmmədovun cinayət işi üzrə məhkəmə prosesi başa çatıb.
Məhkəmənin hökmü ilə Bəhruz Rəsulov 12 il, Nadir Əlixanov 13 il, digər təqsirləndirilən şəxslərin hər biri isə 14 il 6 ay müddətinə azadlıqdan məhrum edilib.
Qeyd edək ki, təqsirləndirilən şəxslər Milli Təhlükəsizlik Nazirliyinin (MTN) əməkdaşları tərəfindən saxlanılıb.
Yaşayış yeri üzrə arayış almaq asanlaşdı
31.08.2015
Azərbaycan Prezidenti İlham Əliyev dövlət xidmətlərinin göstərilməsində şəffaflığın artırılması, yaşayış yeri üzrə qeydiyyat və lisenziyalaşdırma prosedurlarının elektronlaşdırılması sahəsində bəzi tədbirlər haqqında fərman imzalayıb.
Daxil olan məlumatların təhlili göstərir ki, bəzi dövlət qurumları müasir texnoloji yeniliklərdən istifadə etmədən, əhaliyə xidmətlərin göstərilməsi qaydalarını təkmilləşdirmədən, şəffaflığı təmin etmədən fəaliyyət göstərir.
Belə ki, mənzillərdə, fərdi yaşayış evlərində və digər yaşayış sahələrində qeydiyyatda olan şəxslərin uçotunu həyata keçirən mənzil-kommunal istismar sahələrində informasiyanın toplanması, sistemləşdirilməsi, saxlanması və arxivləşdirilməsi kağız daşıyıcılar üzərində aparılır, məlumatların yenilənməsi qeyri-mütəmadi və sistemsiz şəkildə həyata keçirilir, elektron vasitələrdən istifadə edilmir.
Elektron xidmətlər müasir dövrdə ictimai həyatın bütün sahələrinin, eləcə də iqtisadiyyatın və sahibkarlığın inkişafında mühüm rol oynayır. Sahibkarlıq fəaliyyəti ilə məşğul olan fiziki və hüquqi şəxslərə xüsusi razılıq (lisenziya), sertifikat və digər sənədlərin verilməsi prosedurlarının elektronlaşdırılması sahibkarlığın inkişaf etdirilməsi sahəsində görülən işlərin səmərəliliyini daha da artıracaqdır.
Azərbaycanda sərinləşdirici içkilər bahalaşır
31.08.2015
“Azərbaycan Coca-Cola Bottlers” MMC sentyabrın 7-dən sərinləşdirici içkilərin qiymətini artırır.
Ölkə.Az şirkətin rəsmi saytına istinadla xəbər verir ki, həmin tarixdən etibarən siyahıda adları göstərilmiş məhsulların satış qiyməti artırılacaq.
Azərbaycan Gürcüstana ixracı azaltdı
31.08.2015
2015-ci ilin yanvar-iyul aylarında Gürcüstandan Azərbaycana ixracın həcmi 55% (182,6 milyon dollar) azalaraq, 151,6 milyon dollar, yaxud ümumi ixracatın 6,9 %-ni təşkil edib.
Bu barədə Gürcüstan Statistika Komitəsinin yanvar-iyul ayları üçün açıqladığı hesabatda deyilib.
“2015-ci ilin 7 ayı ərzində Gürcüstandan Azərbaycana 46 milyon dollar dəyərində minik avtomobilləri ixrac olunub, bu isə 2014-cü ilin müvafiq dövrü ilə müqayisədə 121 milyon dollar azdır” - deyə, komitənin yaydığı hesabatda vurğulanıb.
Bundan başqa, Gürcüstana Azərbaycandan idxalın həcmi də aşağı düşüb.
Cari ilin ilk 7 ayında Azərbaycandan Gürcüstana ixracatın həcmi ötən illə müqayisədə 9,1% azalaraq, 316,1 milyon dollar, yaxud Gürcüstanın ümumi idxalatının 4,4 %-ni təşkil edib.
Azərbaycandan Gürcüstana 79,4 milyon dollarlıq, 150,1 min ton neft və neft məhsulu ixrac edilib ki, bu da ötən ilin uyğun dövründəkindən 56,2 milyon dollar azdır.
Qeyd edək ki, bununla belə, 2015-ci ilin 7 ayında Azərbaycan Gürcüstanın ikinci ticarət tərəfdaşı olub.
"Bakıkart" oğurluq çıxdı
01.09.2015
Bakı Metropolitenində istifadə olunan "Bakıkart"ın dizaynı oğurluq çıxıb
Nəriman Süleymanov adlı tələbə sosial şəbəkədə öz hazırladığı kartla yanaşı hazırda satışda olan "Bakı kart"ı göstərərək bu barədə yazıb. Gəncin sözlərinə görə, hazırda satışda olan kartların dizayn ideyası məhz ona məxsusdur:
"Bu gördüyünüz yeni istifadəyə verilmiş "Bakıkart"dır. Sağdakı gördüyünüz kartın üzərindəki şəklin dizaynı isə mənə məxsusdur. İki il öncə hazırlamışdım. Xəbərim olmadan şəkil kartın üzərində çap olunub və icazə almadan şəkilə dəyişiklik olunub. Belə ki, "Heydər Əliyev Mərkəzi"nin fotosu da kartın üzərində əksini tapıb. Bu da şəklin orijinalı. Fikirləriniz..."
Qeyd edək ki, N.Süleymanov Ukraynadakı ali məktəblərdən birinin tələbəsidir. Eyni zamanda bir sıra seriallarda operator kimi də çalışıb.
Milli Məclisin sentyabr ayı üçün iş təqvimi məlum oldu
01.09.2015
Bu gündən Azərbaycan Milli Məclisi payız sessiyası çərçivəsində işə başlayıb.
MM-dən Ölkə.Az-a verilən məlumata görə, artıq sentiyabr ayı üçün parlament rəhbərliyinin və deputatların qəbul günləri müəyyənləşib. Komitələrin iclasları sentyabrın 15-dən başlayacaq, parlamentin ilk plenar iclası isə sentyabrın 30-da keçiriləcək. Bu, IV çağırış Milli Məclisin son sessiyası olacaq.
Qeyd edək ki, noyabrın 1-də V çağırış Milli Məclisə seçkilər keçiriləcək.
Azərbaycan-Amerika Alyansı öz fəaliyyətini davam etdirir
01.09.2015
Yerli mətbuatda ABŞ-da Azərbaycanın maraqlarının təbliği istiqamətində fəaliyyət göstərən Azərbaycan-Amerika Alyansının bağlanması barədə məlumat yayılıb.
Bildirilir ki, bir neçə həftə əvvəl təşkilatın Vaşinqtondakı ofisini bağlanıb, Azərbaycan-Amerika Alyansı rəsmən buraxılıb.
Məsələ ilə bağlı danışan Azərbaycan-Amerika Alyansının icraçı direktoru Xəyal Şərifzadə yayılan bütün bu məlumatları cəfəngiyat və həqiqətə uyğun olmayan adlandırıb.
Vasif Talıbov seçkilərlə bağlı sərəncam imzaladı
01.09.2015
Naxçıvan Muxtar Respublikasının Ali Məclisinə seçkilər 2015-ci il noyabrın 1-də keçiriləcək.
Bu barədə Naxçıvan Muxtar Respublikası Ali Məclisinin sədri Vasif Talıbov sərəncam imzalayıb.
Qeyd edək ki, Azərbaycan Prezidenti İlham Əliyevin sərəncam ilə Milli Məclisə seçkilər də noyabrın 1-nə təyin olunub.
Xədicə İsmayıla hökm oxundu
01.09.2015
Bakı Ağır Cinayətlər Məhkəməsində Xədicə İsmayılovanın cinayət işi üzrə məhkəmə prosesi başa çatıb
Hakim Ramella Allahverdiyevanın sədrlik etdiyi prosesdə Xədicə İsmayılovaya hökm oxunub. Hökmə əsasən, X. İsmayılova 3 il rəhbər vəzifə tutmaq hüququndan məhrum olunmaqla 7 il 6 ay müddətinə azadlıqdan məhrum edilib.
Hökmə əsasən, ona ittiham edildiyi 125-ci maddə üzrə bəraət verilib. Hakim bildirib ki, həmin maddə üzrə ittiham təsdiqini tapmayıb.
Xatırladaq ki, dövlət ittihamçısı Ramazan Hadıyev Xədicə İsmayılovanın 9 il müddətinə azadlıqdan məhrum edilməsini istəmişdi.
Lavrov Bakıya səfər etdi
01.09.2015
Ölkə.Az xəbər verir ki, Rusiya Federasiyasının xarici işlər naziri Sergey LavrovAzərbaycana işgüzar səfər edib.
Azərbaycan Respublikasının xarici işlər naziri Elmar Məmmədyarovla regiondakı vəziyyətin, çoxtərəfli və ikitərəfli gündəliyin qarşılıqlı maraqlarını təmsil edən məsələlərin müzakirə ediləcəyi danışıqlar baş tutub.
Bakıda ikitərəfli münasibətlərin müxtəlif aspektləri, Dağlıq Qarabağ münaqişəsinin nizamlanması, Rusiyanın ATƏT-in Minsk qrupunda həmsədr kimi rolunun müzakirə edilib.
Nəsimi rayonunun icra başçısı dəyişdirildi
02.09.2015
Azərbaycan Prezidenti İlham Əliyev Nəsib Məhəmməd oğlu Məhəməliyevin Bakı şəhəri Nəsimi Rayon İcra Hakimiyyətinin başçısı vəzifəsindən azad edilməsi haqqında sərəncam imzalayıb.
Dövlət başçısının digər sərəncamı ilə Asif Yunis oğlu Əsgərov Bakı şəhəri Nəsimi Rayon İcra Hakimiyyətinin başçısı təyin edilib.
Eldar Əzizov vəzifədən azad edildi
02.09.2015
Azərbaycan Prezidenti İlham Əliyev Eldar Əziz oğlu Əzizovun Sumqayıt şəhər İcra Hakimiyyətinin başçısı vəzifəsindən azad edilməsi haqqında sərəncam imzalayıb.
Dövlət başçısının digər sərəncamı ilə Zakir Fərəc oğlu Fərəcov Sumqayıt şəhər İcra Hakimiyyətinin başçısı təyin edilib.
Bakının daha bir rayonunun icra başçısı vəzifəsindən azad edildi
02.09.2015
Başqa bir sərəncamla isə Asif Yunis oğlu Əsgərov Bakı şəhəri Səbail rayon İcra Hakimiyyətinin başçısı vəzifəsindən azad edilib.
Prezident İlham Əliyev, həmçinin Eldar Əziz oğlu Əzizovun Bakı şəhəri Səbail rayon İcra Hakimiyyətinin başçısı təyin edilməsi haqqında sərəncam imzalayıb.
Abşeron rayonuna yeni icra başçısı təyin edildi
02.09.2015
Azərbaycan Prezidenti İlham Əliyev İradə Akif qızı Gülməmmədovanın Abşeron rayon İcra Hakimiyyətinin başçısı təyin edilməsi haqqında sərəncam imzalayıb.
Leyla Əliyeva Romada
02.09.2015
Heydər Əliyev Fondunun vitse-prezidenti, BMT-nin Ərzaq və Kənd Təsərrüfatı Təşkilatının (FAO) xoşməramlı səfiri Leyla Əliyevanın iştirakı ilə qurumun Romadakı baş ofisində bir sıra görüşlər keçirilib.
Leyla Əliyevaya burada çalışanlar üçün yaradılmış şərait barədə məlumat verilib. Leyla Əliyevanın FAO-nun xoşməramlı səfiri kimi ilk dəfə fəaliyyətə başlaması ilə əlaqədar təntənəli mərasim olub və qarşılıqlı hədiyyələr təqdim edilib.
Daha sonra Leyla Əliyeva FAO-nun media mərkəzinə müsahibə verib.
Qeyd edək ki, Azərbaycan 1995-ci ildən FAO-nun üzvüdür. Ölkəmizdə qurumun layihə əlaqələndirmə ofisi 2007-ci ildən fəaliyyət göstərir. Bir müddət əvvəl isə Azərbaycanda təşkilatın ilk əlaqələndirmə və tərəfdaşlıq ofisi açılıb.
MTN İŞİD terrorçuları ilə bağlı əməliyyat keçirdi
02.09.2015
MTN İŞİD terrorçu təşkilatının fəaliyyətində iştirak edən qrupu zərərsizləşdirib.
Milli Təhlükəsizlik Nazirliyi tərəfindən həyata keçirilmiş anti-terror tədbirləri nəticəsində, Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə, həmçinin, terrorçuluq, yəni dövlət hakimiyyəti orqanları və ya beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və ya başqa ictimai təhlükəli nəticələrin baş verməsi təhlükəsi yaradan partlayış, yanğın və ya digər hərəkətlər törətmə, habelə həmin məqsədlə bu cür hərəkətlərin törədiləcəyi ilə hədələmə, Azərbaycan Respublikası vətəndaşları və ya Azərbaycan Respublikasında daimi yaşayan vətəndaşlığı olmayan şəxsləri dini məzhəbləri yaymaq, dini ayinlərin icrası adı altında, dini düşmənçilik zəminində Azərbaycan Respublikasının hüdudlarından kənarda aparılan silahlı münaqişələrə cəlb etmə, yaxud bu məqsədlə döyüş təlimləri keçmə, yaxud həmin məqsədlə fəaliyyət göstərən sabit qrup yaratma, eləcə də həmin qruplarda, təlimlərdə və ya silahlı münaqişələrdə iştirak etmə və digər hüquqazidd əməllərinin törədilməsinə görə Azərbaycan Respublikasının vətəndaşları – Xasaylı Şirxan Elxan oğlu, Mikayılov Rövşən Baba oğlu, Adilov Elşən Sərdar oğlu, Hacıyev Vüqar Mehman oğlu və Eyyubov Azər Mətləb oğlu şübhəli şəxs qismində tutulmuşlar.
Tələbələrə şad xəbər
02.09.2015
Bakıda kampusların yaradılması istiqamətində işlər aparılır.
Ölkə.Az xəbər verir ki, bunu Trend-ə açıqlamasında Milli Məclisin Elm və təhsil komitəsinin sədri Şəmsəddin Hacıyev deyib.
Onun sözlərinə görə, Universitetlərin kampus şəraitində olması çox vacib məsələdir: "Artıq bir neçə ali məktəbin kampuslarının olduğunu deyən millət vəkili hesab edir ki, bu Azərbaycanda təhsilin inkişafına ciddi təsir göstərəcək amillərdəndir. Azərbaycanın “Təhsil haqqında” qanununda kampusların yaradılması barədə xüsusi maddələr var. Bakıda kampusların yaradılması ilə bağlı proses artıq başlayıb və çox yaxşı nəticələr də var.
Təsəvvür edin ki, geniş ərazi, yataqxanalar, kitabxana və hər cürə infrastrukturun hamısı kampusda əhatə olunub. Bütün bunlar gənclərin kampusdan kənara çıxmadan tələbatları olan vasitələrlə təminatı deməkdir. Bununla yanaşı, bu cür infrasturkturun yaradılması təhsilin inkişafına töfhəsini verməyə bilməz”.
Rusiyalı nazir Bakıya səfər edəcək
02.09.2015
Rusiya Federasiyasının Sənaye və ticarət naziri Denis Manturov yaxın zamanda Azərbaycana səfər edəcək.
Bu barədə Azərbaycan Respublikası prezidenti İlham Əliyevlə görüşdə RF-in xarici işlər naziri Segey Lavrov məlumat verib.
"Beynəlxalq şəraitə baxmayaraq, bizim iqtisadi münasibətlər qalxan xətlə inkişaf edir. Parlamentlərarası komissiyallar fəaliyyət göstərir, Azərbaycana Rusiyanın sənaye və ticarət naziri Denis Manturovun səfəri gözlənilir. Biz Azərbaycanın kənd təsərrüfatı mallarının Rusiyaya təchiz olunmasının artmasına sevinirik", - deyə Lavrov qeyd edib.
O, Rusiya yükdaşıma şirkətlərinin beynəlxalq daşımalarını həyata keçirməsinə imkan verən qərarlara görə Azərbaycan tərəfinə minnətdarlığını ifadə edib.
Prezident tapşırıq verdi: Azərbaycanda aylıq 100 manata evlərin satışı başlayır
03.09.2015
Prezident İlham Əliyev sosial ipotekanın həcminin artırılması və vəsaitlərin verilməsi mexanizminin təkminləşdirilməsi barədə müvafiq qurumlara tapşırıqlar verib. Mərkəzi Bank və İpoteka Fondu ilə yanaşı, təkminləşdirilməsi və əhatəsinin genişləndirilməsi məqsədi ilə yeni layihə hazırlayıb.
Ölkə.Az-ın Vergilər Nazirliyinə istinadən verdiyi məlumata görə, Ailə, Qadın və Uşaq Problemləri üzrə Dövlət Komitəsinin hazırladığı yeni təkliflər paketində mənzilə ehtiyacı olan ailələrin problemlərinin həlli məqsədi ilə kredit faizlərinin aşağı salınması, aylıq ödəniş məbləğinin azadılması və ipotekanın regionlarda geniş tətbiqi əks olunub. Komitənin sədr müavini Sədaqət Qəhramanova bildirib ki, təkliflər hazırlanarkən beynəlxalq maliyyə-bank təşkilatlarının təcrübəsi və bu sahə üzrə tanınmış xarici ekspertlərin rəyləri nəzərə alınıb.
Türkiyəyə gedən azərbaycanlı turistlərin sayı artdı
03.09.2015
2015-ci ilin 7 ayında Türkiyəyə 82 min 307 nəfər azərbaycanlı ziyarət edib. Bu da 2014-cü ilin anoloji dövrü ilə müqayisədə 2 392 nəfər və ya 2,99% çoxdur.
Bu barədə Türkiyənin Mədəniyyət və Turizm Nazirliyindən bildirilib.
Türkiyəyə gələn azərbaycanlıların bu ölkəyə gələn ümumi millətlər arasında payı, 2013-cü ilin 7 ayında 1,56%, 2014-cü ilin müvafiq dövründə 1,53%, 2015-ci ilin 7 ayında isə 1,50% olub.
Bundan başqa, nazirlik qeyd edib ki, 2014-cü ilin yanvar-iyul ayları ərzində Türkiyəyə 79 915 azərbaycanlı gəlib bu da 2013-cü ilin anoloji dövrü ilə müqayisədə 11,71% çoxdur.
“The Washington Times” Azərbaycandakı dini tolerantlıqdan yazdı
03.09.2015
“Azərbaycanı dini səpkidə ittiham etmək tamamilə yersizdir və tarix göstərir ki, bu, əks təsirə bərabərdir”.
Bu barədə amerikalı jurnalist Maayan Jaffe “The Washington Times” qəzetindəki yazısında bildirib. O, dini tolerantlığın təmin olunması səviyyəsinə görə yüksək qiymətləndirilən Azərbaycan Respublikasının Birləşmiş Ştatların Beynəlxalq Dini Azadlıq Komissiyasının tənqid hədəfinə çevrildiyini deyib. Müəllif qeyd edib ki, komissiya mandatına zidd şəkildə din və dini azadlıqla heç bir əlaqəsi olmayan siyasi məsələlərlə bağlı bəyanatlar verir.
Yazıda qeyd olunur ki, Azərbaycanın dini azadlıqların məhdudlaşdırıldığı ölkələr sırasında ikinci pillədə göstərilməsi məntiq və uzaqgörənliyə sığmır: “Azərbaycan kommunist və ateist Kuba, Əfqanıstan kimi qeyri-stabil dövlətlər qrupu ilə eyni sıraya qoyulub. Halbuki Azərbaycanda bu sahədə tətbiq edilən məhdudiyyətlər demokratiyanın, eləcə də Azərbaycan əhalisinin təhlükəsizliyinin təmin olunmasına yönəlib. Azərbaycanda qadınların hüquqları təmin edilib və yəhudilər də daxil olmaqla, azlıqlar təhlükəsiz və azad yaşayırlar. Bu isə hökumətin bu istiqamətdə səyləri ilə bağlıdır”.
Prezident ADNA-nın adını və rektorunu dəyişdirdi
03.09.2015
Azərbaycan Prezidenti İlham Əliyev Azərbaycan Dövlət Neft Akademiyasının adının dəyişdirilməsi haqqında sərəncam imzalayıb.
Ölkə.Az-ı məlumatına görə, sərəncamda deyilir:
“Azərbaycan Dövlət Neft Akademiyası Azərbaycan Dövlət Neft və Sənaye Universiteti adlandırılsın”.
Prezidentin digər sərəncamı ilə Mustafa Baba oğlu Babanlı Azərbaycan Dövlət Neft və Sənaye Universitetinin rektoru təyin edilib.
Müvafiq sərəncamda deyilir:
"Mustafa Baba oğlu Babanlı Azərbaycan Dövlət Neft və Sənaye Universitetinin rektoru təyin edilsin".
Azərbaycanda ərzaq məhsullarının qiyməti ucuzlaşdı
03.09.2015
2015-ci ilin avqust ayında əvvəlki ayla müqayisədə ərzaq məhsullarının qiymətləri 0,3%, əhaliyə göstərilən pullu xidmətlərin qiymət və tarifləri 0,1% ucuzlaşıb, qeyri-ərzaq mallarının qiymətləri isə 0,1% bahalaşıb.
Bu barədə Ölkə.Az-a Dövlət Statistika Komitəsindən (DSK) bildirilib.
Ümumilikdə istehlak mallarının qiymətləri və xidmət tarifləri 0,1% ucuzlaşıb.
Komitə bildirib ki, ay ərzində qarabaşaq yarmasının, sümüklü mal və qoyun ətinin, kərə yağının, şəkərin, bananın, almanın, armudun, üzümün, qarpızın, yemişin, xiyarın, şirin bibərin, badımcanın, kartofun qiymətlərində ucuzlaşma müşahidə olunub.
Bundan əlavə, uzun düyünün, buğda ununun, makaron məmulatlarının, toyuq ətinin, balıq məhsullarının, yumurtanın, bitki yağlarının, limonun, kələmin, göyərtinin, pomidorun, göy lobyanın, çuğundurun, kökün, sarımsağın, baş soğanın, qara və yaşıl çayın, spirtli içkilərin qiymətlərində isə bahalaşma müşahidə olunub.
Müşahidəsi aparılan qeyri-ərzaq mallarından avqust ayı ərzində parçaların, inşaat materiallarının, minik avtomobilləri üçün ehtiyat hissələrinin, məişət cihazlarının qiymətlərində bahalaşma, geyimin, dərmanların, minik avtomobillərinin, telefon aparatlarının qiymətlərində isə ucuzlaşma müşahidə olunub.
Avqust ayında əhaliyə göstərilən pullu xidmətlərdən hava nəqliyyatı ilə beynəlxalq sərnişindaşıma tarifləri ucuzlaşıb, ali təhsil müəssisələrində təhsil haqları isə bahalaşıb.
Mehriban Əliyeva Fransa prezidenti ilə görüşdü
04.09.2015
Fransada səfərdə olan Azərbaycanın birinci xanımı, Heydər Əliyev Fondunun prezidenti Mehriban Əliyeva sentyabrın 3-də Yelisey sarayında prezident Fransua Olland ilə görüşüb
Görüşdə iki ölkə arasında ikitərəfli əlaqələrin uğurlu inkişafından məmnunluq ifadə olunub. Fransa prezidenti Fransua Olland Azərbaycanın birinci xanımı Mehriban Əliyevaya Parisdə təşkil olunan mədəniyyət tədbirlərində iştirakına görə minnətdarlıq edib. Ölkələrimiz arasında münasibətlərin böyük potensialının olduğunu deyən Fransua Olland Fransa ilə Azərbaycanın iqtisadiyyat, enerji, informasiya - kommunikasiya texnologiyaları, kosmik sənaye, kənd təsərrüfatı və digər sahələrdə uğurlu əlaqələr qurduğunu vurğulayıb.
Fransanın Azərbaycan ilə əlaqələri genişləndirməkdə maraqlı olduğunu qeyd edən Fransua Olland ikitərəfli münasibətlərin gələcəkdə də uğurla inkişaf edəcəyinə əminliyini bildirib.
Mehriban Əliyeva Parisdə “Azərbaycan şəhərciyi” açdı
04.09.2015
Bu gün Parisin Luvr muzeyinin qarşısındakı məşhur Pale Royal meydanında Heydər Əliyev Fondunun təşkil etdiyi “Azərbaycan şəhərciyi”nin rəsmi açılışı olub.
Azərbaycanın birinci xanımı, Heydər Əliyev Fondunun prezidenti Mehriban Əliyeva mərasimdə iştirak edib.
Azərbaycan ərazisində yeraltı təkanlar baş verdi
04.09.2015
Azərbaycanda səhər saatlarında güclü zəlzələ baş verib.
Ölkə.az xəbər verir ki, Şirvan zonasında güclü silkələnmə qeydə alınıb. Silkələnmə Bakı şəhərində də hiss edilib.
Respublikanın müxtəlif bölgələrindən olan oxucularımızın verdiyi məlumata görə, zəlzələ təxminən saat 09:45 radələrində baş verib.
Bundan başqa, oxuculardan daxil olan digər məlumata görə, zəlzələ Şəki, İsmayıllı, Zaqatala, Balakən, hətta bir sıra Aran rayonlarında da hiss olunub.
Habil Əliyevdən xəbər var
04.09.2015
Məşhur kaman ustası, xalq artisti Habil Əliyev iki gündür komadadır
Bu barədə Ölkə.Az-a sənətkarın yaxınları bildiriblər. Qeyd olunub ki, kaman ustası iyirmi dörd saat həkim nəzarətindədir:
"Müalicəsi davam edir. Yanına ancaq övladlarını və həyat yoldaşını buraxırlar. Heç bir irəliləyiş yoxdur".
Sosial şəbəkələrdə Habil Əliyevin ölüm xəbəri yayılmışdı.
Mərkəzi Bankın valyuta ehtiyatları kəskin azaldı
04.09.2015
Azərbaycan Mərkəzi Bankının (AMB) valyuta ehtiyatları son bir ayda yenidən azalmağa başlayıb.
2015-ci ilin avqust ayının sonunda bankın valyuta ehtiyatlarının həcmi 7 milyard 315,4 milyon dollar təşkil edib.
Bu da 2015-ci ilin iyulun sonu ilə müqayisədə 1 milyard 186,1 milyon dollar azdır.
Onu da əlavə edək ki, AMB-nin valyuta ehtiyatları iyul ayının sonunda 8 milyard 501,5 milyon dollar təşkil etmişdi.
Şəkidə baş verən güclü zəlzələdən sonra evlər, məktəb və uşaq bağçaları qəzalı vəziyyətə düşdü
05.09.2015
Ötən gün Şəkidə baş verən güclü zəlzələ ilə əlaqədar qərargah yaradılıb
Ölkə.Az xəbər verir ki, Şəki RİH-i başçısının köməkçisi Ziya Vəliyevin APA-ya verdiyi məlumata görə, zəlzələdən sonra Şəki rayon Fövqəladə Hallar Komissiyasının nəzdində yaradılmış işçi qrupunun iştirakı ilə zəlzələ episentrinə yaxın yaşayış məntəqələrin sakinlərinin müraciətləri əsasında evlərə baxış keçirilib.
İlkin baxış zamanı zəlzələnin episentrinə yaxın yaşayış məntəqələrində (Turan qəsəbəsi, Çayqaraqoyunlu, Qaratorpaq, Bolludərə və s. kəndlər) 250-dən yuxarı evdə müxtəlif dərəcəli çatlar, bir neçə evin yan divarında qismən uçma halı aşkar edilib. Rayonda bir neçə məktəb, uşaq bağçası, sosial obyekt binası və evlər qəzalı vəziyyətə düşüb.
Azərbaycanda ipoteka kreditləşməsi artdı
05.09.2015
2015-ci ilin avqustun 1-nə olan məlumata görə, Azərbaycanda 65,2 milyon manat məbləğində ipoteka krediti verilib.
Ölkə.Az xəbər verir ki, bu barədə Azərbaycan Mərkəzi Bankının (AMB) son yaydığı hesabatda qeyd olunub.
Bu da 2015-ci ilin iyun ayının yekunları ilə müqayisədə 8,7 milyon manat çoxdur.
Qeyd edək ki, avqustun 1-nə olan məlumata görə, verilən kreditlərin orta məbləği 40 698 manat, kreditlərin orta illik faiz dərəcəsi 6,72%, kreditlərə görə aylıq ödəniş 297,5 manat, kreditin müddəti isə 279,7 ay təşkil edib.
“Günəşli” yatağında yeni quyu istismara verildi
05.09.2015
“Günəşli” yatağındakı 11-ci özüldən 345 nömrəli quyu qazmadan sonra istismara verilib.
Azərbaycan Respublikası Dövlət Neft Şirkətinin (SOCAR) mətbuat xidmətindən Ölkə.Az-a verilən məlumata görə, “SOCAR-AQŞ” Müştərək Müəssisəsi tərəfindən fasilə lay dəstəsinə qazılmış quyu qazlift üsulu ilə məhsul verib, 3144-3138 metr intervaldan sutkalıq 150 min kubmetr qaz və 80 ton neft hasilatı ilə istismar fonduna qəbul olunub.
Quyu “Azneft” İstehsalat Birliyinin “28 May” neft və qazçıxarma idarəsinin sifarişi ilə qazılıb.
Azərbaycanla İran razılığa gəldi
05.09.2015
İranın Mədəniyyət və İslami İrşad naziri Əli Cənnəti ötən axşam Bakıya səfəri çərçivəsində Azərbaycanın mədəniyyət və turizm naziri Əbülfəz Qarayevlə görüşüb.
Ölkə.Az xəbər verir ki, bunu İranın Azərbaycandakı səfiri Möhsin Pakayin deyib.
M.Pakayin bildirib ki, görüşdə cari ilin ikinci yarısında Azərbaycan mədəniyyət günlərinin İranda keçirilməsi haqqında razılıq əldə olunub.
Məlumata əsasən, Ə.Cənnəti bildirib ki, Azərbaycan mədəniyyət günlərinin İranda keçirilməsi iki xalqın dostluğunun daha da dərinləşməsi, əlaqələrin inkişafına təkan verəcək: “İran Azərbaycanla müxtəlif mədəniyyət tədbirlərinin, o cümlədən Kino həftəsinin keçirilməsinə hazırdır. İki ölkə xalqlarının müştərək din, dil və oxşar mədəniyyətə sahib olması mədəniyyət proqramlarının daha da alqışla qarşılanmasına səbəb ola bilər”.
Görüşdə Ə.Qarayev iranlı həmkarının Bakıya səfərindən məmnunluğunu dilə gətirib və Azərbaycan mədəniyyət günlərinin Tehrandan başqa ölkənin digər şəhərlərində, o cümlədən İsfahan, Şiraz və Ərdəbildə keçirilməsini istəyib.
Ə.Qarayev tezliklə Azərbaycanda İran kino həftəsinin keçiriləcəyindən xəbər verib.
Görüşdə qərara alınıb ki, gələn il İranın mədəniyyət günləri Azərbaycanda keçirilsin.
Ölkə.Az
