Lerikin məscid satan icra başçısı, qəssab təhsil müdiri və çoxillik problemləri

Ötən gün Lerikin deputatı İqbal Məmmədov və icra başçısı Rövşən Bağırovdan bəhs edən materialımız rayon sakinləri tərəfindən müsbət qarşılanıb. Bir qrup sakin redaksiyamızla əlaqə saxlayaraq, icra başçısı Rövşən Bağırov və onun yaxın adamı, təhsil şöbəsinin müdiri Balaşirin Nəsirovla bağlı ilginc hesab olunacaq məlumatlar ötürüblər. Əməkdaşımızın kiçik araşdırmasından sonra məlum olub ki, bu problemlər hələ bir neçə il öncədən mövcud olub.

Öncə Lerikin icra başçısı Rövşən Bağırovu tanıyaq.

Rövşən Bağırov 1966-cı ildə Bakı şəhərində anadan olub, 1983-1990-cı illərdə Azərbaycan Xalq Təsərrüfatı İnstitutunda qiyabi təhsil alıb. Hər halda, məntiqlə yanaşsaq, Bağırov ali məktəbin qiyabi şöbəsini bitirib. Çünki istər indi, istər sovet dövründə ali tibb təhsili istisna olmaqla, heç bir təhsil ocağında əyani təhsilin müddəti yeddi il deyil. Hətta qiyabi təhsil belə maksimum altı il olub.

R.Bağırov 1983 - 1985 - ci illərdə Əzizbəyov adına Neft-Kimya İnstitutu, "Əməyin mühafizəsi" kafedrasında preparator, 1985 - 1987 - ci illərdə Sovet Ordusu sıralarında bölmə komandiri, 1987 - 1989 - cu illərdə Neft-Kimya İnstitutu, "Əməyin mühafizəsi" kafedrasında laborant, 1989 - 1990 - cı illərdə Neft-Kimya İnstitutunda mühasib, 1990 - 1991 - ci illərdə Azərbaycan LKGİ MK-nın Gənclərin və Tələbələrin Respublika Qərargahında təlimatçı, 1991 - ci ildə "Gənclik" Sovet Türkiyə müştərək müəssisəsində baş mühasib 1991 - 1992 - ci illərdə "Amal" kiçik müəssisəsində baş mühasib, 1992 - 1994 - cü illərdə Səbayıl Rayon Əhalinin Məşğulluq Mərkəzində baş mühasib, 1995 - 1996 - cı illərdə "Elmarbank" Səhmdar Kommersiya Bankında kredit şöbəsinin müdiri, 1994 - 2003 - cü illərdə "Debut" Səhmdar Kommersiya Bankının "Sahil" filialında şöbə müdirinin müavini, 2003 - 2006 - cı illərdə "Bakı yoltikintiservis" Açıq Tipli Səhmdar Cəmiyyətində baş mühasib, 2006 - 2007 - ci illərdə "Sənaye Tikinti Servis" Məhdud Məsuliyyətli Cəmiyyətinin sədri vəzifələrində çalışıb.

Yəni icra başçısı olana kimi R.Bağırovun çalışdığı ən böyük vəzifə elə baş mühasiblik olub. Səkkiz ildən artıqdır ki, Lerikin icra başçısı olan Rövşən Bağırov bu müddət ərzində rayon ərazisində bir neçə istirahət mərkəzi, ticarət obyektləri tikdirib. İcra başçısına məxsus bu obyektlərin demək olar ki heç biri onun öz adına deyil.

Bunun müqabilində rayon ərazisindəki əksər yollar, xüsusən kənd yolları demək olar ki yox vəziyyətdədir. İşsizlik problemi isə kəndlərin gündən-günə boşalmasına səbəb olub. Məsələn, bir neçə il öncə Lerik kəndlərindəki məktəblərdə hər sinifdə 30-35 şagird oxuyurdusa, indi bu rəqəm 10-15 civarındadır.

Rayonun əsas problemlərindən biri də su ilə bağlıdır. Belə ki, rayonda su və kanalizasiya xətlərinin yenidən çəkilməsi üçün 28 milyon manat vəsait ayrılsa da, əksər kəndlərdə sakinlər suyu uzaq məsafədən at, yaxud eşşəklə gətirirlər. Nisbətən imkanlı ailələr isə suyun hər tonuna beş manat ödəməklə alırlar.

R.Bağırov Azərbaycanın maddi baxımdan ən imkanlı icra başçılarından hesab olunur. Belə ki, Bağırov Səbail rayonu "Dostluq" parkı ərazisinin bir hissəsində qanunsuz tikilən və ölkə prezidenti İlham Əliyevin göstərişi ilə sökülən villalardan birinin sahibiymiş. Hər halda belə bir yerdə yer almaq və üstəlik villa tikmək üçün ən azı milyonlara sahib olmaq lazımdır.

Düzdür, icra başçısı belə bir villasının olduğunu təkzib edib. Ancaq icra başçısı savadlı olmasa da, ağıllı insandır və başa düşür ki, sözügedən xəbəri təsdiqləmək ona nəyin bahasına başa gələrdi.

İcra başçısının Səbaildə iki milyonluq villasının olması ilə bağlı yazılanları inandırıcı edən başqa bir məqam ondan ibarətdir ki, R.Bağırov uzun müddət Səbail rayon ƏSSM-də baş mühasib işləyib.

R.Bağırov İslami inanclara hörmətsizliyi ilə də Lerikdə ad çıxarıb. Belə ki, bir müddət öncə Peşkətürk kəndinin məscidini sökdürən icra başçısı Züvüç kənd sakini Şahbəyim Ağayevanın vəfat etməzdən öncə evinin məscid kimi istifadə edilməsi barədə vəsiyyətinə də məhəl qoymayıb və həmin ev müəmmalı şəkildə başqa bir şəxsə satılıb.

Lerikdə təhsil deyəndə ağıla gələn millət vəkili Hüseynbala Mirələmovun xalası oğlu, hətta rayon sakinlərinin qəssab olduğunu iddia etdikləri Balaşirin Nəsirov olur. Balaşirin Nəsirov H.Mirələmovun xalası oğlu olmaqla yanaşı, icra başçısı Rövşən Bağırovun yaxın adamlarından hesab edilir. İddialara görə, B.Nəsirov 2009-cu ilin iyun ayında 20 min manat müqabilində Lerik Peşə Məktəbinə direktor, cəmi yeddi ay sonra isə 40 min manat rüşvət qarşılığında Lerik Rayon Təhsil Şöbəsinə müdir təyin olunub.

Balaşirin müəllim rayon təhsil sisteminə özünəməxsus "yenilik" də gətirib. Belə ki, şöbə müdiri hər ay Bakıdan gələn "qonaqları" yola salmaq adı ilə 47 tam orta məktəb direktorunun hər birindən 50 manat, 40 əsas məktəb direktorunun hər birindən 30 manat, ibtidai məktəb direktorlarının hər birindən 20 manat pul alır.

Hətta pul şöbə müdirinin gözünü necə tutubsa, doğma bacısına belə rəhm etməyib. Balaşirin Nəsirovun bacısı Səmayə Nəsirovanın dediklərinə nəzər salaq: “Bağçada gözətçi və süpürgəçi idim. Bu iki işin birinin pulu mənə, o birinin pulu isə Balaşirinə çatırdı. Qardaşım olduğu üçün bir söz demirdim. Sonra məni və gəlinimi ciddi əsas olmadan işdən uzaqlaşdırdı. Həyat yoldaşı Təranə bağçanın müdiridir. Gözünə xoş görünənləri işdə saxlayır, xoşuna gəlməyənləri kənarlaşdırır”.

Ancaq R.Bağırov rayonun iş adamları ilə B.Nəsirov kimi yola gedə bilmir. Daha doğrusu, iş adamları icra başçısının qeyri-qanuni tələblərinə əksər hallarda məhəl qoymadıqlarından bu iki cəbhə arasında əməlli-başlı "soyuq müharibə" yaşanır. Belə ki, rayona dövlət büdcəsindən ayrılan pulları təyinatından yayındıran icra başçısı əvəzində yerli iş adamlarını sıxışdıraraq həmin işləri onların maliyyəsi ilə reallaşdırır.

Rayonla bağlı əldə etdiyimiz digər məlumatları yaxın günlərdə diqqətinizə çatdıracağıq.

Ölkə.Az-ın analitik şöbəsi