Azərbaycanda bu universitet bağlandı

Tələbələrin digər ali təhsil müəssisələrində yerləşdirilməsini xahiş edib

Ölkə.Az xəbər verir ki, Bakı Asiya Universitetinin fəaliyyəti dayandırılıb.

Universitet Təhsil Nazirliyinə müraciət edərək, ali təhsil müəssisəsinin fəaliyyətinin müvəqqəti dayandırılması barədə bu ali məktəbin Elmi Şurasında qərarın qəbul edildiyini bildirmiş və hal-hazırda təhsil alan tələbələrin digər ali təhsil müəssisələrində yerləşdirilməsini xahiş edib.

Təhsil Nazirliyi tərəfindən Universitetin xahişi təmin olunub və 8 ixtisas üzrə təhsil alan 270 tələbənin digər universitetlərdə təhsillərinin davam etdirilməsinə razılıq verilib. Tələbələrin müvafiq ali təhsil müəssisələrinə yerləşdirilməsi mərkəzləşdirilmiş qaydada aparılacaq və proses sentyabrın 10-dək başa çatdırılacaqdır.

Xatırladaq ki, ötən il Azərbaycan İctimai-Siyasi Universiteti bağlanmışdı.

Azərbaycan İctimai-Siyasi Universitetinin lisenziya müddəti başa çatmış və nazirlik bu universitetin lisenziya müddətinin uzadılmaması barədə qərar qəbul etmişdi.

Rəşid Mustafazadə

Ölkə.Az