Saatlı İcra Hakimiyyəti kənd sakinlərinə söz verdi, tutmadı

Ötən həftə sentyabrın 3-ü Saatlı rayon İcra Hakimiyyətinin birinci müavini İlham Quliyev Azadkənd sakinlərini qəbul etmişdi

Azadkənd sakinlərinin şikayətini yenidən dinləyən icra başçısının birinci müavini kənd sakinlərinə söz verib ki, bazar ertəsi, yəni sentyabrın 7-də kəndə ekskovator göndəriləcək və balıq vətəgəsinin qarşısı açılaraq kəndin qrunt sularına görə yaşadığı problem öz həllini tapacaq. İlham Quliyev kənd sakinlərinə həm də söz verib ki, balıq vətəgəsi kimi istifadə edilən hövzənin sərəncamı ləğv ediləcək və həmin hövzə əvvəlki vəziyyətinə qaytarılacaq.

Azadkənd sakinləri Hacıyev Babək, Cəfərov Cəfər, Cabbarov Elşad, Səfərov Vahid, Qurbanov Savadxan, Hacıyev Ataman və Cəfərov Vidadinin Ölkə.Az-a verdiyi məlumatda bildirilir ki, İlham Quliyevin verdiyi sözün üstündən bir neçə gün keçməsinə baxmayaraq verdiyi söz elə söz olaraq da qalıb.

Azadkənd sakini Cəfərov Cəfər deyir ki, ona məxsus əkin sahələri balıq vətəgəsinə görə istifadəyə tamamən yararsız qalıb:

"Torpaq sahəsi əkirik, toxum səpirik, lakin ondan gəlir götürə bilmirik. Səbəb də kəndin qrunt və çıxar sularının axdığı gölün balıq vətəgəsinə çevrildikdən sonra torpaq sahələrinin su altında qalmasıdır".

Azandkəndin icra nümayəndəsi Anaxanım xanım Ölkə.Az-a artıq problemin həll edildiyini desə də, kənd sakini Babək Hacıyev isə bildirdi ki, Anaxanım xanım indiyənə qədər Azadkəndin heç bir problemini həll etməyib. Qrunt suları əslində mart, aprel, may aylarında qalxır. Biz o zaman müraciət edərkən bizi arxayın etdilər ki, məsələ həll olunacaq. İndi su aşağıya çəkilib deyə, deyirlər ki, problem həll olunub. Ancaq mart, aprel, may ayları gələndə qrunt suları yenidən torpaq sahələrimizi işğal edəcək. Bu zaman yenidən bizi süründürəcəklər:

"Hər il 1 hektara 40 sentner taxıl götürürdüm, ancaq göl balıq vətəgəsinə çevriləndən sonra 1 hektara heç 20 sentner taxıl götürə bilmirəm. Deyirlər, vətəgənin qarşısındakı borunun önünü açdırmışıq. O borunun önünü açdırmasalar da olar, onsuzda indi qrunt suları dərinlikdədir. Yaz gələndə torpaqlarımız yenidən su altında qalacaq. Bizim istəyimiz odur ki, bənd dağıdılsın, yazda torpaqlarımız qrunt sularının altında qalmasın" - Babək Hacıyev deyib.

Bənd o qədər güclü bənddir ki, icra başçısının birinci müavini İlham Quliyevin də o bəndi dağıtmağa gücü çatmır. Balıq vətəgəsini alan Bəhrəm adlı şəxs gölün pulunu verdiyi üçün icra başçısı Siracəddin Cabbarov bəndin dağıdılmasına icazə vermir. Ya pulu qaytarmaq lazımdır, ya da kənd camaatını süründürmək. Pul şirin olduğu üçün Siracəddin Cabbarov süründürməçiliyi üstün tutur.

Görünür ölkə başçısının kənd təsrrüfatına, kəndlilərə qayğı göstərilməsi tapşırığı rayon rəhbərliyinin vecinə deyil...

Məsələyə yenidən qayıdacağıq...

Səxavət Məmməd
Ölkə.Az