Ötən gecə Ağdam - müxbirimizin cəbhədən

Ağdam cəbhəsi dünən gecə...

Cəbhə xəttində gərginlik davam edir.

Dünən gün ərzində Ağdam rayonunun Çıraqlı, Çəmənli, Güllücə, Hacıməmmədli kəndləri istiqamtində mövqelərimiz atəşə tutulub.

Ölkə.az-ın Ağdam rayonuna ezam olunmuş müxbiri Səxavət Məmmədin bölgədən verdiyi məlumata görə, gündüz vaxtları Ağdam istiqamətində atəş səsi eşidilməyib.

Müxbirimizin gündüz vaxtı baş çəkdiyi Çəmənli, Çıraqlı, Əhmədavar, Əfətli, Qaradağlı, Hacıməmmədli kəndləri istiqamətində atəşkəs pozulmayıb. Kənd əhalisi arasında panika yoxdur. Atəşkəsin pozulmasının intensivləşməsinə baxmayaraq insanlar arasında təşviş, qorxu hiss olunmur, əksinə yerli əhalidə görünməmiş ruh yüksəkliyi müşahidə olunur..

Axşam saat 21:30-a qədər cəbhədə tam sakitlik hökm sürüb. Saat 21:45-dən başlayaraq düşmən tərəfi atəşkəsi pozub və ordumuz onlara cavab zərbələri endirməyə başlayıb.

Saat 21:45

Çıraqlı və Güllücə istiqamətində 10-12 dəqiqə ara ilə atəş səsləri eşidilib. Saat 00:00-a qədər Çıraqlı istiqamətində atəşkəs 50 dəfə pozulub.

Saat 00:45

Güllücə, Çıraqlı, Çəmənli, Hacımmmədli istiqamətində atəşkəs intensiv şəkildə pozulub. Düşmənin avtomat və pulemyotlardan açdığı atəşə ordumuz qarşılıq verib.

Saat 02:30

Çıraqlı istiqamətində pulemiyotlardan qarşılıqlı olaraq atəş səsləri eşidilib. 02:30-dan başlayaraq yenidən aramsız atəş səsləri eşidilməyə başlayıb və uzun müddət atışma səngiməyib.

Saat 02:45

Çıraqlı istiqamətində gərgin döyüş gedib. Hər iki tərəfin polomuyotları susmayıb. Atışmanın şiddətli vaxtında əməkdaşımız Çıraqlı kəndində küçələrə baş çəkib və əhali arasında heç bir təşviş müşahidə olunmayıb. Kənd camaatı yerindədir və heç kəsin evini tərk etmək fikri niyyətinin olmadığı bildirilir.

Saat 03:30

Çıraqlı istiqamətində atəş səsləri kəsilib. Güllücə istiqamətində isə pulemyotlar dayanmadan guruldayıb. Güllələrin uçuşu aydın şəkildə müşahidə olunub.

Saat 04:30

Ağdamın cəbhəyani ərazilərində bütün istiqamətlərdə atəş səsləri azalıb. 5-10 dəqiqədən bir atəş səsləri eşidilib. Ötən günə nisbətən bu gün intensiv döyüş çox az olub.

Saat 05:40

Bir saata yaxın atəş səsləri demək olar ki, eşidilməyib. Ancaq saat 05:40 radələrindən başlayaraq yenidən Güllücə və Çıraqlı istiqamətində döyüşlər başlayıb.

Saat 06:30

Hava işıqlandıqca atəş səsləri demək olar ki, kəsilib. Ağdamın Güllücə, Çıraqlı, Çəmnəli, Qaradağlı, Hacıməmmədli istiqamətində gedən döyüşlər dayanıb.

Material əməkdaşımız tərəfindən Çıraqlıdan hazırlanıb.

Səxavət Məmməd, Ağdam Çıraqlı

Ölkə.az