“Gələn il ölkə üzrə qazlaşdırma 95 faizə çatdırılacaq”

Ağdaş rayonunun Korarx, Şəkili və Cüvə kəndlərinə uzun illər fasilədən sonra təbii qaz verilib

APA-nın yerli bürosunun xəbərinə görə, yaşayış məntəqələrinə təbii qazın verilməsi münasibəti ilə təntənəli mərasim keçirilib.

Mərasimdə çıxış edən Azərbaycan Dövlət Neft Şirkətinin prezidenti Rövnəq Abdullayev və rayon icra hakimiyyətinin başçısı Tofiq İbrahimov kənd sakinlərini uzun illərdən sonra təbii qazdan istifadəyə başlamaları münasibətilə təbrik ediblər.

Ölkəmizdə reallaşan sosial layihələrdən bəhs edən R. Abdullayev hər kənddə qazlaşdırmanın xüsusi diqqət mərkəzində saxlanıldığını söyləyib. O, bu istiqamətdə görülən işlərə diqqəti cəlb edərək gələn il respublika üzrə qazlaşdırmanın 95 faizə çatdırılacağını bildirib. “Azərbaycanda yaşayış məntəqələrinin sürətlə qazlaşdırılması kommersiya məqsədi daşımır, sosial xarakterlidir. Ölkə başçısı İlham Əliyevin tapşırığına əsasən 2018-ci ilədək ölkəmizin bütün yaşayış məntəqələrinin tam qazlaşdırılması qarşımıza əsas vəzifə kimi qoyulub”.

Tədbirdə bildirilib ki, Korarx kəndində 6390 metr, Şəkili kəndində 17334 metr, Cüvə kəndində isə 8278 metr uzunluğunda müxtəlif diametrli metal və polietilen borularla qaz xətti çəkilib. Üç kənddə ümumilikdə 440 abonent “mavi yanacaq”la təmin olunub. Bütün evlərə qaz sayğacı və fərdi tənzimləyici quraşdırılıb.

Qeyd edilib ki, indiyədək Ağdaş rayonunda 48 yaşayış məntəqəsi qazlaşdırılıb. Hazırda rayonun Qoşaqovaq, Pirkəkə və Aşağı Ləki kəndlərinin qazlaşdırılması üçün işlər görülür. İlin sonunadək Ağdaşda daha 10 kəndin qazlaşdırılması nəzərdə tutulur. Məlumat verilib ki, bu ilin sonunadək Ağdaşda yaşayış məntəqələrinin 75 faizi təbii qazla təmin olunacaq.

Kənd ağsaqqalları, ziyalılar çıxışlarında əhaliyə təbii qazın verilməsinin kəndlərdə bayrama çevrildiyini bildiriblər. Sonra kəndlərə təbii qazın verilişi münasibətilə rəmzi məşəl alovlandırılıb. Mərasim iştirakçıları evlərə baş çəkib, “mavi yanacağ”ın təzyiqini yoxlayıblar.

Ölkə.Az