Müəllimlərin əmək haqqı 35 faiz artıb

Bakıda 7 760 nəfər müəllimin əmək haqqı 500-1000 manat, 466 müəllimin əmək haqqı isə 1000 manatdan yuxarıdır.

Bunu təhsil nazirinin müavini, Bakı Şəhəri üzrə Təhsil İdarəsinin rəisi səlahiyyətlərini icra edən Ceyhun Bayramov Bakı şəhəri təhsil işçilərinin sentyabr konfransında çıxışı zamanı deyib.

Onun sözlərinə görə, Bakı Şəhəri üzrə Təhsil İdarəsinin tabeliyindəki məktəblərdə çalışan müəllimlərin əmək haqqı orta hesabla 35 faiz artıb.

Nazir müavini bildirib ki, Bakı şəhərində müəllimlərin orta əmək haqqı ilə ölkə üzrə orta əmək haqqı arasındakı geriləmə aradan qaldırılıb. Hazırda bu fərq 6 faiz təşkil edir.

C.Bayramov deyib ki, ölkədə məktəbəqədər hazırlıqla əhatə səviyyəsi çox aşağıdır. TN bu sahədəki göstəriciləri yüksəltmək üçün ötən il 87 məktəbdə 3006 uşaq məktəbəqədər hazırlıq kurslarına cəlb edilib.

Nazir müavini qeyd edib ki, 2015-ci ildə Bakıda çoxmərhələli seçim əsasında 24 nəfər ümumi təhsil müəssisəsinin direktoru vəzifəsinə təyinat alıb. Son 2 ildə müsabiqə yolu ilə 79 nəfər yeni direktor müavini təyin edilib.trend

Ölkə.Az