Azərbaycanın üç ali məktəbi dünya reytinqində
Dünya universtitetlərinin nüfuzlu “QS World University Rankings 2015/2016” reytinqində Azərbaycanın üç ali məktəbi – Bakı Dövlət Universiteti (BDU), Xəzər Universiteti və Qafqaz Universiteti yer alıb.
BDU reytinqdə 701+ yerdə qərarlaşıb. 2014-cü ilin reytinqi ilə müqayisədə Azərbaycanın ən böyük ali məktəbinin mövqeyi dəyişməyib.
Reytinqdə Qafqaz Universiteti də 701+ yerdədir. Lakin ötən illə müqayisədə ali məktəb mövqeyini pisləşdirib. Belə ki, ötən il Qafqaz Universiteti 651-ci yerdə olub.
Reytinqdə yer alan Xəzər Universiteti isə 651-700-cü yerdə qərarlaşıb. 2014-cü il ilə müqayisədə ali məktəb mövqeyini yaxşılaşdırıb. Belə ki, ötən il ali məktəb 701-ci yerdə olub.
“QS World University Rankings 2015/2016” reytinqində ilk yerləri Massaçusets Texnologiya İnstitutu (1-ci yer), Harvard (2-ci yer), Kembric və Stenford universitetləri (hər ikisi 3-cü yer) tutub. İlk beşliyə Kaliforniya Texnologiya İnstitutu yekun vurur.
Reytinqin tərtib olunmasında bir neçə meyar – akademik aləmdən olan ekspertlərin rəyi, professor-müəllim heyətinin tələbələrin sayına nisbəti, işəgötürənlər arasında reputasiyası, sitat gətirilmə indeksi, həmçinin xarici müəllim və tələbələrin payı nəzərə alınıb.oxu.az
Ölkə.Az