SOCAR-ın \"qazını satan\" deputat

Ölkə.az "Deputatlarımızı tanıyaq" silsiləsindən olan rubrikasını davam etdirir.

Portalımızın bu gün oxucuları ilə tanış edəcəyi deputat Parlamentin gənc sayılacaq üzvlərindən biri, kriminal və biznes dairələrində yaxşı tanınan Aydın Abbasovdur.

Aydın Abbasov özündən də qat-qat məşhur olan, yaxın tanışlarının təbirincə desək, "oğru ilə oğru, doğru ilə doğru" olan keçmiş baş nazirin müavini Abbas Abbasovun oğludur.

Ali təhsilini Bakıda, daha sonra orta peşə təhsilini Londonda başa vuran Aydın Abbasov hər bir yaşıdının həsəd apara biləcəyi sürətlə böyük karyera qurub.

1998-ci ildə, yəni 22 yaşı olanda Aydın Abbasov atasının sayəsində SOCAR-ın qaz satışından cavabdeh şəxs olub. 22 yaşında hələ əhaliyə satılan qazın kub metrinin neçəyə olduğunu bilməyən Aydın Abbasov Dövlət Neft Şirkətinin Xarici Sərmayələr İdarəsində Qazın satışı və marketinqi şöbəsinə nə az, nə çox, düz 7 il başçılıq edib. 2005-ci ildə isə 29 yaşlı bala Abbasovun artıq deputat ola biləcəyi düşünülərək dədə-baba yurdu qədim Gəncədən namizədliyi irəli sürülüb. Dalbadal iki müddətə Gəncənin deputatı olan Aydın Abbasov qanunvericilikdən çox yenə də biznesi ilə məşğul olub. Onun mütəmadi olaraq Moskvaya getməsi və orada uzun müddət qalması heç kimə sirr deyil. Ata və bala Abbasovlar Rusiyanın kriminal-biznes dairələri ilə sıx bağlıdırlar. Hətta kriminal jarqon Aydın Abbasovun ritorikasına da təsirsiz ötüşməyib. Haqqında çıxan tənqidi yazılara görə dəfələrlə jurnalistləri "razborkaya" çağıran, hədə-qorxu gələn, kriminal aləmdə "Aydınçik" kimi tanınan Aydın Abbasov ictimaiyyətdə qıcıq yaradan "kifir deputatlar" sırasındadır.

Onun bu dəfəki seçkilərdə iştirakı haqda isə hələlik heç bir məlumat yoxdur.

Dosye:

Abbasov Aydın Abbas oğlu 1976-cı il avqustun 26-da Gəncə şəhərində anadan olub. Londondakı Amerika kollecinin biznesi idarəetmə fakültəsini və Bakı Dövlət Universitetinin hüquq fakültəsini bitirib. Rus və ingilis dillərini bilir. 1998–2005-ci illərdə Azərbaycan Respublikası Dövlət Neft Şirkətinin Xarici Sərmayələr İdarəsində Qazın satışı və marketinqi şöbəsinin rəisi vəzifəsində çalışıb.

Bitərəfdir. 2005-ci ildə 37 saylı Nizami birinci (Gəncə) seçki dairəsindən deputat seçilib. Milli Məclisin Beynəlxalq münasibətlər və parlamentlərarası əlaqələr komitəsinin üzvüdür. Azərbaycan-Özbəkistan parlamentlərarası əlaqələr üzrə işçi qrupunun rəhbəri, Azərbaycan-Birləşmiş Ərəb Əmirlikləri, Azərbaycan-Böyük Britaniya, Azərbaycan-İndoneziya, Azərbaycan-Küveyt, Azərbaycan-Latviya, Azərbaycan-Lüksemburq parlamentlərarası əlaqələr üzrə işçi qruplarının üzvüdür. Avropa Şurası Parlament Assambleyasında Azərbaycan nümayəndə heyətinin üzvüdür.

Ölkə.Az