QAT sədri: \"Biz ermənilərə 100 il bundan qabaq da sığınacaq vermişdik...\"

Ermənistanın müxalifət liderlərlərindən biri Azərbaycandan siyasi sığınacaq istəyir

Ermənistan “Milli Azadlıq Hərəkatı” təşkilatının rəhbəri Vaan Martirosyan Azərbaycandan siyasi sığınacaq istəyib.

Martirosyan rəhbərlik etdiyi müxalif yönümlü “Milli Azadlıq Hərəkatı” təşkilatının fəaliyyətinə görə, Ermənistanın dövlət orqanlarının və ayrı-ayrı səlahiyyətli şəxslərinin təzyiqlərinə məruz qalıb.

Erməni siyasətçinin Azərbaycandan sığınacaq istəməsinə QAT-nın sədri Akif Nağı Ölkə.Az-da münasibət bildirib:

"Bu onu göstərir ki, Ermənistanda vəziyyət çox ağırdır. Siyasətçilərə, partiyalara və təşkilatlara qarşı təzyiqlər güclüdür. Ermənilər çıxılmaz vəziyyətdədirlər. Hər yerdən ümüdlərini üzüblər, nə Avropaya üz tuta bilirlər, nə də Rusiyaya. İnanmıram ki, həmin erməni səmimi şəkildə Azərbaycana gəlmək istəsin. Onun bu hərəkəti öz hökumətlərinə təzyiq formasıdır. Ancaq prinsip etibarı ilə, hər hansısa bir erməninin Azərbaycana gəlməsinin əleyhinəyik. Çünki biz onlara 100 il bundan qabaq da sığınacaq verdik. Əvəzində xalqımıza qarşı bütün xəyanətləri etdilər, xalqımız onlardan olmazın əziyyətlər gördü. Son illərdə də olanlar göz qabağındadır. Kim olur olsun, hansısa bir erməninin Azərbaycanda yaşamasına müsbət yanaşmaq olmaz".

Səxavət Məmməd
Ölkə.Az