Məşhur alimimiz: \"Heç kim bilmir ki, Türkiyə 2002-ci ildə Azərbaycanın hesabına dünya çempionatında üçüncü oldu\"

Arif Səlimov Azərbaycanın həndəsə üzrə yeganə elmlər doktorudur. Hazırda Türkiyənin aparıcı ali məktəblərindən olan Atatürk Universitetinin professorudur. Bir neçə gün öncə qardaş ölkənin Elmi və Texniki Araşdırmalar Komitəsinin (TÜBİTAK) ən nüfuzlu mükafatlarından olan “PPÖ-Proje Performans Ödülü”nə layiq görülüb

Elə biz də Ölkə.Az olaraq alimimizlə görüşüb Azərbaycan elmi, ölkəmizdə həndəsə sahəsinin durumu və digər məsələlərlə bağlı söhbətləşməyi qərara aldıq.

(Müsahibənin ilk hissəsini buradan oxuya bilərsiniz)

- Türkiyədəki derbiləri izləmisinizmi?

- Vaxt olduqca gedib baxıram.

- Hobbiniz nədən ibarətdir?

- Hobbim daha çox futboldur. Futbolun 50-ci illərdən bu tərəfə bütün tarixini bilirəm. İmkan olduqca bütün oyunları izləyirəm. Hətta riyaziyyatı seçməsəydim, futbol jurnalisti olardım.

- Niyə bizim futbol axsayır?

- Futbol da elm kimi 3-5 günə inkişaf edəcək sahə deyil. Buna da illər lazımdır. İspaniya, İtaliya, Almaniya, İngiltərə futbolunu götürün. Onlar da illərlə inkişaf edib. Türkiyədə son illərdə futbola böyük pullar qoyuldu.

- Amma indi Türkiyə futbolu durğunluq dövrünü yaşayır.

- Bəli, elədir. Deyim ki, Azərbaycan klublarının son oyunlarını seyr etdim və çox xoş təəssüratlarım var. Özəlliklə "Qarabağ" və "Qəbələ"ni qeyd edə bilərəm. "Qarabağ" "Barselona" tipində oyun oynayırdı. Artıq rəqiblər bu komandadan çəkinirlər. Bəziləri legionerlərin əleyhinədir. Amma əcnəbi futbolçuyla bir yerdə oynayıb, ondan da nələrisə öyrənirsən. Məsələn, Qara Qarayev, Cavid Tağıyev, Bədavi Hüseynov son illər yetişən yaxşı futbolçulardandır. Xüsusən Qara Qarayevin oyunu çox xoşuma gəldi, hərəkətlidir. Bəziləri yaşlanıblar, həmin mövqelərdə daha hərəkətli gənclər oynamalıdırlar.

- Bəs milli komandada?

- Əslində milli komandaya bizim yerli mütəxəssislərdən cəlb etmək lazım idi. Qurban Qurbanov millinin başına gətirilsəydi, daha uğurlu olardı. Hətta mənə elə gəlir ki, gələcəkdə belə olacaq.

- Sizcə Qurban Qurbanovun əcnəbi mütəxəssislərdən fərqi və özəlliyi nədən ibarətdir?

- Əvvəla, bu adam ölkənin bütün incəliklərini bilir, millidə 15 qol vurub. Xarici mütəxəssislər milli komanda səviyyəsində çox da uğurlu olmurlar. Hələ ki Prosineçki pis getmir. Amma baxaq da.

- Malta ilə səfər oyununun izlədinizmi?

- Bəli, baxdım. Orada bəxt rəqib tərəfdə oldu. Çünki 90 dəqiqə üstün idik.

- Millimizin son illərdə keçirdiyi oyunlardan hansı daha çox yadınızda qalıb?

- Azərbaycan 2002-ci ildə Slovakiyanı 2:0 udaraq Türkiyəyə yol açdı. Həmin il Türkiyə dünya çempionatında üçüncü olmuşdu. Onu heç kəs demir. O zaman Türkiyədə deyirdilər ki, Azərbaycan bizə qarşı daha ciddi oynayır. Amma halbuki Türkiyəyə yolu Azərbaycan açmışdı. Bu mənə görə unudulmaz oyun idi.

- İdmançı ola bilərdinizmi?

- İndi də futbol oynayıram. Axşamlar formada qalmaq üçün futbol oynayırıq. Komandamızın adı "Geometrispor"du. Türkiyədə yetişdirdiyim tələbələrim var ki, indi bir çoxu dosent, professordur. Məni mərkəz hücumçusu oynadırlar. Onlar məndən daha sürətlidirlər. Bir yoldaş deyir ki, ötürmələrin hamısı sizə gəlir. Deyirəm ki, mən bunlara elm öyrətmişəm, bunlar da mənə pas verirlər (gülür).

- Türkiyədə kimləri bəyənirsiniz?

- (düşünür) Bir neçə oyunçu var. Hazırda Arda fərqlənir. Çalhanoğlunu da bəyənirəm. Dünyanın ayrı-ayrı millilərindəki türkləri yığıb bir komanda düzəltsəydilər, dünya ulduzlarının toplumu olardı. Bircə Messi əskik idi.

Söhbətləşdi: İntiqam VALEHOĞLU
Foto:Nurlan Gülməmmədov