Azərbaycansayağı "burjua inqilabı" və "kamalizm hərəkatı"
Gömrük strukturlarında kök salmış qruplaşamalar arasındakı daxili çəkişmə ölkənin ən nüfuzlu məmur-oliqarxı olan Kəmaləddin Heydərovun biznes - imperiyasını sarsıtmaqdadır.
Gömrük komitəsindəki etibarlı mənbənin verdiyi məlumata görə, Azərbaycanın ticarət dövriyyəsi üzərindəki inhisarı tam ələ keçirmək uğurunda iki qruplaşma arasında ölüm-dirim savaşı başlanıb.
Məlumatda bilidirilir ki, qruplaşmalrdan birinin və ən güclüsünün lideri Bakı Baş Gömrük İdarəsinin rəisi Vüsal Novruzov "Transbroker" adlı qurumun rəhbəri Əbülfəz Məlikovu sıradan çıxarmaq istəyir. Xatırladırıq ki, adı çəkilən qurum ölkəyə gətirilən və ölkədən aparılan yüklərin aktlaşdırılması, yük və yükün sahibi, (istər hüquqi şəxs olsun, istər fiziki), hərəkət istiqaməti və sair haqqında tam və dəqiq informasiya toplamaqla məşğuldur. Mənbə bildirir ki, yaradıldığı gündən bu yana gömrük müfəttişlərinin "çörəyini kəsən " "Transbroker" və onun ağıllı rəhbəri Əbülfəz Məlikov Komitənin rəhbərlərinin bir nömrəli düşməninə çevrilib.
Fəaliyyət göstərdiyi 10 ildən çox bir müddətdə gömrük məntəqələrində hər il milyardlarla manat yeyintinin və dövlət büdcəsindən yayınmanın qarşısını alan "Transbroker"i sıradan çıxarmaq üçün "gömrük oliqarxları" tam gücləri ilə səfərbər olublar. Bir vaxtlar gömrüyün daxili nizamnaməsinə strukturun "xaç atası" Kəmaləddin Heydərovun şəxsən özü tərəfindən edilən "əlavə və dəyişikliklər" hazırda gömrükçüləri "Transbroker" əmədaşlarından tam asılı vəziyyətə salmışdır. Məsələn, istənilən yükün, istənilən ünvanda açılmasında brokerin iştirakı vacibdir, əks təqdirdə yükün açılması qanunsuz hesab olunur və yükün açılmasına göstəriş vermiş gömrük inspektoru vəzifəsindən azad edilir.
Ölkəyə mal gətirən firmaların nümayəndələri və ya birbaşa malı gətirən fiziki şəxslərin özləri ilə cinayət əlaqəsinə girərək malın kəmiyyətini, tutumunu, təyinatını və markasını səhv yazaraq külli miqdarda pul mənimsəmək "Transbroker" sisteminin sayəsində gömrükçülərə müyəssər olmur. Hər il milyardlarla manat vəsaitin burunlarının ucundan axaraq dövlətin büdcəsinə daxil olması isə gömrük oliqarxlarını sinir xəstəliyinə məruz qoyur. Odur ki, vəziyyəti tam olaraq nəzarətə götürmək, "Transbroker" rəhbərini sıradan çıxarmaqla bu strukturu da öz əllərinə keçirmək üçün başda BBGİ rəisi Vüsal Novruzov olmaqla "iribuynuzlu gömrük zubrları" artıq iki ildir ki, Əbülfəz Məlikova qarşı hərtərəfli təzyiq rıçaqlarını işə salaraq müharibə aparırlar. Mənbənin xəbərində hələlik Əbülfəz Məlikovun tutduğu vəzifədən azad edilərək həbs edilməsinə yuxarıların razılıq vermədiyi bildirilir.
Onu da qeyd edirik ki, "iribuynuzlu gömrük zubrlarının" "Transbroker"ə və "kamalist inhisarlaşma" əleyhdarlarına qarşı hücumlarının əsasını bir vaxtlar "Jalə mediası", hazırda isə ideoloji baxımdan eyni xəttə aid olduqlarına görə, "kamalist media" adlandırılan KİV-lər vasitəsilə aparılan informasiya müharibəsi təşkil edir. Ölkə iqtisadiyyatının inhisara alınması üçün gömrükdə kök salmış regional klanların apardıqları 20 illik amansız müharibə artıq monipoliyada "kamalizm hərəkatı" yaratmış və sosializmin dağılmasından sonra gözlənilən burjua inqilabı yerinə "kamalizm oliqarxiyası"nın qələbəsi ilə nəticələnən daxili mafioz çevrilişi həyata keçirmişdir. Dünyada siyasi "marksist" və "makiavellist" inqilabların baş verdiyi kimi, artıq dünya praktikasında yeni, yalnız Azərbaycanda gerçəkləşmiş və digər ölkələrin də nümunə götürə biləcəyi "kamalist inhisarlaşma inqilabı" baş vermişdir.
Bu "inhisarlaşma inqilabı"nın nəticəsində məlum klanın istismarı altına düşmüş ölkə iqtisadiyyatının "kamalistlərə" gətirdiyi milyardlar son 10 ildə "altdan" tərəfdaş medianın və yeni "kamalist" medianın yaranmasına, son bir-iki ildə isə Azərbaycanda siyasi hakimiyyəti tam olaraq ələ keçirməyə yönəlmişdir. Məlumata görə, 2015-ci il parlament seçkilərinə "kamalist media" xüsusi iş planı ilə hazırlaşır. Yeni parlamentdə "fövqəlnazir" əvvəlkindən daha çoxsaylı və daha güclü bir "kamalist fraksiya" ilə təmsil olunmağı hədəfləyir. YAP-ın siyasi şurasına və bitərəflərin arasına yeridilmək üçün indidən "kamalist klanın" agentləri hazırlanır. Məlumata görə bütün prosseslər "Titanın" (K.H) şəxsi nəzarəti altında həyata keçirilir və "kamalist inqilabın" gerçıkləşməsinə rəhbərlik edən şəxslərin hamısı birbaşa onun təlimatları ilə hərəkət edirlər.
Mənbə bildirir ki, bu yaxınlarda "fövqəlnazirin" şəxsi mühafizəsinə xüsusi hazırlıqlı daha 50 nəfər ştatdankənar cangüdən cəlb olunub. Onun zirehli avtomobili əlavə naviqasiya və radar sistemi ilə təchiz olunub.
"Kamalist fraksiyanın" potensial üzvləri haqda oxucularımıza növbəti materiallarımızda məlumat verəcəyik (Redaksiya).
Ölkə.az-ın monitorinq şöbəsi
