20 kq narkotiklə saxlanıldılar

"Dedi ki, gəl, çayda narkotik var, sənə 300 manat verəcəyəm"

Ölkə.Az xəbər verir ki, İrandan Azərbaycana keçirdikləri narkotik vasitədən qazanc əldə etmək istəyən dəstə saxlanıldı.

Respublikanın daxili işlər orqanları tərəfindən mütəşəkkil cinayətkarlıqla mübarizə sahəsində daha bir uğurlu əməliyyat tədbiri həyata keçirilib və nəticədə qanunsuz dövriyyədən külli miqdarda narkotik vasitə çıxarılıb.

Belə ki, daxil olmuş əməliyyat məlumatı əsasında Biləsuvar Rayon Polis Şöbəsi əməkdaşlarının sentyabrın 16-da həyata keçirdikləri tədbirlərlə Cəlilabad rayon sakini Şahin Cəfərovun idarə etdiyi “VAZ-2107” markalı avtomobil saxlanılıb. Baxış zamanı bu nəqliyyat vasitəsindən ağır tərkibli narkotik vasitələr olan 19,5 kiloqram tiryək və 830 qram heroin aşkar edilərək götürülüb. Polis əməkdaşları tərəfindən Şahin Cəfərovu və avtomobildə olan Yardımlı rayon sakinləri - Ərəstun İbayev, Elvin Ağayev və Baloğlan Əmrahov şübhəli şəxs qismində saxlanılıblar.

İlkin araşdırmalarla sürücü və onun sərnişinlərinin qabaqcadan cinayət əlaqəsinə girdikləri və İran İslam Respublikasından ölkəmizə qaçaqmal yolu ilə keçirilən külli miqdarda narkotik vasitəni qazanc məqsədi ilə satmaq istədikləri müəyyən edilib.

Baloğlan Əmrahov - saxlanılan şəxs: "İran vətəndaşı qohumum zəng eləyib dedi ki, narkotik var, get onu götür. Üçümüz gedib malı götürdük, gətirdik çaya. Biləsuvar rayonunda yaxalandıq".

Şahin Cəfərov - saxlanılan şəxs: "Baloğlan zəng eləyib dedi ki, gəl, çayda narkotik var, onu götürək. Dedi ki, sənə 300 manat pul verəcəyəm".

Hazırda cinayətin digər iştirakçılarının da tapılıb tutulmaları və məsuliyyətə cəlb olunmaları istiqamətində zəruri istintaq hərəkətləri və əməliyyat-axtarış tədbirləri davam etdirilir. (Region TV)

 

Ölkə.Az