Vətən müharibəsi Cənubi Qafqazın tarixini dəyişib - AÇIQLAMA

“Vətən müharibəsi Azərbaycan tarixinin ən şərəfli səhifələrindən biri olmaqla yanaşı, bütün Cənubi Qafqazın tarixini dəyişən möhtəşəm hadisədir. Azərbaycanın 30 ildən sonra öz ərazi bütövlüyünü bərpa etməsi regionda yeni təhlükəsizlik arxitekturasının formalaşması baxımından unikal əhəmiyyətə malikdir”. 

Bu fikirləri “Ölkə.Az”a açıqlamasında Milli Məclisin deputatı Soltan Məmmədov deyib. 

Deputat bildirib ki, Müzəffər Ali Baş Komandanın rəhbərliyi altında güclənən və ən müasir silahlarla təchiz edilən Azərbaycan ordusu 30 ilə yaxın dövr ərzində Ermənistanın işğal altındakı ərazilərdə qurulmuş güclü hərbi istehkamları, maneələri, müdafiə xətlərini 44 gün ərzində dağıtmağa müvəffəq oldu: “Vətən müharibəsində silahlı qüvvələrimizin istifadə etdiyi strategiya və taktika bu gün dünyanın bir çox ölkələrində öyrənilir. Təbii ki, Vətən müharibəsində qələbəni təmin edən digər amil xalqımızın Ali Baş Komandanın ətrafında sıx birləşməsi, möhkəm ideoloji təmələ əsaslanan milli həmrəylik, yüksək vətənpərvərlik ruhu idi. Azərbaycan ordusuna döyüş meydanında müqavimət göstərə bilməyən Ermənistan isə dinc sakinləri hədəf aldı. Müharibə dövründə Ermənistan silahlı qüvvələri tərəfindən Azərbaycan ərazisinə 30 minə yaxın mərmi və 227 raket atıldı. 400-dən çox mülki şəxs yaralandı, 93 dinc sakin qətlə yetirildi. Lakin bu dəhşətli faciələr belə xalqımızın, dövlətimizin, ordumuzun iradəsini sarsıda bilmədi”. 

Millət vəkili vurğulayıb ki, bir neçə gün öncə Qarabağ iqtisadi rayonunda keçirilən antiterror tədbirləri bir daha Azərbaycanın gücünü, iqtisadi, hərbi potensialını nümayiş etdirdi. Antiterror tədbirləri zamanı yalnız legitim hərbi obyektlərə dəqiq zərbələr endirildi, mülki obyektlər, yaşayış məntəqələri hədəfə alınmadı: “Bu həm Azərbaycan dövlətinin humanist xarakterini, beynəlxalq humanitar hüququn prinsiplərinə sadiqliyini nümayiş etdirdi, həm də ordumuzun yüksək peşəkarlığının göstəricisi oldu. 24 saat ərzində qanunsuz silahlı birləşmələr təslim olmağa məcbur oldu. Azərbaycan öz suverenliyini bərpa etdi. Bu, bizim tariximizin ən böyük nailiyyətlərindən biridir”.

Məmmədov qeyd edib ki, bu gün Qarabağ iqtisadi rayonunda yaşayan erməni sakinlərin reinteqrasiyası üçün Azərbaycan dövləti bütün zəruri addımları atmağa hazır olduğunu bəyan edib. 

“Azərbaycanın təklif etdiyi və həyata keçirdiyi reinteqrasiya modeli təhlükəsizlik, sosial ədalət, bərabərlik, etnik və dini tolerantlıq kimi vacib meyarlara əsaslanır”, - o qeyd edib.

Mürtəza
Ölkə.Az