Dövlət Avtomobil Nəqliyyatı Xidməti bütün ölkə üzrə reydlər keçirir

Bayram günlərində rayonlarda nəqliyyatın hərəkətinin intensivləşməsi bir sıra müvafiq tədbirlərin görülməsini zəruri edir.

Bu amili nəzərə alaraq, Azərbaycan Nəqliyyat Nazirliyi Dövlət Avtomobil Nəqliyyatı Xidməti regionlarda qanunsuz sərnişindaşıma ilə məşğul olan sürücülərə qarşı reydlər həyata keçirib.

Şamaxı, Lənkəran, Şirvan, Cəlilabad, Göyçay, Gəncə, Beyləqan, Şəki, Quba, Tovuz, Şəmkir rayonlarında baş tutan belə reydlər zamanı qanunsuz yük və sərnişindaşıma ilə məşğul olan sürücülər cəzalandırılıb.

Yoxlamalar nəticəsində lisenziyasız fəaliyyət göstərərək, vergi ödəməkdən yayınan sürücülərə qarşı inzibati qaydada protokol tərtib edilib. Qanunsuz yük və sərnişindaşıma ilə məşğul olan sürücülərin avtomobilləri cərimə meydançasına aparılıb.

Dövlət Avtomobil Nəqliyyatı Xidmətindən verilən məlumata görə, qanunsuz fəaliyyət göstərən sürücülərə qarşı reydlər bundan sonra da müntəzəm davam etdiriləcək.

Ölkə.Az