Deputatlar polisin əmək haqqının artırılmasını təklif edir

Bu gün Azərbaycan polisi ölkədə ictimai asayişin və sabitliyin təmin olunmasında müstəsna xidməti olsa da, onların əmək haqqı xidmətlərinə adekvat deyil.

“Ölkə.Az” xəbər verir ki, belə bir təkliflə deputat Fəzail Ağamalı parlamentin plenar iclasında çıxışı zamanı deyib.

Polisin maaşlarının artırılmasının zəruriliyini qeyd edən deputat bildirib ki, ölkədə ictimai asayişin təmin edilməsində mislisiz xidmət göstərdiyindən onların sosial problemləri həll edilməli, ev verilməli və maaşları artırılmalıdır. 

“Bu gün Azərbaycan polisinin aldığı maaş onun əməyinə adekvat deyil. Əminəm ki, hökumət bu məsələni nəzərə alacaq”, - o qeyd edib.

Deputat Aydın Mirəzəzadə də deputat həmkarının polislərin maaşının artırılması ilə bağlı təklifini  dəstəkləyib. 

“Qarşıda dövlət büdcəsi müzakirə olunacaq. Hesab edirəm ki, hökumət polisin dövlət və cəmiyyət qarşısında oynadığı mühüm rolu nəzərə alaraq onların maaşlarının artırılması istiqamətində  konkret addımlar atacaq”, - o qeyd edib.

Mürtəza
Ölkə.Az