Ermənistanı altını üstünə çevirə bilərdik, amma buna getmədik - Deputat
“Düz 35 il düşmənçilik və təfriqə toxumu səpilən, azərbaycanlılarla hayların etnik uyumsuzluğundan dəm vuran Robert Köçəryan kimi ünsürlərin meydan suladıqları Xankəndinin baş meydanda ilk dəfə sülhə çağırış edildi. Sülhdən danışan, qarşı tərəfə münasibətləri yoluna qoymağı təklif edən isə hay nasizminin bütün vəhşiliklərini görmüş bir xalqın lideri idi. İnanmıram AŞPA və Avropa Parlamentindəki səlibçi təfəkkürlülər, makronyanlılar cənab İlham Əliyevin oktyabrın 15-dəki bu çıxışını dinləyəndə öz sivilizasiyalarından saydıqlarıyla bizim aramızdakı fərqi görüb utansınlar. Onlarda belə bir hiss yoxdur”.
“Ölkə.Az” xəbər verir ki, bunu deputat Sahib Alıyev parlamüentdə çıxışı zamanı deyib.
Onun sözlərinə görə, qərbdəki həmən çevrələr də yaxşı anlayırlar ki, işğal altında olmuş şəhər və kəndlərinin böyük bir hissəsinin altı üstünə çevrilmiş, xalqı etnik təmizləmə ilə üzləşmiş bir ölkənin Prezidenti üçün bizə qarşı düşmənçilik siyasəti yeritmiş və bu gün də yeridən Ermənistana sülh təklif etmək elə də asan deyil. “Asan olmadığı kimi bu, həm də qarşı tərəfə edilən böyük lütfdür. Çünki bunu həmən Ermənistan üzərində mütləq qələbə çalmış, hər baxımdan ondan dəfələrlə güclü olan bir dövlətin başında duran sərkərdə edir. Və bu o sərkərdədir ki, savaş zamanı həmən Ermənistan Gəncə, Bərdə kimi cəbhədən onlarla kilometr uzaqdakı şəhərlərimizin yaşayış kvartallarına raket zərbəsi endirəndə də belə müdrikcəsinə davranmış, Ermənistanın altını üstünə çevirə biləcəyimiz halda, buna getməmişdi”, - o qeyd edib.
Deputat əlavə edib ki, ozamankı kimi Prezidentimizin indiki davranışının da arxasında ilk növbədə soyuq məntiq dayanır: “Məsələ burasındadır ki, əksər böyük güclərin əks mövqedə olmalarına rəğmən Azərbaycanın ikinci Qarabağ savaşında qələbə çalması, ərazi bütövlüyünün bərpası və torpaqları üzərində suverenliyinin tam təmini yönündə atdığı ardıcıl addımlar mahiyyətcə, qlobal konyukturanı dəyişən geosiyasi inqilabdır. Və bu bəlli çevrələrin reallaşdırdıqları rəngli inqilablardan fərqli olaraq dövlətlərin obyektə çevrilməsinə yox, Azərbaycanla yanaşı həm də bütövlükdə regionun subyektliyinin artmasına xidmət edir ki, Fransa kimi bəzi dövlətlərlə gücləri qıcıqlandıran da elə budur.
Ümid etmək istərdim ki, Ermənistanda Azərbaycanın sülh təklifinə müsbət cavabın onların da subyektliyini artıracağını, cənab İlham Əliyevin haylarla çəkişməsiz yaşadığımız vaxtları xatırladarkən nədən Qarabağla yanaşı, İrəvan, Göyçə, Zəngəzur və Dərələyəzin adlarını çəkdiyinin fərqindədirlər. Azərbacan dəfələrlə bildirib ki, hələ sovet dönəmində Qarabağda yaşamış haylarla haydillilərin və doğmalarının geri dönmələrinin əleyhinə deyil. Amma yəqin qarşı tərəf də, onun arxasındakılar da bu dönüş yolunun ikitərəfliliyini, Qərbi Azərbaycanlıların da öz yurdlarına dönməli olduqlarını yaxşı bilirlər. Və onu da yaxşı bilirlər ki, bütün hallarda Azərbaycan öz məqsədinə çatacaq. İlk növbədə ona görə ki, gücün hüququ da hüququn gücü də bizdədir”.
Mürtəza
Ölkə.Az
