Yol süpürənlər başqa sahələrdə bacarıqları olmayanlardır - Deputat
"Küçə süpürən qadınların yol qəzası nəticəsində ölməsi və ya xəsarət almalarına görə yolların süpürülməsinə qadağa qoyulması düzgün olmaz. Sadəcə olaraq yol qəzalarında süpürgəçi qadınların xəsarət almasına qarşı tədbirlər görülməlidir".
Bu sözləri İqtisadiyyat.az-a açıqlamasında Milli Məclisin deputatı Azər Badamov deyib.
Deputat bildirib ki, ilk növbədə, onların işlədiyi təşkilatlar işçiləri ilə təhlükəsizlik qaydaları ilə bağlı maarifləndirmə işlərini geniş şəkildə aparmalıdır. Onun sözlərinə görə, təhlükəsizlik qaydalarına yol hərəkətinin bütün iştirakçıları tərəfindən riayət olunarsa, yol qəzalarında xəsarət alanlar da kifayət qədər azalar.
A.Badamov həmçinin qeyd edib ki, küçələri yalnız qadınların süpürdüyünü demək düzgün deyil. Çünki küçələri süpürən kifayət qədər kişilər də var, lakin qadınlar çoxluq təşkil edir:
"Yol süpürənlər əsasən ixtisaslı təhsili və başqa sahələrdə bacarıqları olmayanlardır. Başqa işlərdə çalışmaq bacarığı olmayan belə qadınlara ailəsini dolandırmaq üçün yolun süpürülməsi işində fəaliyyət göstərilməsinə qadağa qoymaq məntiqsizdir. Qadınlara yol süpürülməsini qadağan etmək onların işləmək hüququna məhdudiyyətin qoyulmasıdır. Ölkəmizdə gender bərabərliyi var və ona görə də qadınlar kişilər kimi dövlət vəzifələrində, sahibkar kimi və o cümlədən, yol süpürülməsi işlərində fəaliyyət göstərirlər".
Xatırladaq ki, bir neçə gün əvvəl Bakıda yolu təmizləyən təmizlik işçisini avtomobil vuraraq öldürüb. Paytaxt küçələrində bu cür xoşagəlməz hadisələr dəfələrlə baş verib. Bundan əvvəllər də analoji hadisələr qeydə alınıb. Ekspertlər deyir ki, dünyanın bir çox ölkəsində yollar, küçələr, xüsusən də sürət həddi yüksək olan magistralların kənarları xüsusi texnikalar vasitəsilə təmizlənir. Paytaxtımızın sürət həddi yüksək olan yollarında isə təmizlik işlərinə Bakı Şəhər Mənzil-Kommunal Təsərrüfatı Departamentinin qadın əməkdaşları cəlb edilir və onların həyatı təhlükə altına düşür.
Qeyd edək ki, Bakı Şəhər Dövlət Yol Polisi İdarəsi və Bakı Şəhər Mənzil-Kommunal Təsərrüfatı Departamenti sürücülərə təhlükəsizlik qaydalarına ciddi şəkildə riayət olunması ilə bağlı müraciət edib. Müraciətdə paytaxt ərazisində kommunal-təsərrüfat sahəsində çalışan işçilərin günün müxtəlif saatlarında yollarda xidmət etməsini nəzərə alıb hər bir sürücüdən son dərəcə diqqətli olmaları və bu sahədə olan əməkdaşların, xüsusilə paytaxtın mərkəzi küçə və prospektlərində, hərəkət sürəti yüksək olan yollarda xidmətlərini nəzərə almaları xahiş olunub.
