Arif Yunus da prokurorluğa aparıldı

Hüquq müdafiəçisi Leyla Yunusun həyat yoldaşı Arif Yunus prokurorluqda ifadə verməyə razılaşıb. Bu haqda "Azadlıq" radiosuna onun özü məlumat verib: "Qapını açmırdım. Tələb edirdim ki, Leyla Yunus prokurorluqda vəkillə təmin olunsun. 

Xəbərdarlıq etdilər ki, açmasam, sındıracaqlar. Vəkil Xalid Bağırovla məsləhətləşəndən sonra qapını açdım. İndi vəkilin maşınında, bir nəfər prokurorluq əməkdaşı ilə istintaqa gedirik" – deyə A.Yunus bildirib. Qeyd edək ki, bu gün saat 11:45-də naməlum şəxslər tərəfindən saxlanılan Leyla Yunus zorla Prokurorluğa aparılııb. Onun həbs olunduğu, yaxud dindirilmək üçün aparıldığı məlum deyil. Baş Prokurorluqdan məsələ ilə bağlı açıqlama verəcəyini bildirblər. Leyla Yunus və həyat yoldaşı, politoloq Arif Yunus dövlətə xəyanətdə günahlandırılan jurnalist Rauf Mirqədirovun işi üzrə dindirilməlidir. Rauf Mirqədirov aprelin 19-da həbs olunub. Aprelin 28-də Leyla Yunus və Arif Yunus Bakı aeroportundan Qətərin paytaxtı Doha şəhərinə yola düşərkən saxlanıblar. Onların ölkədən çıxmasına icazə verilməyib, pasportları və bəzi başqa sənədləri alınıb. İndiyədək Leyla Yunus Ağır Cinayətlərə Dair İşlər üzrə İstintaq İdarəsində bir dəfə ifadə verib. Ondan sonra hüquq müdafiəçisi bütün çağırışları rədd edib.

Ölkə.Az