Köhnə metro kartlarının aqibəti necə olacaq?

Oktyabrın 1-dən Bakı Metropolitenində gediş haqqı yalnız “Bakıkart”la ödəniləcək

Ancaq prosesin başa çatmasına cəmi iki gün qalsa da, bəzi vətəndaşlar köhnə kartların aqibətinin necə olacağından xəbərsizdirlər. Sosial şəbəkələrdə və bəzi saytlarda isə köhnə kartların girov dəyərinin (iki manat) geri qaytarılmayacağı barədə məlumatlar yayılıb.

Məsələni bir daha dəqiqləşdirmək üçün Bakı Metropoliteninin mətbuat xidmətinin rəhbəri Nəsimi Paşayevlə əlaqə saxladıq. Metropoliten sözçüsü Ölkə.Az-a açıqlamasında bildirdi ki, vətəndaşların narahatlığına heç bir əsas yoxdur və köhnə kartların girov dəyəri geri alınmayıbsa, istifadə edilməyibsə, həmin məbləğ "Bakıkart"a transfer edilə bilər:

"Son tarix 30 sentyabrdır. "Bakıkart"ı alıb kassaya yaxınlaşırsınız. Əvvəlki kartınızın üzərindəki məbləğ və girov dəyəri "Bakıkart"a yüklənilir".

Ölkə.az