Türkiyəli bələdiyyə başqanı Azərbaycanın hərbi geyimində

Millət vəkili Qənirə Paşayevanın rəhbərlik etdiyi “Avrasiya Beynəlxalq Araşdırmalar İnstitutu” İB-nin dəvəti ilə Azərbaycanda səfərdə olan Bolu Bələdiyyə başqanı Aladdin Yılmazın rəhbərlik etdiyi nümayəndə heyəti Ramazan bayramında Tovuz rayonunda ön cəbhədə yerləşən Əlibəyli və Ağdam kəndini ziyarət ediblər və Ermənistanın vandalizm aktları ilə yaxından tanış olublar. 

Ölkə.Az qafqazinfo-ya istinadən xəbər verir ki, burada Türkiyə nümayəndə heyətinə mürahibə dövrü ilə bərabər atəşkəs dövründə də Tovuzun ön cəbhə kəndlərinin yaşadıqları barədə geniş məlumatlar verilib.  

Qənirə Paşayeva və ön cəbhədə yerləşən hərbi hissənin rəhbərliyi Türkiyənin  Bolu Vilayətinin bələdiyyə başqanı Aladdin Yılmaza,  bələdiyyə başqan müavini Emine Davarçıqlıoğluna, bələdiyyə rəsmiləri Gülər Mert ve Mehmet Çetinə Əlibəylidə Azərbaycanın əsgər və zabitləri adından Azərbaycan əsgərinin hərbi formasını hədiyyə ediblər və bildiriblər ki, “Bu, ən qiymətli hədiyyədir və biz inanırıq ki, siz hər zaman özünüzü Azərbaycan ordusunun könüllü bir əsgəri kimi hiss edəcəksiniz”. 

Azərbaycan əsgərinin formasını geyinən Türkiyəli rəsmilər və qonaqlar “Bu, həyatımızda aldığımız ən gözəl hədiyyələrin önündə gəlir və hər zaman Azərbaycanın və ordusunun yanındayıq, onun bir əsgəriyik və bu hədiyyədən, bu formanı geyinməkdən böyük şərəf və qürur duyuruq” deyərək hər biri əsgər salamı veriblər.

Ölkə.Az