Azərbaycanlı merin qətlindəki sirr pərdəsi
Oleq Babayevin qatilinin tapılması üçün mükafat təyin edildi; istintaq 4 versiya üzərində işləyir; Ukrayna prezidentinin şəxsi nəzarətə götürdüyü cinayət işi açılacaqmı?..
Ukraynanın Poltava vilayətinin Kremençuk şəhərinin azərbaycanlı meri Oleq Babayevin qətli ətrafında müəmma davam edir. Cinayətin üstünün isti izlərlə açılması üçün hüquq-mühafizə orqanları əllərindən gələni eləsələr də, hələ ki istintaqın gedişində mühüm dönüş qeydə alınmayıb.
Bu arada mərhumun dostları təhqiqatın nəticə verməsi və qatilin izinə düşülməsinə kömək üçün veriləcək istənilən informasiyaya görə mükafat təsis elədikləri bəlli olub. Ölkə.Az-ın musavat.com-a istinadən verdiyi xəbərə görə, bu məqsədlə yaradılan xüsusi fonda artıq 100 min qrevendən çox ianə toplanıb və məbləğin qat-qat çox olacağı gözlənilir.
Hüquq-mühafizə orqanları Oleq Babayevin qətlini sifarişli hesab edir. Onların qənaətincə, bunu ilk növbədə cinayətin soyuqqanlıqla həyata keçirilməsi təsdiqləyir. Ukraynanın daxili işlər nazirinin müşaviri Anton Geraşenkonin sözlərinə görə, merə iki silahdan atəş açılıb. Bu isə o deməkdir ki, böyük ehtimalla, qatillər iki nəfər olub.
Versiyalara gəlincə, Daxili İşlər Nazirliyi əsasən 4 ehtimal üzərində işləyir: bunlar Babayevin şəhər başçısı postundakı fəaliyyəti, onun biznes işləri və məişət səbəbləri (şəxsi zəmində problem) ilə bağlı versiyalardır. Terror aktı variantı da istisna olunmur.
Babayevin yaxınları isə açıqlamalarında bildiriblər ki, o, tezliklə Poltava Regional Dövlət Administrasiyasına rəhbərlik etməli imiş. Onların sözlərinə görə, Kremençuk şəhərinin meri vəzifəsini icra edən Oleq Babayev artıq bir neçə təsdiqlənmədən keçmişdi və bu həftə onun Poltava Regional Dövlət Administrasiyanın rəhbəri təyin edilməsi üçün görüşləri planlaşdırılırdı. İstisna deyil ki, sifarişli qətldə bu amil də az rol oynamır.
Ukrayna prezidenti Petro Poroşenko istintaq işini şəxsən öz nəzarətinə götürüb. O, aidiyyəti qurumlardan qətlin operativ və obyektiv təhqiqatını tələb edir. Ukraynanın dövlət başçısı həm Babayevin öldürülməsini, həm də bu arada Lvov meri Andrey Sadovoya qarşı edilən sui-qəsd cəhdini ölkənin sakitlik hökm sürən rayonlarında əhalinin qorxudulmasına hesablanmış terror aktları kimi dəyərləndirib.
Onun sözlərinə görə, hüquq-mühafizə orqanları belə halların dinc şəhər və qəsəbələrdə yayılmasına imkan verməməlidir. “Mən Ukrayna Təhlükəsizlik Xidmətindən (UTX) və Baş Prokurorluqdan hər iki dəhşətli cinayət əməlini tezliklə açmağı gözləyirəm. Tələb edirəm ki, bütün güc və imkanlar icraçıların və sifarişçilərin müəyyən edilməsi işinə yönəldilsin”, - deyə prezident baş prokuror Vitali Yarem və UTX-nin sədr müavini Vitali Yalovenko ilə görüşdə mövqeyini sərt şəkildə ortaya qoyub.
O, istintaqın gedişini şəxsi nəzarətə götürdüyünü də söyləyib. “Sizdən xahiş edirəm ki, təhqiqatın gedişi barədə məni şəxsən məlumatlandırasınız. Şər mütləq cəzalandırılmalıdır. Bu, terrorçuların Ukrayna hüquq-mühafizə orqanlarına ünvanlı təhdididir. Ancaq bizim də əlimizdə cavab vermək üçün nəsə var” - əlavə edib Poroşenko. Öz növbəsində Yarema hər iki cinayətin effektli istintaqı üçün Baş Prokurorluq, UTX VƏ DİN-in əməkdaşlarının cəlb olunduğunu bildirib.
Xatırladaq ki, Batkivşina Partiyasından keçmiş deputat olan Oleq Babayevin 49 yaşı olub. O, 21 oktyabr 1965-ci ildə Kursk şəhərində doğulub. 1990-cı ilin dekabrından Ukrayna vətəndaşlığı alıb. Atası əslən Azərbaycanın Gəncə şəhərindəndir. Babayev Almaniyadan gətirilən avtomobillərin satışı, dəri emalı biznesi ilə məşğul olub. 2005-ci ildən “Vorskla” futbol komandasının prezidenti idi. Komanda ötən mövsüm Ukrayna premyer-liqasını 8-ci yerdə başa vurmuşdu.
Oleq Babayev iyulun 26-da, səhər saat 10:00 radələrində evinin qarşısında güllələnib. 3 güllə yarası alan mer yerindəcə keçinib. Dünən o, dəfn olunub. Bu barədə şəhər merinin səlahiyyətlərini icra edən Viktor Kalaşnik məlumat verib.
Ölkə.Az
