Ruslan İzzətli imza vərəqlərini DSK-ya təqdim etdi

Ruslan İzzətli imza vərəqlərini DSK-ya təqdim etdi

33 saylı Xətai I seçki dairəsi üzrə namizədliyini irəli sürən Ruslan İzzətli imza vərəqələrini dairə seçki komissiyasına təqdim edib. Bu barədə Ölkə.Az saytına Ruslan İzzətli məlumat verib. Gənc siyasətçi qeyd edib ki, onun seçki qərargahı tələb olunan imzanı bu gün DSK-ya təqdim edib.

"Əminik ki, namizədliyimiz qeydə alınacaq və təbliğat-təşviqata start veriləndən sonra təbliğatımızı aparmağa başlayacağıq. Biz elektoral bazamızı müəyyənləşdirmək üçün təbliğat texnologiyalarımızı müəyyənləşdiririk. Əslində elektoral bazamız göz önündədir. Bu baxımdan narahatlığımız yoxdur. Həmçinin şüarlarımızı, təbliğat materiallarımızın formalarını tərtib edirik. Hesab edirəm ki, seçki qərargahı işlərini uğurla həyata keçirir. Təşviqat kampaniyasına tam hazırıq".

Ruslan İzzətli həmçinin bildirib ki, DSK-ya təqdim etdiyi imza vərəqələrin surətini özündə saxlayıb  və hər hansı şəkildə saxtakarlığa yol verilsə, həmin sənədlərin surətini fakt olaraq üzə çıxaraq.

Qeyd edək ki, Ruslan İzzətli haqqında DSK-nın erkən təbliğat apardığı haqda qərarını MSK ləğv etmişdi.