Bu işçilərin maaşı mütləq artırılmalıdır - Mütəxəssis sadalayır

İşçilər maaş artımını hər zaman səbrsizliklə gözləyir. Bəziləri düşünür ki, 6 aydan, 1 ildən bir maaş artırılmalıdır. İnflyasiyanı, qiymətlərin artmasını nəzərə alaraq şirkətlər ümumi maaş artımlarına gedirlər. Amma maaş sadəcə ümumi yox, fərdi formada da artırıla bilər. Bəs fərdi formada maaş hansı hallarda artırıla bilər?

İnsan resursları üzrə mütəxəssis İlkin Məcidov Valyuta.az-a bu barədə danışdı. İ.Məcidov deyir ki, hər şirkətin özünəməxsus yanaşması var və maaş artımı hər şirkətin öz dəyərlərinə görə dəyişə bilər: 

“Ola bilər ki, işçiyə hər hansı hədəflər qoyulub, il sonunda hesabat əsasında həmin işçinin fəaliyyəti qiymətləndirilərək maaş artımı edə bilərlər. Fərdi olaraq maaş artımı daha çox xidməti fəaliyyətin qiymətləndirilməsində olur. Bunu daha çox şirkətin rəhbəri qiymətləndirir. Şöbədə işçinin bilik və bacarıqlarını nəzərə alaraq, başqa işçilərə nisbətən üstünlükləri varsa, şirkətə əlavə dəyər qatıbsa, maaş artımı edilə bilər”.

İlkin Məcidov bildirir ki, işçilər başqa müəssisələrdən öyrəndiklərini şirkətdəki digər işçilərə ötürürsə, maaş artımı ola bilər:

“Məsələn, işçi hansısa təlimdən və ya layihəsi əsasında beynəlxalq sertifikat alıb. O, həmçinin çalışdığı şirkətin digər həmkarlarına da təlim keçib, onların da beynəlxalq sertifikat almalarına kömək göstərirsə, maaş artımı edilə bilər. İşçi bunu etməklə şirkətin imicini yüksəldir, işçilərin inkişafına təsir göstərir. Bu da şirkət üçün olduqca vacibdir. Belə işçinin maaşı mütləq artırılmalıdır”.