ÇPA rəisi yayılan xəbərləri təkzib etdi
Daxili İşlər Nazirliyi Çevik Polis Alayının rəisi, polis polkovniki Rəcəb Rəcəbov 140 nəfər ÇPA əməkdaşının işdən azad ediləcəyi barədə yayılan xəbəri şərh edib.
Ölkə.Az-a danışan polis polkovniki bildirib ki, yayılan məlumat həqiqətə uyğun deyil.
“Bu günədək heç bir polis əməkdaşı boy standartlarına uyğun olmamasına Çevik Polis Alayının sıralarından xaric edilməyib”, - deyə, polis polkovniki bildirib.
***
Daxili İşlər Nazirliyi Çevik Polis Alayında kütləvi ixtisarlar başlayıb.
Ölkə.Az xəbər verir ki, “Qafqazinfo”ya daxil olan məlumata görə, ÇPA-dan 140 nəfərin işdən azad olunacağına dair əməkdaşlara xəbərdarlıq edilib.
Qərar onların fiziki göstəricilərinin DİN orqanları əməkdaşlarına uyğun olmaması ilə əsaslandırılıb.
Alay Komandirinin Şəxsi Heyət üzrə müavini, polis polkovniki Rəcəb Rəcəbov ÇPA əməkdaşlarına 4 gün möhlət verib.
Məlumatda qeyd olunur ki, ixtisarlara səbəb polis əməkdaşlarının boylarının standartlara uyğun olmaması göstərilir.
Bundan başqa bir neçə il öncə pensiya yaşına çatan və hər hansı səbəbdən xidmətdə vəzifəsinə davam edən bir çox polis əməkdaşı da təqaüdə göndərilib.
Səxavət Məmməd
Ölkə.Az
