\"Qarabağda lokal, bir neçə günlük müharibə ola bilər\"

Son günlər cəbhə xəttində atəşkəs rejimi ermənilər tərəfindən intensiv olaraq pozulur.

Artıq hər iki tərəf iriçaplı silahlardan istifadə etməyə başlayıb. Bu da öz növbəsində itkilərin çoxalması ilə nəticələnir.

Cəbhə xəttindəki son günlər baş verən atışmaları hərbi ekspert Üzeyir Cəfərov Ölkə.Az-a verdiyi açıqlamasında şərh edib.

"Son zamanlar atəşkəsin pozulması intensiv xarakter alıb. Bunun səbəbi ondadır ki, Azərbaycan düşmənin həmlələrinə cavab verməyə məcburdur. Müdafiə naziri dəfələrlə deyib ki, düşmənin heç bir zərbəsi cavabsız qalmayacaq və onların bir zərbəsinə bir neçə zərbə ilə cavab verəcəyik. Nazirin dediyi də həyata keçirilir. Azərbaycan tərəfi istəmir ki, mülki şəxslərə ziyan dəysin. Ermənilər özləri də etiraf edir ki, Azərbaycan son zamanlar düşməni daim gərginlik altında saxlayır, mülki şəxslərə xətər yetirməmək xətti tutub, ancaq hərbi hədəfləri vurur. Son günlərdə erməni tərəfdən 4 əsgərin ölümü, 16 əsgərin isə ağır yaralanması bilavasitə dəqiq hərbi hədəfin vurulmasının nəticəsidir. 16 yaralıdan da neçəsi sağ qalacaq, neçəsi öləcək, bu da sual altındadır. Son ay ərzində 7 hərbi qulluqçumuz şəhid olub, ancaq düşmən tərəfin bundan üç dəfə çox hərbi qulluqçusu məhv edilib.

Diqqət yetirsək görərik ki, əvvələr minaatanlardan, artilleriya qurğularından istifadə olunmurdu. Ancaq son zamanlar minamiyotlardan, artireliyadan, hətta raketlərdən atəşlər açılır. Axşamlar atəşkəsin daha çox pozulması həm də əsəb müharibəsidir. Həm Azərbaycan, həm də Ermənistan tərəfi hal-hazırda əsəb müharibəsi aparır. Son zamanlardakı gərginlik böyük fəlakətə gətirib çıxara bilər. Genişmiqyaslı əməliyyatların olacağı gözlənilməsə də? Qarabağda lokal, bir neçə günlük qızğın müharibə ola bilər".

Qeyd edək ki, son günlər atəşkəsin pozulması nəticəsində hərbçilərlə yanaşı, bir nəfər mülki vətəndaşımız da dünyasını dəyişib.

Səxavət Məmməd
Ölkə.Az