\"Nurgün Motors\" həyasızcasına müştərilərini aldatmaqda davam edir

“Nurgün Motors”dan gələn şikayətlərin ardı-arası kəsilmir.

Təxminən 4-5 gün bundan öncə redaksiyamıza “Nurgün Motors”la bağlı daxil olan növbəti şikayəti təqdim etmişdik.

Bu şikayət də, vətəndaşların ən çox müraciət etdiyi “Nurgün Motors”un tərkibində olan "Ford Azərbaycan"servis mərkəzlərindən idi.

Bu halın dəfələrlə təkrarlandığını bildirən şikayətçi, məsələyə ümumiyyətlə toxunulmadığını, hətta demək olar ki, unudulduğunu bildirib: “Ötən dəfə söhbət edərkən, mənə ən azından problemin həll olunacağını demişdilər. İndi isə, zənglərim belə cavabsız qalır. Bir sözlə desəm, orda öz keflərindədirlər”.

7News.Az məsələnin hüquqi tərəflərini aşkar etmək üçün, “İstehlakçıların Hüquqlarının Müdafiəsi” ictimai birliyinin sədri Eyyub Hüseynov ilə əlaqə saxlayıb.

Onun sözlərinə görə, bu cür şikayətlərin ardı-arası kəsilmir. Hər gün yeni şikayətlər daxil olur ki, bunlardan bir çoxu da məhz “Nurgün Motors”dandır: “Azərbaycanda bu sahədə ciddi problemlər yaranıb. İstehlakçıların Hüquqlarının Müdafiəsi haqqında qanunun tələbinə görə, məhz bu cür hallar yaşandıqda, avtomobilə lazım olan ehtiyyat hissənin gec tapıldığı halda, müəssisə həmin şəxsi avtomobillə təmin etməlidir. Bununla yanaşı, gecikdirilən hər gün üçün, danışılan məbləğin 1%-i ödənilməlidir”.

Bu cür problemlərin aradan qaldırılmasının ən yaxşı və hüquqi tərəfdən üsulunun şikayətçinin məhkəməyə müraciət etmək olduğunu bildirən Eyyub Hüseynov, lazım olan təzminatın geri ödənilməsinin tələb edilməsinin mütləq olduğunu da əlavə edib: “Bu ən başlıca amildir. Əgər qarşı tərəf hansısa bir yolla bu sadalanan hallardan birindən yayınarsa, o cinayət məsuliyyəti daşımış olacaq. Şikayətçi ona vurulan zərərin ödənilməsini tam olaraq tələb etmək hüququna malikdir”.

Qeyd edək ki, müştəri idarə etdiyi “Ford Mustang” markalı avtomobilinin sıradan çıxan detalı üçün servisə müraciət edib. Avtomobilə lazım olan hissənin 1 ay müddətində gələcəyini söz verən servis rəhbərliyi bu vədinə əməl etməyib. Ötən gün verilən müddətin başa çatdığını görən müştəri, servis mərkəzi ilə əlaqə saxlayıb, ancaq onun bütün zəngləri cavabsız qalıb. Bu problemin aradan qaldırılması üçün yenidən “Nurgün Motors”a üz tutan müştəri, orada maraqlı cavablarla qarşılaşıb: “1 aydan sonra gələcək. Amma o da dəqiq deyil”.

Ölkə.az